Hebreos 8

1U asab nojochil ti' le ba'ax táan c a'alica' leti' lela': yaan to'on jun túul nojoch aj kiin beyo', máax dzo'oc u cutal tu x no'oj u Quili'ich Káanche' Ku te j ca'ano', 2yéetel táan u beetic u aj kiinil ti' le jaajil kulnaj beeta'an tumen Yuumtzilo' ma' tumen máaco'obi'. 3Tuláacal nojoch aj kiine' dza'an u ti'al u kub siibalo'ob yéetel quiimsbil siibalo'ob, le o'olale' kabéet ca yanac xan ti' Jesucristoe' ba'ax u kube. 4Wa ca yanac leti' way yóokol le lu'uma' mix cu páajtal ca'ach u beetic u aj kiinili', tumen láili' yaan aj kiino'ob u ti'al u dzáico'ob le siibalo'ob cu ya'alic u ya'almaj t'aan Moiseso'. 5Ba'ale' le aj kiino'oba' cu meyajo'ob yéetel ba'alo'ob chéen u chica'anil yéetel u yoochel le ba'ax yaan te j ca'ano'. C ojel chéen u yoochelo'ob, tumen le ca'ach tu nu'uctaj Moisés u beetic le u cúuchil kultajo', Kue' tu ya'alaj ti': Ile' beet tuláacal je'el bix le u yoochel tin we'esaj teech te j pu'uco'. 6Ba'ale' c nojoch aj kiine' cu beetic jun p'éel meyaj asab ma'alob; tumen leti' máax cu t'aan tu yo'olal jun p'éel nup t'aan asab ma'alob, le nup t'aana' u ch'a'amaj u muuk ti' dzaabil t'aano'ob asab ma'alobtac. 7Tumen wa le yáax nup t'aan mina'an mixba'al cu bineltic ti'o', ma' túun kabéetchajal ca'ach u láak jun p'éel nup t'aan. 8Ba'ale' Kue' cu keyic u caajal iquil u ya'alic ti' le Quili'ich dzíibo': Yuumtzile' cu ya'alic: Bíin kuchuc u kiinilo'ob le quéen in beet jun p'éel túunben nup t'aan yéetel u máaquilo'ob Israel bey xan yéetel u máaquilo'ob Judá. 9Ma' je'el bix le nup t'aan tin beetaj yéetel le u úuchben taataobo' le kiin ca tin machaj tu kabo'ob u ti'al in jóokesico'ob ti' u lu'umil Egipto'; tumen ma' tu dzo'ocbesajo'ob le in nup t'aano', le o'olale' tin xúump'atajo'ob, cu ya'alic Yuumtzil. 10Le nup t'aan quin in beet yéetel u caajil Israel cu dzo'ocol u máan le kiino'obo' beya, cu ya'alic Yuumtzil: Bíin in dzáa in wa'almaj t'aano'ob tu tuuculo'ob, yéetel bíin in dzíib tu pucsi'ikalo'ob. Tene' bíin u Kuinteno'ob túun, leti'obe' bíin in caajalto'ob. 11Mix máac cun kaabéetchajal u ca'ansic mix u yéet xíimbal mix u sucu'un, táan u ya'alic: Kaj óolt Yuumtzil. Tumen tuláacal bíin u kaj óolten, cu cáajal yéetel u asab chichanil tac u asab nojochil ti'ob. 12Yéetel bíin in sa'ates u si'ipilo'ob, yéetel mix bikin bíin in ka'ajes u kebano'ob. 13Le quéen t'aanac Ku tu yo'olal jun p'éel túumben nup t'aane', cu beetique' tumen dzo'oc u yúuchbental le yáaxo'; yéetel le ba'ax táan u yúuchbental yéetel táan u la'abale', séeba'an bíin mixba'alchajac.


Copyright
Learn More

will be added

X\