Hebreos 3

1Bey túuno', quili'ich sucu'une'ex, te'ex táacpaja'ane'ex ichil le máaxo'ob t'ana'ano'ob tumen Kuo', ile'ex ma'alob Cristo Jesuse', u apóstolil yéetel u nojoch aj kiinil le c ocsaj óolalo'. 2Tumen Jesuse' chuca'an u yóol ti' Ku, máax dzáa tu yóokol le meyaja', je'el bix Moisés j chúucpaj u yóol ti' u meyaj xan tu yóokol tuláacal u yotoch Kue'. 3Ba'ale' Jesuse' cu najmatic asab nojoch tziiquil ti' Moisés je'el bix le máax cu beetic jun p'éel naj cu kamic asab nojoch tziiquil ti' le najo'. 4Tuláacal naje' unaj u beeta'al tumen wa máax; ba'ale' Ku máax beet tuláacal ba'ax yaan. 5Bey túuno', Moisese' j chúucpaj u yóol je'el bix jun túul palitzil ti' tuláacal u yotoch Kue'; u meyaje' u t'aan tu yóokol le ba'alo'ob bíin u ya'al Kuo'. 6Ba'ale' Cristoe' chuca'an u yóol je'el bix jun túul paal tu yóokol le u yotoch Kuo'. Le u yotoch Kuo' to'on, wa c p'áatal jejedzquil yéetel yaan to'on alab óolal tac tu xuul, bey xan qui'imac óolal ti' le alab óolal yaan to'ono'. 7Le o'olale', je'el bix cu ya'alic le Quili'ich Pixan ti' le Quili'ich Dzíibo': Bejela'e', wa te'ex ca wu'uyique'ex ba'ax cu ya'alic Kue', 8ma' a chichcuntic a pucsi'ikale'ex je'el bix le máaxo'ob tu cúulpachcunto'ob Ku yéetel tu túuntajo'ob u yóol Ku te x tocoy lu'umo'. 9Te'elo' tu túuntajo'ob in wóol a úuchben taataexo', quex tu yilajo'ob ba'ax tin beetaj tu yáam cuarenta ja'abo'ob. 10Le o'olale' j kuuxilnajen tu contra le máaco'obo', ca tin wa'alaj: Mantadz saatal u máano'ob ti' u pucsi'ikalo'ob yéetel ma' u yóolto'ob u kaj óolto'ob in beelo'obi'. 11Le o'olal kuuxilnajen tu yéetelo'obe' ca tin wa'alaj yéetel páajtalile', ma' bíin ococo'ob ti' in je'eleli'. 12Sucu'une'ex, canantaba'ex mix jun túul ti' te'ex ca yanac ti'e' jun p'éel kasa'an pucsi'ikal ca u tzelubáa ti' le cuxa'an Ku tu yo'olal ma' táan u yocsic u yóol ti'o'. 13Ba'ax unaje', líikes a wóole'ex ta baatzile'ex sáamsamal, ca'aliquil ma' máanac u kiinil bejela'e'; u ti'al mix jun túul ti' te'ex ca chichchajac u pucsi'ikal tu yo'olal tusa'anil tumen le kebano'. 14Tumen wa c p'áatal jeedzel tac tu xuul ti' le alab óolal yanji' to'on le ca j cáaje', bey túuno' táacpaja'ano'on yéetel Cristo. 15Bey cu ya'ala'al: Bejela'e', wa te'ex ca wu'uyique'ex ba'ax cu ya'alic Kue', ma' a dzu'iquintic a pucsi'ikale'ex je'el bix le máaxo'ob tu cúulpachcunto'ob Kuo'. 16¿Máaxo'ob le tu yu'ubajo'ob u t'aan Ku cu dzo'ocole' ca tu cúulpachcunto'ob? ¿Ma' wa tuláacal le máaxo'ob jóoko'ob yéetel Moisés ti' u lu'umil Egipto? 17¿Máax yéetel kuuxilnaj Ku tu yáam cuarenta ja'abo'ob? ¿Ma' wa yéetel le máaxo'ob kebanchajo'obo' yéetel j lúubo'ob quimen te x tocoy lu'umo'? 18¿Ti' máaxo'ob tu ya'alaj Ku yéetel páajtalil ma' bíin ococo'ob ti' u je'eleli'? ¿Ma' wa ti' le máaxo'ob x ma' u'uyaj t'aanajo'obo'? 19C ilic túune' ma' páatji' u yooclo'obi' tumen ma' ocsaj óolnajo'obi'.


Copyright
Learn More

will be added

X\