Hebreos 7

1Le Melquisedeca' u ajawil Salem yéetel u aj kiinil le jach ca'anil Kuo'. Le ca j suunaj Abraham ti' le ba'atel iquil tu dzáancha'ataj le ajawo'obo', Melquisedeque' jóok u kam u beele' ca tu qui'iqui' t'antaj, 2Abraham túune' tu dzáa ti'e' u diezmoil tuláacal le tu náajaltaj ti' le ba'atelo'. Le kaaba' Melquisedeco' u káat ya'ale' u tojil ajaw, yéetel tumen leti' u ajawil, Saleme' u káat u ya'ale' jéedzel, le kaaba'o' u káat u ya'al xane' u ajawil jéedzel. 3Ma' ojéela'an máax u taatai mix máax u maamai' mix máaxo'ob u ch'i'ibalo'obi'. Ma' tu yúuchul t'aan tu yo'olal u síijil mix tu yo'olal u quíimil; beyo' leti'e' je'el bix u Paal Kue', jun túul aj kiin cu p'áatal mantadz. 4Bele', ile'ex ma'alob buca'aj nojochil Melquisedec, tumen c úuchben taata Abrahame' tu dzáa ti'e' u diezmoil le ba'ax tu lukesaj ti' le ajaw te j ba'atelo'. 5Je'el bix cu ya'alic u ya'almaj t'aan Moisese', le aj kiino'ob máaxo'ob u ch'i'ibalo'ob Levie' yaan ti'ob u páajtalil u tzáico'ob ti' máaco'obe' u bo'olil u diezmoil tuláacal, quex tumen u láaktzilo'ob yéetel u ch'i'ibalo'ob Abraham je'el bix leti'obe'. 6Ba'ale' Melquisedeque', quex ma' u ch'i'ibal Levie', bo'ota'ab ti'e' le diezmo tumen Abrahamo', máax tu kamaj u dzabil t'aan Ku. Bey túuno' Melquisedeque' tu qui'iqui' t'antaj Abraham. 7Mix máac cu páajtal u ya'alic wa ma' beyi': le máax cu qui'iqui' t'aano' asab nojoch ti' le máax cu qui'iqui' t'anta'alo'. 8Way ichilo'one' le máaxo'ob cu kamico'ob le diezmoo' máaco'ob cu quíimilo'ob; ba'ale' Melquisedeque', le Quili'ich Dzíibo' cu t'aan tu yo'olal bey je'el bix jun túul máac láili' cuxa'ane'. 9Cu páajtal u ya'ala'ale' Leví yéetel tuláacal le aj kiino'ob cu síijilo'ob ti' u ch'i'ibalo', ti' máaxo'ob cu bo'ota'al bele' le diezmoo', tu bo'otajo'ob xan u diezmo'ob ti' Melquisedec ti' le kiin ca tu bo'otaj Abraham ti'o'; 10tumen ma'alob tucultbile' Abrahame' táan u bisic tu wíinclil u ch'i'ibal le máaxo'ob ma' síijico'obo' le ca jóok ilbil tumen Melquisedeque'. 11U caajil Israele' tu kamaj le a'almaj t'aano' tu yo'olal le aj kiino'ob levitaobo', máaxo'ob u ch'i'ibalo'ob Aarón. Bey túuno' wa lelo'ob cu páajtal ca'ach u utzil chuca'ancuntico'ob le máaxo'ob cu bino'ob tu paach le a'almaj t'aano', ma' kabéet túun ca chíicpajac u láak aj kiini', jun túul aj kiin ma' je'el bix Aaroni' ba'ale' je'el bix Melquisedeque'. 12Tumen le quéen ke'exec le aj kiino'obo', kabéet xan u ke'exel le a'almaj t'aano'. 13C Yuumtzile' tu yo'olal máax cu ya'alic le Quili'ich Dzíib lela', ti' u láak u chi'ibalil Israel u taal, tu'ux mix máac u beetmaj u aj kiinili'. 14Tumen ma'alob ojéela'anile' c Yuumtzile' ti' u chi'ibalil Judá u taal, tu yóokol le ch'i'bala' mixba'al tu ya'alaj Moisés le ca j t'aanaj tu yo'olal le aj kiinilo': 15Lela' asab t'áalcab u yilale' tumen le túumben aj kiin cu chíicpajalo' bey je'el bix Melquisedeque' 16ma' j kuch u beet u aj kiinili' tu yo'olal jun p'éel a'almaj t'aan cu ya'alic ti' máacalmáac ch'i'ibal unaj u taali', ba'ale' tu yo'olal u páajtalil jun p'éel cuxtal ma' táan u páajtal u xu'ulsa'ali'. 17Tumen ba'ax cu ya'alic Ku tu yo'olale' leti' lela': Teche' jun túulech aj kiin u ti'al kiino'ob mina'an u xuul, je'el bix Melquisedeque'. 18Bey túuno' le yáax a'almaj t'aano' j p'áat dzoca'an u meyaj, tumen mina'an u muuk yéetel mixba'al u biilal; 19tumen u ya'almaj t'aan Moisese' mixba'al tu utzil chuca'ancuntaj. U ti'al u jeelinte' yaan to'on jun p'éel alab óolal asab ma'alob, tu yo'olale' c nadzicbáa ti' Ku. 20Kue' tu beetaj lela' yéetel ch'a'a chi'itajil. 21Le u láak aj kiino'obo' j dza'abo'ob x ma' ch'a'a chi'itajil, ba'ale' tu yo'olal le jun túul aj kiina' yanji' ch'a'a chi'itajil, tumen ti' le Quili'ich Dzíibo' cu ya'ala'al: Yuumtzile' ch'a'a chi'it'aanaji', ma' bíin u kex u t'aani': Teche' jun túulech aj kiin u ti'al kiino'ob mina'an u xuul, bey je'el bix Melquisedeque'. 22Le o'olale', Jesuse' leti' máax béeycuntic jun p'éel nup t'aan asab ma'alob ti' le yáaxo'. 23Le u láak aj kiino'obo' j kuch ya'abtalo'ob, tumen cu quíimilo'obe' ma' táan u páajtal u p'áatalo'ob; 24ba'ale' tumen Jesús cu p'áatal mantadze' u aj kiinile' ma' tu dza'abal ti' mix jun túul u láak. 25Bey túuno', cu páajtal u toquic tu yo'olal kiino'ob mina'an u xuule' le máaxo'ob cu nadzicuba'ob ti' Ku tu yo'olal leti'o', tumen cuxa'an mantadze' u ti'al káat óolal ti' Ku tu yo'olalo'ob. 26Bey túuno', Jesuse', jach leti' le nojoch aj kiin kabéet to'ono' leti'e' quili'ich, mina'an u kasa'anil mix keban ti', jun páaycunta'an ti' le j kebano'obo' yéetel líiksa'an asab ca'anal ti' le ca'ano'obo'. 27Ma' bey je'el bix le u láak nojoch aj kiino'obo', máaxo'ob yaan u kubico'ob quiimsbil siibalo'ob sáamsamalo', yáax táanile' tu yo'olal u kebano'ob, cu dzo'ocole' tu yo'olal u keban le máaco'obo'. Jesuse' ma' bey tu beetili', leti'e' tu kubaj le quiimsbil siibalo' chéen jun téenili' u ti'al tuláacal kiino'ob, le ca tu kubaj u cuxtal tu juunal yóolo'. 28U ya'almaj t'aan Moisese' cu dzáic u ti'al u beetico'ob u nojoch aj kiinilo'obe' máaco'ob ma' utzilchuca'ano'obi'; ba'ale' u ch'a'a chi'itaj Kue', ba'ax j taal tu paach le a'almaj t'aano', cu dzáic u ti'al u beet u nojoch aj kiinil u Paal, máax utzil chuca'ancunsa'an u ti'al aj kiino'ob mina'an u xuul.


Copyright
Learn More

will be added

X\