Hebreos 6

1Bey túuno' co'ox táanil u ti'al ca kuchuco'on béeytal je'el bix nucuch wíinico'obe', co'ox p'atic jun tzéelil le yáax ca'ansajo'ob tu yóokol Cristoo'. Ma' c suut t'aan tu yóokol le yáax chuunpak ca'ansajo'ob, je'el bix le u kexic u tuucul máac tu yóokol le meyajo'ob cu bisico'ob máac ti' quíimilo', le u yocsaj óolta'al Kuo', 2le ca'ansajo'ob tu yóokol le ocja'o, le u dza'abal kab tu yóokol le j ocsaj óolo'obo', le u ca'a púut cuxtal le quimeno'obo' yéetel le u p'is óol Ku u ti'al kiino'ob mina'an u xuulo'. 3Yaan c bin táanil, wa Ku cu cha'ic to'on. 4Tumen le máaxo'ob tu kamajo'ob jun téen le sáasilo' yéetel dzo'oc u yu'ubico'ob u qui'il le ba'ax cu dzáic Kuo', yéetel dzo'oc u táacpajlo'ob ti' Quili'ich Pixane', 5yéetel dzo'oc u yu'ubico'ob u qui'il u ma'alob péectzil Ku yéetel u páajtalilo'ob le yóokolcaab bíin taalaco', 6wa cu suut lúubulo'obe', ma' tu páajtal u beeta'al u kexico'ob tu ca'a téen u tuuculo'ob, tumen leti'obe' táan u sinico'ob tu ca'a téen u Paal Ku ti' cruz, yéetel táan u p'a'astico'ob tu táan máaco'ob. 7Beyo'ob je'el bix le lu'um cu dzu'udzic le ja' cu káaxal tu yóokolo': wa le lu'um cu dzáic jun p'éel ma'alob ich ti' le máaxo'ob meyajtico', cu kamic u qui'iqui' t'aan Ku. 8Ba'ale' wa cu dzáic ki'ixo'ob yéetel xíiwo'obe', mixba'al u biilal; cu lúubul yaanal u xot kinaj t'aan Ku yéetel tu dzo'oque' bíin tóoca'ac. 9Ba'ale' quex táan c t'aan beyo', c yaabilaj sucu'une'ex, tu yo'olal te'exe' jach ma'alob c ojéelil le nucuch siibal utzo'ob cu taalo'ob yéetel le tocsajilo'. 10Tumen Kue' toj, yéetel ma' bíin u tu'ubs le ba'ax dzo'oc a beetique'exo' yéetel le yaacunaj dzo'oc a we'esique'ex ti'o' iquil ta wáantilaque'ex le sucu'uno'ob ti' le ocsaj óolalo', jun p'éel ba'ax láili' táan a beetique'ex. 11Ba'ale' c káate' jujun túul ti' te'exe' ca u ye'es tac tu xuul le líik óolala' u ti'al ca utzil dzo'ocpajac ba'ax ca pa'atique'ex. 12Ma' c káat ca ma'akóolchajque'exi', ba'ale' quetaba'ex yéetel le máaxo'ob tu yo'olal le ocsaj óolalo' yéetel tu yo'olal le chuca'an óolalo' táan u kamico'ob le ayikalil a'ala'an ti'ob tumen Kuo'. 13Tumen Kue' le ca tu dzáa u t'aan ti' Abrahame', tu kaaba' tu dzaj u t'aan, tumen mina'an mix máac asab nojoch ti' leti' u ti'al u ch'a'a chi'it u kaaba'; 14ca tu ya'alaj: Tu jaajil bíin in qui'iqui' t'antech jach ya'ab, yéetel bíin in ya'abcunt a ch'i'ibalo'ob. 15Abrahame' tu p'ataj yéetel chuca'an óolal, bey túuno' tu kamaj ba'ax a'ala'ab ti' tumen Ku. 16Máaco'obe' le quéen u ch'a'a chi'ito'ob u kaaba' wa máaxe', cu ch'a'a chi'itico'ob u kaaba' wa máax asab nojoch ti' leti'ob; yéetel le quéen u ya'alo'ob jaaj wa ba'ax yéetel ch'a'a chi'it kaaba'e', mina'an u láak ba'al u ti'al a'albil. 17Le o'olale' Kue' tu jach jaajcuntaj u dzaa t'aan yéetel ch'a'a chi'itaj kaaba', tumen tu yóoltaj u ye'es jach sáasil ti' le máaxo'ob cun u kamo'ob le ayikal cu ya'alic u dzáico', leti'e' jach u dzaamaj u yóol u beetic le ba'ax cu ya'alico' yéetel ma' túun u kex mixba'al. 18Bey túuno' yaan ca'a p'éel ba'al ma' táan u páajtal u ke'exelo'ob, ti' ba'axo'ob Kue' ma' tu páajtal u tuus; yéetel le ba'alo'oba' Kue' cu dzáic to'on jun p'éel jéedzel qui'imac óolal, ti' to'on máaxo'on dzo'oc c caxtic u canantico'on iquil c dzáic c óol ti' le alab óolal yaan actáan to'ono'. 19Le alab óolal cu ma'alob jedzic yéetel cu canantic c pixan, je'el bix le ancla cu p'atic jeedzelil le cheemo'. Le alab óolal yaan to'ona' cu kuchul tac tu paach u nookil le kulnaj yaan te j ca'ano', 20tu'ux j ooc Jesús t o'olal u ti'al u je'ic to'on jun p'éel bej. Beyo' Jesuse' j kuch u beet u nojoch aj kiinil mantadz, je'el bix Melquisedeque'.


Copyright
Learn More

will be added

X\