Galatas 4

1Ba'ax in káat in wa'ale' leti' lela': Jun túul paal cun u kam u ayikalil u taatae' ca'aliquil chichane' mina'an u jela'anil ti' jun túul u palitzil le najo', quex tu jaajile' leti' u yuumil tuláacal. 2Yaan máaxo'ob dza'an u ti'al canantic yéetel u ti'al ilic u ba'aluba'ob tac le kiin cun u ya'al u taatae'. 3Bey túun cun yúuchul t éetel; ca'aliquil chaan palo'on ca'ache', co'ox a'alic beyo', palitzilo'on yáanal u ba'aluba'ob yóokolcaab. 4Ba'ale' le ca j kuch u kiinile', Kue' tu túuxtaj u paal, máax síij ti' jun túul co'olel, síij xan yáanal le a'almaj t'aano'. 5J taal beyo' u ti'al u jáalkabt le máaxo'on yano'on ca'ach yáanal le a'almaj t'aano' u ti'al ca ka'amaco'on tumen Ku bey u paalalo'obe'. 6U ti'al u ye'esic túun Ku te'ex u paalale', tu túuxtaj u Quili'ich Pixan u paal ta pucsi'ikale'ex; le Quili'ich Pixan túuno' cu ka'am a'alic: ¡C Taata! 7Bey túuno' teche' ma' palitzilechi' ba'ale' u paalech Ku. Tumen u paaleche', Kue' yaan u dzáic teech u ayikalil tu yo'olal Cristo. 8Ca'ach ma'ali' a kaj óolte'ex Kue', palitzile'ex ti' le beetbil kuo'obo' quex tu jaajile' ma' kuo'obi'. 9Ba'ale' beoraa' a kaj óole'ex Kue' wa a'albil mas ma'alobe', Ku u kaj óole'exe' ¿Bix u yúuchul a suute'ex tu ca'a téen ti' le ma' muukil yéetel óotzil tuuculo'obo'? ¿Ba'ax teen a káate'ex ca palitzilta'aque'ex tu ca'a téen? 10Te'exe' láili' ca kiinbesique'ex dze'edzec kiino'ob, meso'ob, yéetel ja'abo'ob. 11Táan in tucultique' wa in meyaj ichile'exe' mix ba'al u biilal. 12Sucu'une'ex, quin káat óoltic te'ex ca a sutaba'ex je'el bix tene', tumen tene' dzo'oc in sutiquinbáa je'el bix te'exe'. Tumen mix jun p'éel loob a beetmaje'ex teen. 13Tumen je'el bix dzo'oc a wojéeltique'exe', le ca tin yáax tze'ectaj te'ex le péectzilo' tin beetaj tu yo'olal jun p'éel koja'anil quin mukyajtic ca'achi'. 14Le koja'anil yanji teno' jun p'éel túuntaj óolal in ti'alte, ba'ale' te'exe' ma' ta p'ectene'exi'. Ma' beyi', ba'ale' ta kamajene'ex bey jun túul u ángel Kue', je'el bix ta kamile'ex Cristo Jesuse'. 15¿Ba'ax úuch yéetel le qui'imac óolal anji te'exo'? cu páajtal in wa'alic ta wo'olale'exe', wa ca páatac ca'ache', tac je'el a jóokesique'ex a wiche'ex u ti'al a dza'ex tene'. 16Beoraa' ¿dzo'oc wa in sutiquinbáa a enemigoex chéen tumen dzo'oc in wa'alic te'ex u jaajil? 17Le máaco'obo' jach u dzaamo'ob u yóolo'ob ti' te'ex, ba'ale' ma' yéetel utzil tuuculi'. Ba'ax u káato'obe' u tzelique'ex ti' to'on, u ti'al ca a dzáa a wóole'ex ti'ob. 18Tu jaajile', ma'alob ca u dzáa u yóol máac ti' u láako'ob, ba'ale', ca beeta'ac yéetel ma'alob tuucul, yéetel ca beeta'ac mantadz, ma' chéen le quéen yanaquen ichile'exi'. 19In paalale'ex, tu ca'a téen táan in mukyajtic ki'inamilo'ob ta wo'olale'ex, je'el bix jun túul maamatzil yaan u ki'inamilo'ob síijsaj ti'e'. Ma' túun xu'ulul in cuxtal tac quéen yanac Cristo ta cuxtale'ex. 20¡Buca'aj ma'alobil wa ti' yanen ta wéetele'ex bejela'e' u ti'al ca páatac in t'anique'ex jela'an, tumen ma' in wojel ba'ax je'el in tucultic ta wo'olale'exi'! 21Te'ex a káate'ex antal yáanal u ya'almaj t'aan Moisese', a'ale'ex teen lela': ¿Ma' a wu'uymaje'ex ba'ax cu ya'alic le a'almaj t'aano'? 22Cu ya'alique' Abrahame' yanji ca'a túul u paalal: jun túule' yéetel x palitzil, u láake' yéetel u yatan máax ma' x palitzili'. 23U paal le x palitzilo' síiji je'el bix u síijil tuláacal paale', ba'ale' u paal le ma' x palitzilo' síiji u ti'al ca dzo'ocpajac ba'ax u ya'almaj Ku. 24Lela' bey jun p'éel queet t'aane'. Le ca'a túul co'olelo'obo' beyo'ob le ca'a p'éel nup t'aano'obo'. Jun p'éel ti' le nup t'aana' leti' le beeta'ab tu pu'uquil Sinaio', lela' cu que'etel yéetel Agar; le máaxo'ob yano'ob yáanal le nup t'aana' cu síijilo'ob u ti'al ca palitzilta'aco'ob. 25Tumen Agare' cu que'etel yéetel u pu'uquil Sinaí tu lu'umil Arabia, lela' leti' le Jerusalén yaan beoraa', tumen le caaja' ti' yaan yáanal u palitzilil jun múuch' yéetel u paalal. 26Ba'ale' le ca'anil Jerusaleno' ma' palitzili', to'on túune' u paalalo'on leti'. 27Tumen le Quili'ich Dzíibo' cu ya'alic: Qui'imacchajac a wóol, co'olel ma' teech a síijsaj, teech mina'an a paalalo'ob; awatnen yéetel qui'imac óolal teech ma' a mukyajtmaj u ki'inami'ilo'ob síisaji'. Tumen mas ya'ab u paalal cu yantal le co'olel xu'ump'atta'ano' ti' le yaan u yíicháamo'. 28Sucu'une'ex to'one' beyo'on Isaaque'; to'on le paalalo'ob tu dzaa t'antaj Kuo'. 29Ba'ale' bey je'el bix ti' le kiino'obo' le paal síij je'el bix u síijil tuláacal paale' tu ch'a'apachtaj le paal síij tu yo'olal u páajtalil Quili'ich Pixane', bey xan cu yúuchul bejela'e'. 30Ba'ale', ¿ba'ax cu ya'alic le Quili'ich Dzíibo'? Cu ya'alic: Tojolch'int le x palitzil yéetel u paalo', tumen u paal le x palitzilo' ma' tu páajtal u kamic u ayikalil le taatao' jun múuch' yéetel u paal le co'olel ma' palitzililo'. 31Bey túuno' sucu'une'ex, ma' u paalalo'ob le x palitzilo' ba'ale' u paalalo'ob le co'olel x ma' palitzilo'.


Copyright
Learn More

will be added

X\