Hebreos 10

1Tumen u ya'almaj t'aan Moisese' chéen jun p'éel u yoochel le ma'alob ba'alo'ob bíin taalaco', ma' jach bixo'ob tu jaajili'. Bey túuno', le a'almaj t'aano' mix bikin cu páajtal u yutzil chuca'ancuntic le máaxo'ob cu nadzicuba'ob ti' Ku tu yo'olal le quiimsbil siibalo'ob cu ku'ubulo'ob cada ja'abo'. 2Tumen wa le a'almaj t'aan cu páajtal u utzil chuca'ancuntico'obo', le quiimsbil siibalo'obo' je'el u jáawal u ku'ubulo'obe'; tumen le máaxo'ob kubico' le quéen p'o'oboco'ob jun téen ti' u kebano'obe' ma' túun u yu'ububa'ob wa yaan u si'ipilo'ob. 3Ba'ale' le quiimsbil siibalo'oba' cu meyajo'obe' u ti'al u ka'ajsico'ob u kebano'ob cada ja'abo', 4tumen u ki'ikel wacaxo'ob yéetel j tamano'obe' mix bikin cu páajtal u lukesic le kebano'obo'. 5Le o'olal Cristoe' le ca j taal way yóokolcaabe' tu ya'alaj ti' Ku: Ma' a káat quiimsbil siibalo'obi' mix ca ku'ubuc teech ba'alche'obi', ba'ale' dzo'oc a nu'uctic teen jun p'éel wíinclil. 6Ma' utz ta t'aan le tóocbil siibalo'obo' mix le quiimsbil siibalo'ob cu ku'ubulo'ob u ti'al u lukesa'al le kebano'. 7Tin wa'alaj túun: Je'el quin taal u ti'al in beet ba'ax a káate', Ku, je'el bix dzíibta'an tin wo'olal te j libro'o'. 8Yáaxile' cu ya'alic: Ma' utz ta t'aan le quiimsbil siibalo'obo' mix le ba'alche'obo', mix le tóocbil siibalo'ob mix le siibalo'ob u ti'al u lukesa'al kebano', quex le a'almaj t'aan a'alic ca ku'ubuco'obo'. 9Cu dzo'ocole' cu ya'alic: Je'el quin taal u ti'al in beet ba'ax a káate', Ku. U káat u ya'ale' cu lukesic le úuchben quiimsbil siibalo'obo' u ti'al u dzáa le u láak quiimsbil siibal u jeelinto'. 10Kue' dzo'oc u quili'ichcuntico'on tumen Jesucristoe' tu beetaj ba'ax u káat Ku le ca tu kubaj u wíinclil bey jun p'éel quiimsbil siibal chéen jun téenili' u ti'al tuláacal kiino'obe'. 11Tuláacal aj kiin judióe' cu beetic u meyaj sáamsamal yéetel bin u ca'aj u kub ya'ab u téenel le quiimsbil siibalo'oba', quex tumen le quiimsbil siibalo'oba' mix bikin cu páajtal u lukesico'ob le kebano'obo'. 12Ba'ale' Jesucristoe' tu kubaj tu yo'olal le kebano'obo' chéen jun p'éelili' quiimsbil siibal u ti'al kiino'ob mina'an u xuul, cu dzo'ocole' ca j culaj tu x no'oj Ku. 13Ti' cu pa'ataj tac quéen dza'abac u aj p'eeco'ob yáanal u yooc, 14tumen yéetel jun p'éelili' quiimsbil siibale' tu utzil chuca'ancuntaj u ti'al kiino'ob mina'an u xuul le máaxo'ob u quili'ichcuntmajo'. 15Le Quili'ich Pixano' cu jaajcuntic to'on lela', tumen yáaxile' cu ya'alic: 16Le nup t'aan quin in beet tu yéetelo'ob cu dzo'ocol u máan le kiino'obo' bey bíin béeyaca', cu ya'alic Yuumtzil: Bíin in dzáa in wa'almaj t'aano'ob tu pucsi'ikalo'ob, yéetel bíin in dzíibt tu tuuculo'ob. 17Cu dzo'ocole' cu ya'alic: Mix bikin bíin in ka'ajes u kebano'ob mix u kasa'anilo'ob. 18Bey túuno', tumen dzo'oc u sa'atsa'al le kebano'obo', ma' kabéet u ku'ubul u láak quiimsbil siibalo'ob tu yo'olalo'obi'. 19Le o'olale' sucu'une'ex, bele' cu páajtal c ocol yéetel tuláacal kub óolal tac ti' le jach Quili'ich Cúuchilo' tu yo'olal u ki'ikel Jesucristo', 20ti' le túumben bejo', le u bejil cuxtalo', le bej tu je'aj to'on ti' le cortinao', u káat u ya'ale', ti' u wíinclil. 21Jesuse' leti' c nojoch aj kiin tu yóokol u yotoch Ku; 22le o'olale' unaj c nadzicbáa ti' Ku yéetel u jaajil yóol c pucsi'ikal bey xan yéetel jun p'éel ocsaj óolal jach jeedzel; p'o'an c pucsi'ikal ti' kaakas tuucul bey xan c wíinclile' p'o'an yéetel ma'alob ja'. 23Co'ox p'áatal jeedzel ti' u alab óolalil c ocsaj óolal, ma' u kéexel c óol, tumen chuca'an u yóol le máax tu dzáa u t'aan ti' to'ono'. 24Yéetel unaj c caxantic bix je'el u páajtal c áanticbáa t baatzile' u ti'al ca yanac to'on yaacunaj yéetel u ti'al c beetic ba'ax utz. 25Ma'unaj c queticbáa yéetel le máaxo'ob suuc ti'ob ma' u taalo'ob j much'tal t éeteli', ba'ale' unaj c líik óolticbáa tbaatzil, asab unaj c beetic bele' tumen táan a wilique'ex unáadzal u kiinil Yuumtzil. 26Tumen wa tu juunal c óol táan c kebanchajal cu dzo'ocol c kamic u kaj óolalil le jaajo', mina'an u láak quiimsbil siibal tu yo'olal le kebano'obo'. 27Chéen cu p'áatal to'on u jak óolil le p'is óolo' yéetel le choco káak bíin u xu'uls u aj p'eeco'ob Kuo'. 28Wa máax ma' táan u dzo'ocbesic u ya'almaj t'aan Moisés, yéetel yaan ca'a túul wa óox túul jaajcunajo'ob tu contrae' cu xot kinta'al u ti'al quíimil x ma' ch'a'a óotzilil. 29Beyo' ¿Buca'aj asab nojoch jaadz ca tucultique'ex cu najmatic le máax cu pe'epe'echa'atic u Paal Ku yéetel cu tucultic mixba'al u biilal u ki'ikele', bey xan cu poch'ic le Quili'ich Pixan cu dzáic siibal utzo'? Le ki'iko' leti' jaajcuntic le nup t'aano' bey xan tu yéetel quili'ichcunta'ano'ob. 30C ojele' Yuumtzile' u ya'almaj: Teen unaj in jaadz; teen quin bo'ol. Bey xan tu ya'alaj: Yuumtzil bíin u p'is óolt u caajal. 31¡Yayaj ba'al u lúubul máac tu kab le cuxa'an Kuo'! 32Ba'ale' ka'ajac te'ex le kiino'ob dzo'oc u máano'obo', le kiino'ob ca ta kamaje'ex le sáasilo' yéetel ca ta mukyajtaje'ex yéetel chuca'an óolal u yaayaj óolalilo'ob jun p'éel nojoch ba'atel. 33Dze'edzec ti' te'exe' j po'och'e'ex yéetel loobilta'abe'ex tu táan caaj, u láako'obe' táacpajo'ob ti' u mukyajo'ob le máaxo'ob j beeta'ab le ba'alo'ob ti'obo'. 34Te'exe' ta ch'a'aje'ex óotzilil ti' le máaxo'ob j ka'alo'obo' bey xan yéetel qui'imac óolal ta mukyajtaje'ex u lukesa'al te'ex a balaba'ex tumen a wojele'exe' te j ca'ano' yaan a ti'al te'exe' ba'alo'ob asab ma'alobtac yéetel cu xáantalo'ob u ti'al kiino'ob mina'an u xuul. 35Ma' u sa'atal túun a kub óolale'ex, tumen le kub óolalo' bíin u taas te'ex jun p'éel nojoch bo'ol. 36Te'exe' kabéet u chúucpajal a wóole'ex u ti'al a beetique'ex ba'ax u káat Ku u ti'al a kamique'ex beyo' le ba'ax u ya'almaj te'exo'. 37Tumen le Quili'ich Dzíibo' cu ya'alic: Séeba'an, jach séeba'an, bíin taalac le máax yaan u taalo', ma' túun xáantal. 38Ba'ale' le máax quin kamic bey máac toje' bíin cuxlac tu yo'olal le ocsaj óolalo', ba'ale' wa cu suut paachile', ma' bíin qui'imacchajac in wóol tu yéeteli'. 39Ba'ale' to'one' ma' beyo'on le máaxo'ob cu suuto'ob paachil u ti'al sa'atsajilo', ba'ale' beyo'on le máaxo'ob cu yocsaj óolo'obo' yéetel ca to'ococ u pixano'ob.


Copyright
Learn More

will be added

X\