Galatas 1

1Teen, Pablo, apóstolen, ma' túuxta'an mix yéeya'an tumen wíinico'obi', ba'ale' tumen Jesucristo, yéetel tumen Ku le taatao' máax ca'a púut cuxquint ti' le quimeno'obo'. 2Teen yéetel tuláacal le sucu'uno'ob yano'ob tin wéetelo' c dzíibtic le ju'una' ti' le iglesiaob yano'ob tu lu'umil Galaciao'. 3Ca dza'abac te'ex siibal utzil yéetel jéedzel tumen Ku c Taata yéetel tumen c Yuumtzil Jesucristo, 4máax tu kubjubáa ti' quíimil tu yo'olal c kebano'ob u ti'al u toquico'on ti' le kaakas kiino'oba', tumen bey tu yo'olal c kebano'ob u ti'al u toquico'on ti' le kaakas kiino'oba', tumen bey tu yóoltaj Ku c Taata. 5¡Nojbe'enil Ti' Ku mantadz! Amén. 6Ku tu t'anaje'ex tu yo'olal u siibal utzil Cristo; jach cu ja'akal in wóol túun, tumen jach séeba'an a p'atique'ex u ti'al a bine'ex tu paach jun p'éel péectzil jela'an. 7Ma' tumen yaan u láak ma'alob péectzili'. Ba'ax cu yúuchule' yaan dze'edzec máaco'ob táan u táabsique'exo'ob yéetel u káat u kexo'ob u ma'alob péectzil Cristo. 8Ba'ale' wa yaan máax cu tze'ectic te'ex jun p'éel ma'alob péectzil ti' le dzo'oc c tze'ectic te'exa', le máaco' dza'abac yáanal xot kinaj, quex wa to'on wa jun túul ángel ca'an u taal. 9Dzo'oc in yáax a'alic te'ex, bejela'e' quin ca'a a'alic: Wa yaan máax cu tze'ectic te'ex jun p'éel ma'alob péectzil jela'an ti' le dzo'oc a kamique'exo', le máaco' dza'abac yáanal xot kinaj. 10Le quéen in wa'al lela', ¿quin wa'alic ma' tumen in káat ca utzil ka'amaquen tumen máaco'ob, wa ca utzil ka'amaquen tumen Ku? ¿In káat wa p'áatal utzil yéetel máaco'ob? Wa láili' in káat p'áatal utzil yéetel máaco'obe', ma' u palitzilen Cristo túuni. 11Ba'ale' ojéelte'ex lela', sucu'une'ex, le ma'alob péectzil quin tze'ectico', ma' u tuucul máaco'obi'. 12Ma' tin kamaj ti' mix jun túul máaqui', mix máac xan ca'ans ti' teen, ba'ale' Jesucristo dzáa in wojéelte. 13Te'exe' dzo'oc a wu'uyique'ex bix in cuxtal ca'achi, le ca'ach yanen tu religión le judíobo'. A wojele'ex yéetel buca'aj kuuxilil tin ch'a'apachtaj u iglesia Ku, yéetel tin wóoltaj in xu'ulse. 14Tu religión le judíobo', tene' mas táanil yanen ca'ach ti' ya'ab in wéet ja'abilo'ob ichil in wéet caajalo'ob tumen tene' jach tin dzaj in wóol in dzo'ocbes u ca'ansajo'ob le úuchbéen taataobo'. 15Ba'ale' Kue' tu yéeyajen ma'ili' síijiquene', yéetel tu yo'olal u siibal utzile' tu t'anajen. Bey túuno' le ca tu yóoltaje', 16tu beetaj in kaj óoltic u paal, u ti'al ca in tze'ect u ma'alob péectzil ichil le ma' judíobo'. Le ca úuch lela' ma' j binen in káat u chi' mix máaqui', 17mix binen Jerusalén in wil le máaxo'ob apóstolo'ob táanil ti' teno'. Ba'ale' tu séeblaquil j binen tu lu'umil Arabia, cu dzo'ocole' ca j suunajen Damasco. 18Dzo'oc u máan óox p'éel ja'abo'obe' ca j binen Jerusalén, u ti'al in kaj óolt Pedro, ca yanchajen quince kiino'ob tu yicnal. 19Ba'ale' ma' tin wilaj mix jun túul u láak ti' le apóstolo'obo' wa ma' chéen Jacobo' u yíidzin Yuumtzil. 20Quin jaacuntic tu táan Ku le ba'ax táan in dzíibtic ti' te'exa' u jaajil. 21Cu dzo'ocol lela' j binen tu lu'umilo'ob Siria yéetel Cilicia. 22U sucu'unilo'ob u iglesiail Cristo yano'ob tu lu'umil Judeae' ma' u kaj óoleno'ob ca'achi'. 23Chéen táan u yu'ubico'ob u ya'ala'al: Le máax cu ch'a'apachtico'on ca'acho', jeoraa' táan u máan u tze'ect le ocsaj óolal u káat ca'ach u xu'ulso'. 24Cu nojbe'encunsico'ob Ku tin wo'olal.


Copyright
Learn More

will be added

X\