Efesios 2

1Kue' tu dzaj u cuxtal ti' te'ex jun múuch' yéetel Cristo, quex quimene'ex ca'ach tu yo'olal le kasa'anilo'obo' yéetel le kebano'obo', 2ichil tu'ux cuxa'ane'ex ca'acho', iquil a beetique'ex le ba'ax cu beetic le yóokolcaaba' yéetel a dzo'ocbesique'ex u yóolal kaasil ba'al máax cu meyaj ti' le máaxo'ob ma' tu yu'ubico'ob u t'aan Kuo'. 3Tuláacalo'on bey cuxlico'on ca'ach ti' le kiino'ob dzo'oc u máano'obo', táan c bin ca'ach tu paach c dzíibolalo'ob yéetel táan c dzo'ocbesic ba'ax u káat c bakel yéetel c tuucul. Le o'olal c najmatic ca'ach u yaayaj jaadz Ku je'el bix u láako'obo'. 4Ba'ale' Kue' jach nojoch u ch'a'a óotzilil, yéetel tu jach yaabilto'one' 5ca tu dzaj to'on cuxtal jun múuch' yéetel Cristo, quex láili' quimeno'on ca'ach yéetel c kebano'obe'. Bey túuno', tu yo'olal u siibal utzil Kue' te'exe' toca'ane'ex. 6Kue' tu ca'a púut cuxquinto'on xan jun múuch' yéetel Cristo Jesús ca tu beetaj c cutal tu yéetel ti' ca'anil cúuchilo'ob. 7Tu beeta'al lela' u ti'al u ye'esic ti' le kiino'ob bíin taalaco' u sen ya'abil u ayikalil u siibal utzil yéetel u yutzil c ti'al to'on ti' Cristo Jesús. 8Tumen tu yo'olal u siibal Kue' te'exe' dzo'oc a to'ocole'ex, tu yo'olal le ocsaj óolalo'. Lela' ma' jun p'éel ba'al ta beetaje'ex te'exi', ba'ale' jun p'éel ba'al j dza'ab ti' te'ex tumen Ku. 9Ma' tu yo'olal wa ba'ax ca u beet máaqui', beyo' mix máac cu páajtal u ca'analtal u yich. 10Tumen Ku máax beeto'on; tu beetajo'on ti' Cristo Jesús u ti'al ca c beet ma'alob meyajo'ob, je'el bix u yáax nu'uctmaj leti'o' u ti'al ca c dzo'ocbese. 11Bey túuno', ka'ajac te'ex bixe'ex ca'achi. Ma' ti' u caajal le judíob a taale'exo'; le o'olal le judíob máaxo'ob cu súut kuptico'ob máac tu wíinclilo' yéetel cu ya'alicuba'ob máaxo'ob súutkupta'ano'obo', cu ya'alico'obe' te'ex le máaxo'ob ma' súutkupta'ano'obo'. 12Ti' le kiino'obo' te'exe' mina'ane'ex ca'ach ti' Cristo, jun páaycunta'ane'ex ti' u caajil Israel, yéetel ma' a kaj óole'ex le nup t'aano'obo' mix u dzaa t'aan Ku. Cuxa'ane'ex ca'ach tu yóokol le lu'uma' x ma' alab óolalil yéetel x ma' Kuil. 13Ba'ale' bejela'e', tumen nupa'ane'ex ti' Cristo Jesuse', te'ex náach yane'ex ca'ache' dzo'oc a náadzale'ex tu yo'olal quíimic Cristo. 14Cristoe' leti' c jéedzel. Leti' tu nupaj le judíob yéetel ma' judíobo' ti' jun p'éelili' caaj, tumen tu nicaj le pak jatzico'ob ca'acho'. 15Ti' u wíinclile' tu xu'ulsaj le a'almaj t'aano'ob cu ya'alico'ob chéen tusbelo'ob yéetel tzolbe'en t'aano'ob, ca tu beetaj yéetel le ca'a p'éel caajo' jun p'éelili' túumben caaj nupa'an ti' leti'. Bey tu beetilac le jéedzelo'. 16Beya' Cristoe' tu yo'olal quíimic ti' cruze' tu xu'ulsaj le ba'atelo'ob yaan ca'ach ichil le ca'a p'éel caajo' ca tu dzajo'ob ich jéedzel tu táan Ku, táan u beetic beyo' jun p'éelili' wíinclil tu yéetelo'ob. 17Cristoe' j taale' ca tu tze'ectaj u ma'alob péectzilil jéedzel ti' tuláacal, ti' te'ex máaxe'ex náach yanile'ex ca'acho' bey xan ti' le judíob máaxo'ob naadz yanilo'obo'. 18Tumen tu yo'olal Cristoe' tuláacal, quex judion wa ma'e', c nadzicbáa ti' le taatao' tu jun túulili' Quili'ich Pixan. 19Tu yo'olal lela' te'exe' ma' táanxel lu'umile'exi' ti' jun p'éel lu'um ma' a ti'ale'exi', ba'ale' éet caajile'ex yéetel tuláacal le máaxo'ob u ti'alo'ob Kuo'. 20Te'exe' beye'ex jun p'éel pakil naje'; dza'ane'ex tu yóokol le chuun pak dzaab tumen le apóstolo'ob yéetel le aj bóobato'obo', yéetel Jesucristoe' leti' u noj tuunichil le chuun pako'. 21Tu yóokol máax tuláacal le najo' beeta'an jach ma'alob, yéetel táan u líikil tac quéen kuchuc béeytal jun p'éel templo kuba'an yéetel nupa'an ti' Yuumtzile'. 22Bey xan te'ex nupa'ane'ex ti' Cristo, táan xan a nu'upule'ex yéetel le u láako'obo' u ti'al ca ku'ubuque'ex béeytal jun p'éel naj tu'ux caja'an Ku tu yo'olal Quili'ich Pixane'.


Copyright
Learn More

will be added

X\