Hechos 17

1Ca'aliquil táan u bino'obe', Pablo yéetel Silase' j máano'ob Anfípolis yéetel Apolonia; cu dzo'ocole' j kucho'ob tu caajil Tesalónica, tu'ux yaan jun p'éel u sinagoga le judíobo'. 2Pablo, je'el bix suuc u beetique', j bin te j sinagogao' ca j t'aanaj tu yéetelo'ob ti' óox p'éel sábado. 3Tu tzolaj ti'ob yéetel le Quili'ich Dzíibo'obo' le Cristoo' kabéetchaj u mukyaj, cu dzo'ocol u quíimile' yanchaj u ca'a púut cuxtal. Tu ya'alaj ti'ob: Le Jesús quin tze'ectic ti' te'exa' leti' le Cristoo'. 4Dze'edzec túun ti' le judíobo' ocsaj óolnajo'ob, ca tu nupajuba'ob ti' Pablo yéetel Silas. Bey xan ocsaj óolnaj ya'abcach griego'ob máaxo'ob cu kultico'ob Ku, bey xan ya'abcach xuunáano'ob. 5Ba'ale' tu yo'olal lela' yaachaj u yóol le judíob ma' ocsaj óolnajo'obo', máaxo'ob tu much'quintajo'ob dze'edzec kasa'an máaco'ob chéen táan u máanno'ob xíimbal ich caaj, ca tu beetajo'ob jun p'éel wo'och'lantáanbail ca tu p'u'ujsajo'ob u yóol le caajo'. J ooco'ob tu yotoch Jasón táan u caxtico'ob Pablo yéetel Silas u ti'al u jóoksico'ob ca u kubo'ob ti' le caajo'. 6Ba'ale' tumen ma' tu caxtajo'obe' tu jíiltajo'ob Jasón yéetel u láak dze'edzec sucu'uno'obe' tac tu táan u jalach wíiniquilo'ob le caajo', ca tu yaawtajo'ob: Le máaco'oba', máaxo'ob dzo'oc u p'u'ujsico'ob u yóol tuláacal u yóokolcaabe', dzo'oc u kuchulo'ob tac waye'. 7Dzo'oc u ka'amalo'ob tumen Jasón tu yotoch. Tuláacalo'ob táan u beetico'ob jela'an ti' ba'ax cu ya'alic u ya'almaj t'aan César, tumen táan u ya'alico'obe' yaan u láak ajaw, u kaaba'e' Jesús. 8Le ca tu yu'ubajo'ob lela', le máaco'ob yéetel le jalach wíinico'obo' j p'u'ujo'ob. 9Ba'ale' Jasón yéetel le u láako'obe' j bo'olnajo'obe' ca jáalkabta'abo'ob. 10Tu séeblaquil le sucu'uno'obo' tu beetajo'ob u jóokol Pablo yéetel Silas yéetel áakabe' u ti'al u bino'ob Berea. Le ca j kucho'obe' j bino'ob tu sinagoga le judíobo'. 11Le judíoba' mas utz u pucsi'ikalo'ob ti' le yano'ob Tesalonicao', tumen tu kamajo'ob le ma'alo'ob péectzilo' yéetel qui'imac óolal, táan u caxtico'ob sáamsamal ti' le Quili'ich Dzíibo'obo' u ti'al u yilico'ob wa jaaj ba'ax cu ya'ala'al ti'obo'. 12Bey túuno' ya'ab ti' leti'ob ocsaj óolnajo'ob, bey xan ichil le griego'obo' ya'ab ocsaj óolnajo'obi', xuunáano'ob bey xan j xiibo'ob. 13Ba'ale' le judíob yano'ob Tesalonicao', le ca tu yojéeltajo'ob táan u tze'ectal u ma'alob péectzil Ku Berea tumen Pabloe', j bino'ob te'elo' ca tu p'u'ujsajo'ob u yóol le máaco'obo'. 14Ba'ale' le sucu'uno'obo' tu túuxtajo'ob Pablo tu séeblaquil u ti'al ca xi'ic tu jáal ja', ca'aliquil Silas yéetel Timoteoe' j p'áato'ob Berea. 15Le máaxo'ob tu láakintajo'ob Pabloe' tu bisajo'ob tac tu caajil Atenas. Cu dzo'ocole' j suunajo'ob yéetel kuben t'aano'ob u ti'al ca u nupuba'ob Silas yéetel Timoteo tu yéetel tu séeblaquil. 16Ca'aliquil Pablo táan u pa'atic Silas yéetel Timoteo Atenase', jach yaachaj u yóol le ca tu yilaj le caaj chuup yéetel beetbil kuob. 17Le o'olale', j t'aanaj yéetel le judíob te j sinagogao' bey xan yéetel u láako'ob cu kultico'ob Ku, t'aanaj xan sáamsamal yéetel le máaxo'ob cu much'icuba'ob kíiwico'. 18Dze'edzec ti' u j ca'anbesajil le epicúreobo', yéetel ti' le estoico'obo', jo'op' u t'aano'ob tu yéetel. Yane' tu ya'alaj: ¿Ba'ax u káat u ya'al to'on le máac ya'ab u t'aana'? U láako'obe' tu ya'alajo'ob: Bey jun túul máac cu tze'ectic u láak kuobe'. Lela' tu ya'alajo'obe' tumen Pabloe' táan u tze'ectic ti'ob u ma'alob péectzil Jesús yéetel le ca'a púut cuxtalo'. 19Tu bisajo'ob túun ti' jun p'éel cúuchil cu kaaba'intic Aereópago, tu'ux suuc u much'talo'ob u ti'al tzicbale', ca tu káat chi'tajo'ob ti': ¿Cu páajtal wa c ojéeltic ba'ax le túumben ca'ansajo'ob ca taasica'? 20tumen táan a wa'alic to'on ba'alo'ob jela'antac, le o'olale' c káat ojéelt ba'ax u káat u ya'al le ba'alo'oba'. 21Tumen tuláacal le yano'ob Atenaso', bey xan le táanxel lu'umilo'ob yano'ob te'elo', ma' tu dzáic u yóolo'ob ti' u láak ba'al wa ma' chéen u yu'ubico'ob yéetel u ya'alico'ob wa ba'ax túumben. 22Pablo túune' wa'alaj chúumuc ti'ob te j Aereópago, ca tu ya'alaj ti'ob: Atenasile'ex, ti' tuláacal ba'al quin wilique' te'exe' jach a dzaamaj a tuucule'ex ti' le kuobo'. 23Tumen le ca j máanen in wil le cúuchilo'ob tu'ux ca kultaje'exo', tin wilaj jun p'éel u cúuchil kultaj tu'ux dzíibta'an le t'aano'oba': Ti' le Ku ma' kaj óola'ano'. Le Ku ca kultique'ex quex ma' a kajóole'exo', leti' le Ku quin tze'ectic ti' te'exo'. 24Le Ku máax beet yóokolcaab yéetel tuláacal le ba'alo'ob yano'obo', leti' u yuumil ca'an yéetel lu'um. Ma' caja'an ti' najo'ob beeta'an tumen máaco'obi. 25Mix kabéet ti'e' le ba'axo'ob cu páajtal u beetic wíinic tu yo'olali', tumen leti' máax dzáic to'on le cuxtalo', le iiko', yéetel tuláacal ba'al. 26Ti' jun p'e'elili' ki'ik tu beetaj tuláacal máaco'ob, u ti'al ca cajlaco'ob ti' tuláacal yóokolcaab, yéetel tu dzaj le kiino'ob yéetel le cúuchilo'ob tu'ux unaj u cajtalo'ob, 27u ti'al u caxtico'ob Ku, wa cu páajtal u caxtico'ob táan u t'at'alkabo'obe', quex tu jaajile' Kue' ma' náach yanil ti' jujun túul ti' to'oni'. 28Tumen ti' Ku cuxa'ano'on, ti' leti' c péec yéetel ti' leti' yano'on; je'el bix xan tu ya'alaj wa jay túul ti' a j kay t'aane'exe': To'one' u ch'i'ibalo'on xan Ku. 29Wa u ch'i'ibalo'on Kue' ma' unaj c tucultic wa Kue' bey je'el bix wa ba'ax beeta'an tumen máaco'ob yéetel oro, plata wa tuunich, je'el bix cu tucultico'obe'. 30Kue' tu mukyajtaj u x ma' na'atil máaco'ob ti' le úuchben kiino'obo', ba'ale' bejela'e' cu ya'alic ti' tuláacal máac ti' tuláacal tu'uxe', ca u kex u tuuculo'ob. 31Tumen Kue' u dzaamaj jun p'éel kiin iquil cu bin u p'isóolt yóokolcaab yéetel tojil, tu yo'olal jun túul máac u yéeymaj; lela' tu jaajcuntaj tu táan tuláacal máac iquil tu ca'a púut cuxquintilac ichil le quimeno'obo'. 32Le ca tu yu'ubajo'ob u t'aan tu yo'olal le ca'a púut cuxtalo', dze'edzeque' tu p'a'astajo'ob, u láako'obe' tu ya'alajo'ob: je'el c u'uyic a t'aan tu yo'olal lela' tu láak kiine'. 33Pablo túune' tu p'atajo'ob. 34Ba'ale' dze'edzec máaco'ob j bino'ob tu paach ca ocsajóolnajo'ob. Ichilo'obe' ti' yaan Dionicio, máax jun túul ti' le cu much'talo'ob ti' le Aereópago', bey xan jun túul co'olel u kaaba'e' Dámaris, yéetel u láak dze'edzec máaco'ob.


Copyright
Learn More

will be added

X\