Galatas 2

1Cu dzo'ocol u máan catorce ja'abo'obe' j binen tu ca'a téen Jerusalén yéetel Bernabé, ca tin bisaj Tito' tin wéetel. 2J binen te'elo' tumen Ku tu ye'esaj teen unaj in bin. Te Jerusaleno' j much'lajo'on jun páayil yéetel le máaxo'ob kaj óola'ano'ob bey u noj poolilo'ob le meyajo', ca tin tzolaj ti'ob le ma'alob péectzil quin tze'ectic ichil le máaxo'ob ma' judíobo'. Tin beetaj lela' tumen ma' in káat ca p'áatac u biilal le ba'ax dzo'oc in beetico' yéetel le ba'ax quin beetica'. 3Ba'ale' mix in wéet xíimbal Tito, máax griegoe', beeta'ab u súutkupta'al. 4Tu jaajile' dze'edzec máaco'ob ma' jaajil sucu'uno'obe', ta'acbe'enil ooquico'ob ichilo'one', u káato'ob ca súut kupta'ac. Lelo'oba' j ooco'ob bey j ch'úuco'obe', u ti'al u yilico'ob le jáalkabil yaan to'on iquil nupa'anilo'on yéetel Cristo Jesuso', u ti'al u sutico'ob palitzilo'on tu ca'a téen. 5Ba'ale' ma' t cha'a u bisico'on mix jun súutuqui', tumen c káat ca p'áatac mantadz ti' te'ex le u jaajil le ma'alob péectzilo'. 6Ba'ale' le máaxo'ob kaj óola'ano'ob bey u noj poolilo'ob le meyajo', ma' tu dzajo'ob teen mix jun p'éel túumben tzol xiquini'. Quex tumen tene' ma' tin wocsinbáa in wojéelt máax leti'ob, tumen Kue' ma' tu p'is óoltic mix máac yo'ocabil. 7Ba'ale' tu kaj óoltajo'obe' ti' teen u kubentmaj Ku u meyajil u tze'ecta'al le ma'alob péectzilo' ti' le ma' judíobo', je'el bix u kubentmaj ti' Pedro u meyajil le ma'alob péectzila' ti' le judíobo'. 8Tumen le Ku túuxt Pedro bey jun túul Apóstol ichil le judíobo' tu túuxtajen xan bey jun túul apóstol ichil le ma' judíobo'. 9Le o'olale', Jacobo, Pedro yéetel Juane' máaxo'ob kaj óolta'ano'ob je'el bix u nuuctaquilo'ob le meyajo' tu kaj óoltajo'ob Ku dzaamil teen le meyaja', ca tu tich'ajo'ob u no'oj kabo'ob ti' teen yéetel ti' Bernabé. Tu beetajo'ob lela' u ti'al u ye'esico'obe' u nupmaj u yóolo'ob t éetel, bey xan utz yilico'ob ca xi'ico'on meyaj ichil le máaxo'ob ma' judíobo', ca'aliquil cu bino'ob leti'ob meyaj ichil le judíobo'. 10Chéen tu káat óoltajo'ob ca ka'ajac to'on le óotzilo'obo', lela' tin beetaj xan yéetel tuláacal in wóol. 11Ba'ale' le ca j bin Pedro tu caajil Antioquíae', tin keyaj tu táan yich, tumen jach ma' utz ba'ax tu beetaji'. 12Tumen táanile' cu janal ca'ach yéetel le ma' judíobo', ba'ale' le ca j kuch dze'edzec máaco'ob túuxta'abo'ob tumen Jacoboe' ca jo'op' u tzelicubáa, ca jáaw u janal tu yéetelo'ob, tumen sajac ti' le máaxo'ob cu ca'ansico'ob unaj u súutkupta'al máaco'. 13Bey túuno' le u láak judíob dzo'oc u yocsaj óolo'obo' tu queto'ob Pedro ti' u ca'a p'éel ichil, tac Bernabé tu cha'aj u bisa'al pa'ate' tu yéetelo'ob ti' le ca'a p'éel ichila'. 14Ba'ale' le ca tin wilaj ma' tu xíimbalo'ob ti' u jaajil le ma'alob péectzilo', tin wa'alaj ti' Pedro tu táan tuláacal u múuch'ul le ocsaj óolo'obo': Teech judióech, táan ca'ach a cuxtal je'el bix le ma' judíobo', ma' je'el bix le judíobo', ¿ba'ax teen túun a káat a beet u cuxtal le ma' judíob je'el bix le judíobo'? 15To'one' judíon síijico'on, ma' j kebano'on je'el bix le ma' judíobo'. 16Quex bey anilo', c ojel mix máac cu dza'abal ma'alobil tu táan Ku chéen tumen tu beetaj ba'ax cu ya'alic le a'almaj t'aano', ba'ale' tumen tu yocsa'al óolto'ob Jesucristo. Le o'olale', tac to'on dzo'oc c ocsaj óoltic Jesucristo, u ti'al ca dza'abaco'on ma'alobil tu táan Ku tu yo'olal le ocsaj óolala', ma' tu yo'olal dzo'oc c beetic le ba'ax cu ya'alic le a'almaj t'aano'. 17Beora', wa to'on c káat antal ma'alobil tu táan Ku tu yo'olal Cristoe', cu yila'al tac to'on j kebano'one', ¿u káat u ya'al wa lela' Cristo cu beetico'on j kebano'on? ¡Jun puli' ma' beyi'! 18Tumen wa cu dzo'ocol in niquic wa ba'ax quin ca'a líiksique', bey túuno' cu yantal in si'ipil. 19Tumen tene' dzo'oc in p'áatal bey quimenen tu táan le a'almaj t'aano', le a'almaj t'aano' tu beetaj in quíimil, tu yo'olal beyo' ca cuxlaquen u ti'al Ku. 20Tene' dzo'oc in quíimil, sina'anen ti' cruz tu yéetel Cristo; le o'olale' ma' teen máax cuxa'ani', Cristo cuxa'an ti' teen. Le cuxtal quin bisic ti' le wíinclila', táan in bisic tu yo'olal in wocsaj óolal ti' u paal Ku, máax tu yaabiltajen ca tu kubjubáa ti' quíimil tin wo'olal. 21Ma' in káat túun in cúulpachcunt u siibal utzil Kui'. Tumen wa jun túul máac cu dza'abal ma'alobil tu táan Ku tu yo'olal u dzo'ocbesic le a'almaj t'aano', mix ba'al túun u biilal quíimic Cristo.


Copyright
Learn More

will be added

X\