Hechos 19

1Ca'aliquil ti' yaan Apolos Corintoe', Pabloe' j máan ti' le caajo'ob yaano'ob te j pu'uco'obo' ca j kuch Efeso', tu'ux tu yilaj dze'edzec j ocsaj óolo'ob. 2Ca tu káat chi'itaj ti'ob: ¿Ta kamaje'ex wa Quili'ich Pixan le ca j ocsaj óolnaje'exo'? Ca tu núucajo'ob ti': Mix c u'uymaj wa yaan Quili'ich Pixani'. 3Pablo túune' tu káat chi'itaj ti'ob: ¿Ba'ax ocja'il ta kamaje'ex? Leti'obe' tu núucajo'ob: u dzaa ocja' Juan. 4Pabloe' tu ya'alaj ti'ob: Bey; Juane' tu dzáa u yocja' ti' le máaxo'ob tu kexaj u tuuculo'obo', ba'ale' tu ya'alaj ti'obe' unaj u yocsajóoltico'ob le máax cu taal paachil ti'ob; u káat u ya'ale' Jesús le Cristo'. 5Le ca tu yu'ubajo'ob lela', ocja'anajo'ob tu kaaba' Yuumtzil Jesús. 6Le ca tu dzaj Pablo u kab tu yóokolo'obe', Quili'ich Pixane' j taal tu yóokolo'ob, ca j t'aanajo'ob ti' jejeláas t'aano'ob ca tu tzicbaltajo'ob péectzilo'ob tu kamajo'ob ti' Ku. 7Tu láacalo'obe' míin doce máaco'ob. 8Tu yáam óox p'éel winalo'ob j bin Pablo te j sinagogao' tu'ux tze'ecnaj yéetel kuba'an óolal, tu'ux t'aanaj yéetel tu beetaj u yila'al ma'alo'ob u ajawil Ku tumen le máaco'obo'. 9Ba'ale' dze'edzec tu dzu'uyquintajo'ob u pucsi'ikalo'ob, ma' tu yóoltajo'ob u yocsaj óolto'obi'; ba'ale' j t'aanajo'ob kaas tuyo'olal le ma'alob péectzilo' tu táan le máaco'obo'. Pablo túune' tu tzelubáa ti'obe' ca tu bisaj le ocsaj óolo'obo' tu najil tu'ux cu ca'ansaj jun túul máac u kaaba'e' Tirano', te j t'aanaj sáamsamali'. 10Bey tu beetilac ca'a p'éel ja'abo'ob. Bey túuno' tuláacal le máaxo'ob caja'ano'ob Asiao' tu yu'ubajo'ob u ma'alob péectzil Jesús le judíobo' bey xan le ma' judíobo'. 11Kue' tu beetaj nojoch chíiculalo'ob tu kab Pablo', 12tac le mejen nooko'ob wa le búuco'ob u cóojol tu wíinclilo' cu bisa'alo'ob ti' le koja'ano'obo', le lo'oba' cu yutztalo'ob, tac le kaakas pixano'ob cu jóokolo'ob ti'ob 13Ba'ale' dze'edzec chéen máanel judíob cu jóoksico'ob kaakas pixano'ob ti' máaco'obe', tu yóoltajo'ob u t'aano'ob u kaaba' Yuumtzil Jesús u ti'al u jóokesico'ob. Tu ya'alajo'ob ti' le kaakas pixano'obo': Quin wa'alic ti' te'ex ca jóokoque'ex tu kaaba' Jesús le máax cu tze'ecta'al tumen Pabloo'. 14Bey cu beetico'ob u siete paalalo'ob jun túul judío u kaaba'e' Esceba, máax u nojochil le j kiino'obo'. 15Ba'ale' le ca tu beetajo'obe', le kaakas pixano' tu núucaj ti'ob: In kaj óol Jesús, in wojel máax Pablo; ba'ale' te'exe' ¿máaxe'ex? 16Yéetel lela' le máax yaan le kaakas pixan ti'o' tu pulajubáa tu yóokolo'obe' ca tu láaj lúubsajo'ob yéetel muuk, ca tu ko'okolajo'ob yéetel nojoch kuuxile' ca yanji u púudzulo'ob ti' le najo', x ma' nookil yéetel quimbesa'ano'ob. 17Tuláacal le caja'ano'ob Efeso', judíob yéetel ma' judíobo', tu yojéeltajo'ob lela', ca tu ch'a'ajo'ob nojoch sajaquil, ca tu nojbe'encunso'ob u kaaba' Yuumtzil Jesús. 18Bey xan ya'ab ti' le cu yocsaj óolo'obo' j taalo'ob táan u cáantico'ob le kaakas ba'alo'ob cu beetico'ob ca'acho'. 19Bey xan ya'ab ti' le máaxo'ob j pulya'ajo'ob ca'acho' tutaasajo'ob u ju'unilo'ob le pulya'ajo' ca tu tóocajo'ob tu táan tuláacal. Le ca j ila'ab buca'aj u tojol le ju'uno'obo', j kuch yáam míin cincuenta mil u taakinil plata. 20Bey cu bin u jaycubáa u t'aan Yuumtzil yéetel cu ye'esic páajtalil. 21Cu dzo'ocol le ba'alo'oba' Pabloe' tu tucultaj u xíimbaltic u lu'umilo'ob Macedonia yéetel Acaya, ca j bin tac Jerusalén. Bey xan tu ya'alaj: Cu dzo'ocol in bin Jerusalene' unaj in bin xan tac Roma. 22Tu túuxtaj túun Mecedonia ca'a túul u yáantajo'ob, Timoteo yéetel Erasto, ca'aliquil u p'áatal leti' dze'edzec kiino'ob Asia. 23Ti' le kiino' yanji jun p'éel nojoch wo'och' táanbal tu yo'olal le péectzilo'. 24Lela' beeta'ab tumen jun túul máac u kaaba'e' Demetrio, máax cu meyajtic plata. Le máaca' cu beetic mejen kulnajo'ob yéetel plata je'el bix u kulnaji x co'olebil Dianae', lela' cu dzáic ya'ab náajal ti' le máaxo'ob cu meyajo'ob tu yéetelo'. 25Tu much'quintaj túun le máaxo'ob cu meyajo'ob tu yéetelo' bey xan le máaxo'ob cu beetico'ob meyajo'ob je'el bix leti'obo', ca tu ya'alajo'ob ti'ob: Xiibe'ex, te'exe' a wojele'ex yéetel le meyaja' ma'alob c cuxtal; 26ba'ale' je'el bix a wilique'ex yéetel a wu'uyique'exe' le j Pabloa' táan u máan u ya'ale' le kuo'ob cu beeta'al tumen wíinico'obe' ma' kuobi'; bey túuno' dzo'oc u beetic u kexic u tuucul ya'abcach máaco'ob ma' chéen way Efesoe' ba'ale' míin tac tuláacal u lu'umil Asia. 27Lela' jach sajbe'entzil, tumen le c meyaja' cu páajtal u kastal to'on, bey xan u kulnajil le le nojoch x co'olebil Dianao' cu páajtal u sa'atal u nojochil, bey túuno' cu páajtal u p'ecta'al u nojochil le x co'olebila' cu kulta'al ti' tuláacal u lu'umil Asia yéetel ti' u túulisil u yóokolcaab. 28Le ca tu yu'ubajo'ob lela', jach p'u'ujo'obe' ca jo'op' u yaawtico'ob: ¡Nojoch u Dianail le Efesioio'obo'! 29Sa'at u yóol tuláacal le caajo'. Tu puljuba'ob tu yóokol Gallo yéetel Aristarco, ca'a túul Macedonioilo'ob tu láakintajo'ob Pablo, ca tu jíiltajo'ob tac te j cúuchil tu'ux cu much'tal le caajo'. 30Pabloe' tu yóoltaj ocol te'elo' u ti'al j t'aan tu yéetel le máaco'obo', ba'ale' le ocsaj óolo'obo' ma' tu cha'ajo'ob ti'. 31Bey xan dze'edzec ti' u jalach nuuquilo'ob Asiae', máaxo'ob ma'alob u bisicuba'ob yéetel Pabloe', tu túuxtajo'ob a'albil ti'e' ma' unaj u yocol te'elo'. 32Ca'aliquile', le tu'ux much'ucbalo'obo', dze'edzeque' cu yaawtico'ob jun p'éel ba'al, u láako'obe' cu yaawtico'ob u láak ba'al, tumen le máaco'obo' p'uujul u yóolo'ob, yéetel u jach ya'abile' mix u yojelo'ob ba'ax óolal much'lajo'obi'. 33Ba'ale' dze'edzec ti' le yano'ob ichil le máaco'obo' tu tzolajo'ob ti' Alejandroe' le ba'ax cu yúuchulo', máax léech'inta'ab tumen le judíobo' tu táan tuláacal, Alejandroe' tu beetaj u kab ti' le máaco'obo' u ti'al ca u mac u chi'ob, tumen tu yojéeltaj j t'aan tu yo'olal le judiobo'. 34Ba'ale' le ca tu kaj óoltajo'ob judíoe', tuláacal j awatnajo'ob tu yo'olal míin ca'a p'éel hora: ¡Nojoch u Dianail le Efesioobo'! 35U aj dzíibil le caajo' le ca páajtji u jedzic u yóolo'ob le máaco'obo' tu ya'alaj: U cajnáalile'ex Efeso, tuláacal yóokolcaab u yoojel le u caajil Efesoa' dza'an u ti'al u canant u kulnajil le nojoch x co'olebil Dianao' yéetel le u yoochel ca'an u taalo'. 36Tumen mix máac cu páajtal u ya'alic wa ma' jaaj lela'. Jedzcuntaba'ex túun yéetel ma' a beetique'ex mix ba'al ma' a ma'alob tucultmaje'exi'. 37Tumen le máaco'ob dzo'oc a taasique'exa', ma' u poch'o'ob mix t'aanaco'ob kaas tu contra a kuexi'. 38Wa Demetrio yéetel le máaxo'ob cu meyajo'ob tu yéetel yaan ti'ob wa ba'ax tu contra wa máaxe', le o'olal yaan u kiinilo'ob p'isóolal, yaan xan jalach wíinico'ob cu páajtal u t'aano'ob tu táano'obe' u ti'al u ya'alo'ob ba'ax u káato'ob. 39Wa yaanal ba'ax a káate'exe' unaj u yila'al ti' jun múuch' caa, ca beeta'ac tu beel. 40tumen sajbe'entzil u ta'acal c pool ca a'ala'ac j líiksaj ba'atelo'on tu yo'olal le ba'al dzo'oc u yúuchul bejela'o', tumen mina'an mix ba'al c a'al tu yo'olal le wo'och'táanbala'. 41Cu dzo'ocol u ya'alic lela' tu ya'alaj ti'ob ca xi'ico'ob.


Copyright
Learn More

will be added

X\