Hebreos 1

1Ti' le kiino'ob úuch máanaco'obo' Kue' t'aanaj yéetel c úuchben láako'ob ya'ab u téenel yéetel ya'ab u jejeláasil, tu yo'olal le aj bóobato'obo'. 2Bele' ti' le dzo'oc kiino'oba' dzo'oc u t'aan t éetel tu yo'olal u Paal. Kue' tu beetaj le yóokolcaabo' tu yo'olal le u paala', yéetel dzo'oc u p'atic ti' leti' tuláacal ba'al. 3Leti'e' u sáasjome'enil u nojbe'enil Ku, yéetel leti'e' jach cu chíicbesic bix Ku; leti' máax láat'ic tuláacal ba'al yéetel u páajtalil u t'aan. Cu dzo'ocol u p'o'ico'on ti' c kebane', j culaj tu no'oj káanche' Ku te j ca'ano'. 4U paal Kue' dzo'oc u kuchul asab nojochtal ti' le ángelo'obo', tumen dzo'oc u kamic jun p'éel kaaba' asab nojoch ti' le tu kamaj leti'obo'. 5Tumen Kue' mix bikin tu ya'alaj ti' mix jun túul ángel: Teche' in Paalech; tene' dzo'oc in dzáic teech cuxtal bejela'e'; mix u ya'al tu yo'olal mix jun túul ángel: Tene' jun túul taatatzilen u ti'al leti', yéetel lela' jun túul in paal. 6Ba'ale' le ca tu taasaj u yáax Paal way yóokolcaabe' tu ya'alaj: Kulta'ac tumen tuláacal u ángelo'ob Ku. 7Tu yo'olal le ángelo'obo' Kue' tu ya'alaj: Cu beetic u ángelo'ob beyo'ob iike', yéetel u palitzilo'obe' beyo'ob u tóoch'bal káake'. 8Ba'ale' Tu yo'olal le Paale' cu ya'alic: A ajawile' Ku u ti'al kiino'ob mina'an u xuul; a jalachile' jun p'éel jalachil toj. 9Dzo'oc a yaabiltic le ba'ax tojo' yéetel dzo'oc a p'ectic le ba'ax kaaso'. Le o'olale' tu yéeyajech Junab Ku, a Ku, tu wecaj ta wóokole' asab ya'ab qui'imac óolal ti' le tu wecaj tu yóokol le a láakinajo'obo'. 10Bey xan cu ya'alic: Teech Yuumtzil, tu yáax chune' ta dzáa u chuun pakil yóokolcaab, ta beetaj xan le ca'ano'obo' yéetel a kab. 11Leti'obe' bíin máanaco'ob, ba'ale' teche' yaan a p'áatal mantadz. Tuláacalo'obe' yaan u la'abalo'ob je'el bix u la'abal nooke'; 12¡bíin a paco'ob je'el bix jun p'éel búuquintbil nooke'! Ba'ale' teche' beyech mantadzo', yéetel a cuxtale' mix bikin bíin xu'uluc. 13Kue' mix bikin tu ya'alaj ti' mix jun túul ángel: Culen tin x no'oj, ca'aliquil in dzáic a aj p'eeco'ob tu yáanal a wooc. 14¿Tumen tuláacal le ángelo'obo' pixano'ob cu meyajtico'ob Ku, túuxta'ano'ob u ti'al u yáanto'ob le máaxo'ob bíin u kamo'ob le tocsajilo'?


Copyright
Learn More

will be added

X\