Hechos 21

1Le ca t p'ataj le sucu'uno'obo', j ooco'on ti' le cheemo' ca j bino'on jun táadz tac Cos, tu jeel kiine' tac Rodas, cu dzo'ocole' tac Pátara. 2Pátarae' t ilaj jun p'éel cheem táan u bin tac Fenicia, j ooco'oni' ca j bino'on. 3U ti'al c máanbale' t ilaj u petenil Chipre t p'ataj x dzíic kabile' ca j bino'on tac Siria. Tumen le cheemo' yaan u pa'atic cuuch tu jáal ka'anbil Tiroe' j ooco'on te'elo'. 4T ilaj le ocsaj óolo'obo' ca p'áato'on siete kiino'ob tu yéetelo'ob; leti'ob túune', tu yo'olal j dzaab u yojéelto'ob tumen Quili'ich Pixane' tu ya'alajo'ob ti' Pablo ma' unaj u bin Jerusaleni'. 5Ba'ale' le ca j máan le siete kiino'obo' jóoko'on. Tuláacal le ocsaj óolo'obo', yéetel u yatano'ob bey xan u paalalo'obe', tuláakinto'ono'ob tac jo'ol caaj; te tu jáal le ja'o' xolajo'one' ca j payalchi'inajo'on. 6Cu dzo'ocole' t méeko'ob jujun túulile' ca j na'aco'on te j cheemo', leti'ob túune' j suunajo'ob tu taanajo'ob. 7J luko'on Tiroe' ca j bino'on ti' cheem tac Tolemaida, te'elo' t tzicaj le sucu'uno'obo' ca j p'áato'on jun p'éel kiin yéetelo'ob. 8Tu jeel kiine' Pablo yéetel máaxo'on yano'on yéetelo' jóokone' ca j bino'on tu caajil Cesarea. Te'elo' j ooco'on tu yotoch Felipe le aj tze'ec ma'alob péectzilo', jun túul ti' le siete diacono'obo', ca j p'áato'on tu yéetel. 9Felipee' yaan can túul u ch'upul paalal ma' dzoca'an u beelo'obi', máaxo'ob cu dzáico'ob péectzilo'ob cu kamico'ob ti' Ku. 10Cu dzo'ocol c antal dze'edzec kiino'ob te'elo' j kuch jun túul profeta Judea u taal, u kaaba'e' Agabo', 11ca j taal u xíimbalto'on. Tu ch'a'aj u kaxnak Pabloe' ca tu kaxaj u yooco'ob bey xan u kaabo'ob tu yéetel, táan u ya'alic: Quili'ich Pixane' cu ya'alique' bey cu bin j kaxbil tu noj caajil Jerusalén tumen le judíob u yuumil le kaxnaka', cu dzo'ocole' cu kubico'ob tu kab táanxel lu'umil máaco'ob. 12Le ca t u'uyaj lela', to'on yéetel le Cesareailo'obo' tu káat óoltajo'ob ti' Pablo ma' u bin Jerusalén. 13Ba'ale' Pabloe' tu núucaj: ¿Ba'axten ca wokole'ex yéetel ca okom óolquintiquene'ex? Tumen tene' in dzaamaj in wóol u ti'al ma' chéen ca kaxa'aqueni', ba'ale' tac u ti'al quíimil Jerusalén tu yo'olal Yuumtzil Jesús. 14Tumen ma' páatchaj c kexic u tuucule', t p'ataj táan c a'alic: Beetchajac u yóolal Yuumtzil. 15Cu dzo'ocol lela' t líiksabae' ca j bino'on Jerusalén. 16Tu láakinto'on dze'edzec j ocsaj óolo'ob Cesareailo'ob, ichilo'one' ti' yaan jun túul máac Chipreil Mnasón u kaaba', leti'e' dzo'oc u máan kin ocsaj óolnac, tu yotoch cu bin j dzaabil to'on tu'ux c je'elel. 17Le ca j kucho'on Jerusalene' j ka'amo'on yéetel qui'imac óol tumen le sucu'uno'obo'. 18Tu jeel kiine' Pabloe' j bin t éetele' u xíimbalt Jacobo, ti' yano'ob xan tuláacal le anciano'obo'. 19Pabloe' tu tzicajo'obe' ca tu tzicbaltaj ti'ob jujun p'éelil le ba'alo'ob tu beetaj Ku tu yo'olal leti'o' ichil le máaco'ob ma' judíobo'. 20Le ca tu yu'ubajo'obe' tu qui'iqui' t'anto'ob Ku. Tu ya'alajo'ob túun ti' Pablo: Ma'alob, sucu'un, ba'ale' táan a wilique' ichil le judíobo' táaj ya'ab dzo'oc u ocsaj óolo'obi', ya'ab ichilo'obe' táan u ya'alico'obe' kabéet u dzo'ocbesa'al u ya'almaj t'aan Moisés. 21Dzo'oc u yu'ubico'ob u ya'ala'ale' tech bine' táan a ca'ansic ti' le judíob caja'ano'ob táanxel lu'umo'obe', ma' u dzo'ocbesico'ob ba'ax tu ya'alaj Moisés, ca wa'alic bin xan ti'obe' ma' unaj u súut kuptic u paalalo'obi', mix u beetico'ob ba'ax suuca'an u beetic le judíobo'. 22¿Bix yanil le ba'alo'oba'? Tumen le máaco'obo' yaan u much'talo'ob le quéen u yojéelto'ob dzo'oc a taal. 23Beet túun le ba'ax quin in wa'al techa': Yaan way ichilo'one' can túul máaco'ob bin u ca'aj u tzocbeso'ob ba'ax u ya'almajo'ob u beetico'ob. 24Biso'ob ta wéetel, p'o'abáa yéetelo'ob ca a bo'ot le ba'ax cun u xupo'obo', cu dzo'ocole' leti'obe' cu páajtal u ko'osol u poolo'ob. Beyo' tuláacal cun ilic ma' jaaj le ba'ax cu ya'ala'al ta wo'olalo', ba'ale' yaan u ya'alico'ob tac teech ca beetic le ba'ax cu ya'alic le a'almajt'aano'. 25Ba'ale' ti' le máaxo'ob ma' judíobo' yéetel le dzo'oc u yocsaj óolo'obo', dzo'oc c dzíibtic ti'obe' ma' kabéet ca u beeto'ob le ba'alo'oba', chéen ma' u jaantico'ob bak dzo'oc u dza'abal tu táan beetbil kuo'ob, mix ki'ik, mix u bakel ba'alche'ob cup iikil quíimico'ob, yéetel mix máac ca nup kebanchajac. 26Pabloe' tu bisaj túun le can túul máaco'obo'; tu jeel kiine' tu p'o'ojubáa yéetelo'ob, cu dzo'ocole' j ooc ich kulnaje' u ti'al ca u ya'al ba'ax kiin quéen dzo'ococ le p'o'obáilo', u káat u ya'ale' ba'ax kiin quéen u taaso'ob u siibalo'ob tu jujun túulilo'ob. 27Ba'ale' táan u taal u dzo'ocol le siete kiino'obo', cajila'ab Pablo tumen dze'edzec judíob u taalo'ob tu lu'umil Asia, ca tu p'u'usajo'ob u yóol tuláacal le máaco'obo'. Tu puljuba'ob tu yóokol Pabloe', 28ca tu yaawtajo'ob: ¡U cajnáalile'ex u lu'umil Israel áanto'one'exi'! Lela' leti' le máac cu máan tuláacal tu'ux táan u ca'ansic máaco'ob tu contra c caajal, tu contra u ya'almaj t'aan Moisés yéetel tu contra le kulnaja'; tu yóokol lela' dzo'oc u yocsic ich kulnaj dze'edzec griego'ob, beyo' táan u kascuntic le quili'ich cúuchila'. 29Tu ya'alajo'ob lela' tumen tu yilalajo'ob táan u máan Pablo ich caaj yéetel Trófimo, jun túul Efesoil, ca tu tucultajo'obe' dzo'oc u yocsic ich kulnaj xan. 30Tuláacal le caajo' j p'u'uj u yóol j taalo'ob áalcabile', tu machajo'ob Pabloe' ca tu jíiltajo'ob paachil ti' le kulnaj, ca tu tzáan kalto'ob le jool najo'ob tu séeblaquilo'. 31Tu yóoltajo'ob u quiimso'ob, le ca j kuch u péectzilil le ba'alo'ob tu xiquin u méektáan le aj ba'atelo'obo', tu yojéeltaje' tuláacal Jerusalén p'u'uj u yóol. 32U méektáan le aj ba'atelo'obo' tu t'anaj u aj ba'atelo'ob yéetel u yáantajo'obe' ca j bin áalcabil tac tu'ux yaan le máaco'obo'. Leti'obe' le ca tu yilajo'ob u méektáan le aj ba'atelo'ob yéetel u aj ba'atelo'obe' ca j xu'ul u jadzico'ob Pablo. 33U méektáan le aj ba'atelo'obo' tu nadzubae', tu machaj Pabloe' ca tu ya'alaj ca ka'axac yéetel ca'a p'éel cadena; cu dzo'ocole' tu káataj máaxi' yéetel ba'ax u beetmaj. 34Ba'ale' le máaco'obo' tu yaawtajo'ob jejeláas ba'alo'ob, le o'olale' u méektáan le aj ba'atelo'obo' ma' páajtji u na'atic mix ba'ali'. Tu yo'olal táan u sen yawato'obe', tu túuxtaj ca bisa'ac Pablo tu chúumuc le najo'. 35Le ca j kucho'ob tac te tu'ux cu na'acal máac te j najo', le aj ba'atelo'obo' yanchaj u cuchico'ob Pablo tu yo'olal u sen p'uja'anil le máaco'obo'; 36tumen tuláacalo'ob táan u taalo'ob paachil táan u yaawtico'ob: ¡Quíimsa'ac! 37Bin u ca'aj ocsbil Pablo te chúumuc le najo', ca tu ya'alaj ti' u méektáan le aj ba'atelo'obo': ¿Cu páajtal in wa'alic wa ba'ax? U méektáan le aj ba'atelo'obo' tu núucaj ti': ¿A wojel t'aan ich griego? 38Bey túuno' ¿Ma' teech wa le Egiptoil tu cáajsaj jun p'éel ba'atel ma' úuch'ia' ca tu jóokesaj cuatro mil quiimsaj wíinico'ob te x tocoy lu'umo? 39Pablo túune' tu ya'alaj ti': Tene' judíoen, u cajnáalilen Tarso, jun p'éel nojoch caaj ti' u lu'umil Cilicia; beet utz a cha'ic in t'aan yéetel le máaco'oba'. 40U méektáan le aj ba'atelo'obo' tu cha'aj ti'; ca wa'aljaj Pablo te tu'ux cu na'acal máaco', ca tu beetaj u kab ti' le máaco'obo' u ti'al ca u maco'ob u chi'ob. Le ca tu mac u chi'obe' t'aanaj tu yéetelo'ob ich hebreo, táan u ya'alic:


Copyright
Learn More

will be added

X\