Galatas 5

1Cristo tu jáalkabto'on u ti'al ca jáalkabta'aco'on. P'áate'ene'ex túun, ti' le jáalkabilo', ma' a suute'ex antal yáanal palitzilil. 2U'uyene'ex. Teen Pabloe', quin wa'alic te'ex, wa ca súutkupta'ale'exe' Cristoe' mix ba'al u biilal te'ex. 3In káat in wa'al tu ca'a téen ti' je'el máaxac cu súutkupta'ale' unaj u beetic tuláacal ba'ax cu ya'alic u ya'almaj t'aan Moisés. 4Te'ex ca tucultique'ex ma'alob a wanile'ex tu táan Ku tu yo'olal a dzo'ocbesique'ex ba'ax cu ya'alic le a'almaj t'aano', dzo'oc a jun páaycunticaba'ex ti' Cristo; dzo'oc a dzicaba'ex jun tzéelil ti' u siibal utzil Ku. 5Tumen to'one' yaan to'on u alab óolalil c dzaabal ma'alob tu táan Ku tu yo'olal Quili'ich Pixan yéetel tu yo'olal le ocsaj óolalo'. 6Wa nupa'ano'on ti' Cristo Jesuse', mix ba'al u biilal wa súutkupta'ano'on wa ma'. Ba'ax yaan u biilale' leti' le ocsaj óolal cu meyaj tu yo'olal le yaacunajo'. 7Te'exe' ma'alob a wanile'ex ca'achi. ¿Máax túun tu beetaj u jáawal a wu'uyique'ex u t'aan le jaajilo'? 8Le Ku máax t'anique'exo' ma' leti' tu beetaji'. 9Ma' u tu'ubul te'exe' jun p'íit levadurae' cu beetic u pajtal tuláacal le sacano'. 10Tene' yaan in alab óolal ti' Yuumtzile' te'exe' ma' bíin jelpajac a tuucule'exi', ba'ale' Kue' yaan u xot kintic máax péecsic a wóole'exo', je'el máaxaque'. 11Ba'ax quin wa'alic tin wo'olale', sucu'une'ex, wa teen láili' táan in ca'ansic le súutkuptajo', bejela'a' le judíob ma' táan u ch'a'apachtiqueno'obe', tumen beyo' u ma'alob péectzilil u cruz Cristoe' ma' táan u lúubul kaasil tu xiquino'obi'. 12Ba'ale' tu yo'olal le máaxo'ob cu máano'ob u péecso'ob a wóole'ex iquil u ca'ansico'ob le súutkuptajo' ¡quexi' ca u xotuba'ob tuláacal jun puli'e'! 13Tumen te'exe', sucu'une'ex, t'ana'ane'ex u ti'al jáalkabil. Chéen ma' a ch'a'ique'ex le jáalkabila' bey je'el bix jun p'éel u ba'ax o'olalil a beetique'ex kaakas dzíibolalo'obe'; meyajtaba'ex ta baatzile'ex yéetel yaacunaj. 14Tumen tuláacal le a'almaj t'aano' cu dzo'ocpajal yéetel le t'aana': Yaabilt a láak je'el bix a yaabilticabáa teche'. 15Canantaba'ex, tumen wa ca chi'icaba'ex yéetel ca jaanticaba'exe', bíin a xu'ulsa'aba'ex ta baatzile'ex. 16Ba'ax quin wa'alic te'exe' leti' lela': Cuxlene'ex je'el bix cu ya'alic le Quili'ich Pixano', beyo' ma' bíin a beete'ex le kaakas dzíibolalo'ob yaan ti' te'exo'. 17Tumen le kaakas dzíibolalo'obo' ti' yano'ob tu contra le Quili'ich Pixano' yéetel le Quili'ich Pixano' ti' yaan tu contra le kaakas dzíibolalo'obo'. Tumen cu ba'atelo'ob tu baatzilo'obe' ma' tu páajtal a beetique'ex le ba'alo'ob a káate'exe'. 18Ba'ale' wa Quili'ich Pixan máax nu'uctic a beele'exe' mina'ane'ex túun tu yáanal le a'almaj t'aano'. 19Ma' talam u yila'al máacalmáac le ba'alo'ob cu beetico'ob le máaxo'ob cu bino'ob tu paach le kaakas dzíibolalo'obo'. 20táan Cu meyajtico'ob beetbil kuo'ob yéetel cu beetico'ob pulya'ajilo'ob. Cu ch'a'ap'ectajo'ob, cu ba'atelo'ob yéetel cu kaakas tuuculo'ob. Séeba'an u p'u'ujulo'ob, cu beetico'ob tuláacal ba'al chéen u ti'al u yutzilo'ob, cu beetico'ob jatzlantáanbailo'ob bey xan u jejeláas u múuch'ul máaco'ob. 21Yaan loolob dzíibolal ti'ob, j quíimsaj wíinico'ob, j cáaltalo'ob yéetel jach joloko'ob, yéetel cu beetico'ob u láak ba'alo'ob chica'an ti' lelo'oba'. Quin ca a'alic te'exe' je'el bix dzo'oc in wa'alic te'exo', le máaxo'ob cu beetico'ob le ba'alo'oba' ma' tu táacpajalo'ob tu ajawil Ku. 22Ba'ale' Quili'ich Pixane' cu dzáic yaacunaj, Qui'imac óolal, jéedzel óolal, chuca'an óolal, ma'alob bisajbáil, utzil pucsi'ikal, ocsaj óolal, 23cabal óolal yéetel mu'ukan óolal. Mina'an mix jun p'éel a'almaj t'aan ca u mix ba'alcunt ba'alo'ob je'el bix le lo'oba'. 24Le máaxo'ob u ti'alo'ob Cristo' dzo'oc u quíimsico'ob ti' u cruz u lu'umcabil wíiniquilo'ob pa'ate' yéetel ba'ax tu t'aano'ob bey xan u dzíibolalo'ob. 25Wa cuxa'ano'on tu yo'olal Quili'ich Pixane', unaj c xíimbal tu yo'olal Quili'ich Pixan. 26Ma' unaj u ca'analtal c ichi', u ti'al c caxantic ba'atel t baatzili', mix unaj u yantal loolob dzíibolalo'ob ichilo'oni'.


Copyright
Learn More

will be added

X\