Efesios 3

1Tu yo'olal lela' teen, Pablo, máax kala'anen tu yo'olal Cristo Jesús u ti'al a wutzile'ex, te'ex ma' judioxi', quin payalchi'. 2Tumen unaj dzo'oc a wojéeltique'exe' Kue', tu yo'olal u siibal utzile', tu kubentaj teen le meyaja' u ti'al a wutzile'ex. 3Kue' tu ye'esaj u ta'acbil tuuculo'ob ca tu beetaj in wojéeltic, je'el bix dzo'oc in cóom dzíibtic te'exe'. 4Le quéen a xoque'exe', cu páajtal a wilique'exe' in kaj óol u ta'acbil ba'alo'ob Cristo, 5ta'acbil ba'alo'ob ma' dzaab ojéeltbil ti' mix máac ti' u láak kiino'obi', ba'ale' ti' le kiino'oba' Kue' dzo'oc u ye'esic ti' u quili'ich apóstolo'ob yéetel u profeta'ob tu yéetel u Quili'ich Pixan. 6Le ta'acbil ba'alo' leti' lela': Tu yo'olal u ma'alob péectzilil le tocsajilo' le ayikalil cun u kam le máaxo'ob ma' judíobo' queet yéetel cun u kam le judíobo', yéetel táacpaja'ano'ob ti' jun p'éelili' wíinclilo', yéetel yaan ba'al u yilo'ob ti' le ba'ax tu ya'alaj Ku tu yo'olal Cristo Jesuso'. 7Tu yo'olal siibal utzile' j dza'aben u ti'al in meyajt le ma'alob péectzila', tu yo'olal u páajtalil Ku. 8Tene' asab chichanen ti' u asab chichanil ti' tuláacal le máaxo'ob u ti'alo'ob Kuo'; ba'ale' leti'e' dzo'oc u dzáic teen u qui'imac óolalil in tze'ectic ti' le máaxo'ob ma' judíobo' u ma'alob péeczilil u mina'anil u p'is ayikalil Cristo. 9Yéetel tu kubentaj teen ca in beet u yilic tuláacale' bix u dzo'ocpajal u ta'acbil tuucul Ku. Junab Ku, máax beet tuláacal ba'ale', tu ta'acaj le tuucula' ti' le úuchben kiino'obo'. 10J úuch beyo', u ti'al ca dza'abac ojéeltbil bejela'e' ti' tuláacal u páajtalilo'ob yéetel u jalachilo'ob ca'an, tu yo'olal le iglesiao', u jejeláas u na'at Ku. 11Kue' tu beetaj lela' queet yéetel le tuucul mina'an u xuul tu dzo'ocbesaj ti' Yuumtzil Jesucristoo'. 12Ti' Cristoe' jáalkabo'ob u ti'al c nadzicbáa ti' Yuum Ku yéetel le alab óolal yaan to'on ti' leti'o'. 13Tu yo'olal lela', quin káaj óoltic ti' te'exe' ma' u lúubul a wóolale'ex, tumen lela' tu jaajile' jun p'éel nojbe'enil a ti'al te'ex. 14Tu yo'olal lela', quin xoltal tu táan u taata c Yuumtzil Jesucristo, 15ti' máax cu kamic u kaaba' tuláacal láaktzilo'ob te j ca'ano' bey xan ti' le lu'uma'. 16Quin káat óoltic ti' le taatao' je'el bix u nojbe'enil ayikalile' ca u chupe'ex yéetel páajtalil bey xan yéetel muuk tu yo'olal u Quili'ich Pixan, 17ca cajlac Cristo ta pucsi'ikale'ex tu yo'olal ocsaj óolal u ti'al ca jéedzque'ex ti' yaacunaj yéetel ca taamchajac a mootze'ex, 18u ti'al beyo' ca páatac a na'atique'ex ma'alob yéetel tuláacal le j ocsaj óolo'obo' buca'aj cóochil, buca'aj chowaquil, buca'aj taamil yéetel buca'aj ca'anlil u yaacunaj Cristo. 19Quin káatic túun ca a kaj óolte'ex le yaacunajo', ba'ax mas nojoch ti' tuláacal ba'ax cu páajtal u kaj óolta'al, u ti'al beyo' ca chu'upuque'ex ma'alob yéetel Ku. 20Beoraa' nojbe'enil ti' Ku, máax yaan páajtalil ti' u ti'al u beetic u mas ya'abil ti' le ba'ax c káatico' wa c tucultico' tu yo'olal u páajtalil cu meyaj ti' to'on. 21¡Nojbe'enil u ti'al Ku ti' le iglesiao' yéetel ti' Cristo Jesús, tu yo'olal tuláacal kiino'ob mina'an u xuul! Amén.


Copyright
Learn More

will be added

X\