Hebreos 4

1Bey túuno', ca'aliquil yaan to'on u dzaa t'aanil u ti'al ca oojco'on ti' u je'elel Kue', unaj cananticbáa, bic úuchuc ma' u páajtal u yocol wa máax ti' te'exi'. 2Tumen tac ti' to'on xaan dzo'oc u tze'ecta'al le ma'alob péectzilo', je'el bix ti' leti'obo'; ba'ale' ti' leti'obe' mixba'al u biilal tu yu'ubilaco'ob le t'aano', tumen tu yu'ubajo'ob ba'ale' ma' tu yocsaj óolto'obi'. 3Ba'ale' to'on dzo'oc c ocsaj óolale' to'on le máaxo'on c ocol ti' le je'elelo', je'el bix u ya'almajil Kue': Le o'olale' j kuuxilnajen tu yéetelo'ob ca tin wa'alaj ti'ob: ma' bíin ococo'ob ti' in je'eleli'. Quex tumen, Ku u dzo'ocsmaj u meyaj le ca tu beetaj yóokolcaabe'; 4tumen ti' le Quili'ich Dzíibo' yaan tu'ux cu ya'alic beya' tu yo'olal le séptimo kiino': Kue' je'el ti' tuláacal u meyaje' ti' le séptimo kiino'. 5Tu ca'a téen cu ya'ala'al ti' le Quili'ich Dzíibo': Ma' bíin ococo'ob ti' in je'eleli'. 6Ba'ale' láili' yaan dze'edzec máaxo'ob cu bineltic u yocolo'ob ti' le je'elelo', yéetel le tu yáax u'uyo'ob le ma'alob péectzilo' ma' j ooco'obi' tu yo'olal u x ma' u'uyaj t'aanilo'ob. 7Le o'olale' Kue' dzo'oc u ca'a yéeyic jun p'éel kiin: le kiino' bejela'e'. Tumen Kue' t'aanaj tu chi' David cu dzo'ocol u máan ya'abcach kiino'obe'; ti' le Dzíib dzo'oc c a'alico': Bejela'e', wa te'ex ca wu'uyique'ex ba'ax cu ya'alic Kue', ma' a chichcuntic a pucsi'ikale'ex. 8Wa ca dza'abac ti' le israelitaob le je'elel tumen Josueo', Kue' ma' túun t'aan ca'ach tu yo'olal u láak kiine'. 9Bey túuno', p'aatal jun p'éel quili'ich je'elel u ti'al u caajal Ku; 10tumen le máax cu yocol ti' u je'elel Kue', cu je'elel ti' u meyaj je'el bix Ku dzo'oc u je'elel ti' u meyaje'. 11Unaj, túun, c dzáic c óol u ti'al c ocol ti' le je'elelo', u ti'al ma' u lúubul mix máac je'el bix le máaxo'ob ma' ocsaj óolnajo'obo'. 12Tumen u t'aan Kue' cuxa'an yéetel yaan u páajtalil. asab yaan u yej ti' je'el máacalmáac máascabil ca'a p'éel u yeje', yéetel cu yocol tac tu mas taamil u yóol yéetel u pixan máac, tac ti' le ba'ax asab ta'acbe'en ti' máaco'; yéetel cu jóokesic ti' sáasil u tuuculo'ob yéetel ba'axo'ob u káat u beet le pucsi'ikalo'. 13Mina'an mixba'al ti' le ba'axo'ob u beetmaj Ku ca páatac u ta'ajcubáa ti' leti'o'; tuláacal jéechcab yéetel je'ekab ti' u yich le máax ti' unaj c tzolic ba'ax c beetico'. 14Jesús u Paal Ku, leti' c nojoch aj kiin máax dzo'oc u yocol tu táan Ku. Le o'olale' unaj c p'áatal jeedzel ti' c ocsaj óolal. 15Tumen le c nojoch aj kiino' cu páajtal u ch'a'ic to'on óotzilil tu yo'olal u mina'anil c muuk tumen leti' xane' tu mukyajtaj tuláacal u jejeláasil túuntaj óolalo'ob je'el bix to'one', ba'ale' ma' j kebanchaji'. 16Le o'olale' unaj c nadzicbáa yéetel kub óolal tu táan u jalach káanche' u siibal utzil Ku, u ti'al ca u ch'a'a to'on óotzilil yéetel ichil u siibal utzile' ca u yáanto'on ti' u yorail yaj anilo'on.


Copyright
Learn More

will be added

X\