Hechos 15

1Ti' le kiino'obo' dze'edzec máaco'ob j luko'ob Judea ca j bino'ob Antioquíae' jo'op' u ca'ansico'ob le sucu'uno'obo', táan uya'alico'ob: Wa ma' ta súut kuptcaba'ex je'el bix tu ya'alajil Moisese' ma' tu páajtal a to'ocole'ex. 2Pablo yéetel Bernabee' sen t'anal t'aanajo'ob tu yéetelo'ob; u dzooque' ca yéeya'ab Pablo yéetel Bernabé yéetel u láak dze'edzeque' u ti'al ca xi'ico'ob tac Jerusalén tu yicnal le apóstolo'obo' yéetel le anciano'ob yano'ob te j caajo' u ti'al u yu'ubo'ob bix anil le ba'alo'oba'. 3U iglesiail Antioquía j túuxto'ob. U ti'al u binbalo'obe' j máano'ob tu lu'umil Fenicia yéetel Samaria táan u tzicbaltico'obe' bix le máaxo'ob ma' judíobo' tu p'atajo'ob u yúuchben ocsaj óolalo'ob u ti'al u bino'ob tu paach Ku. Tuláacal le sucu'uno'obo' jach qui'imac u yóolo'ob tu yo'olal le péectzila'. 4Le ca j kuch Pablo yéetel Bernabé tac Jerusalene' j ka'amo'ob tumen le iglesiao' yéetel tumen le apóstolo'obo' yéetel tumen le anciano'ob, ca tu tzicbaltajo'ob ba'ax dzo'oc u beetic Yuum Ku tu yéetelo'ob. 5Ba'ale' dze'edzec ti' le fariseob dzo'oc u yocsajóolo'obe' j wa'alajo'obe' ca tu ya'alajo'ob; kabéet u súut kupta'al le ocsaj óolo'ob ma' judíobo' yéetel u túuxta'al ti'ob ca u dzo'ocbeso'ob u ya'almaj t'aan Moisés. 6Ca j much'laj túun le apóstolo'ob yéetel anciano'ob u ti'al u tuculto'ob bix cun p'áatal le ba'ala'. 7Cu dzo'ocol u sen t'anal t'aano'obe' j líik Pedroe' ca tu ya'alaj ti'ob: Sucu'une'ex te'exe' a wojele'exe' dzo'oc u máan kiine' tu yéeyajen Ku ichile'ex u ti'al in tze'ect u ma'alob péectzil le tocsajila' ti' le máaxo'ob ma' judíobo', u ti'al ca ocsaj óolnaco'ob xan. 8Ku máax u kaj óol le pucsi'ikalo'obo' tu ye'esaj cu kamico'ob xan, iquil tu dzajilac Quili'ich Pixan ti'ob je'el bix ti' to'one'. 9Kue' tu ye'esaj mina'an u jela'anilo'ob ti' to'on, tumen tu p'oa' xan u pucsi'ikalo'ob tu yo'olal le ocsaj óolalo'. 10Bejla'a' túune' ¿ba'axten ca ca'a p'éel óoltique'ex ba'ax tu beetaj Ku, yéetel ca dzáique'ex tu yóokol le sucu'uno'oba' cuucho'ob mix to'on mix c úuchben taataob c páatac u bisic? 11Ma' bey unaji', ba'ale' to'one' c ocsaj óoltique' c to'ocol tu yo'olal u yutzil Yuumtzil Jesús, bey xan leti'ob. 12Tuláacalo'ob tu macaj u chi'obe' ca tu yu'ubajo'ob u tzicbalta'al tumen Bernabé yéetel Pabloe' le chíiculalo'ob yéetel le jakbe'en ba'alo'ob tu beetaj Ku tu yo'olalo'ob ichil le ma' judíobo'. 13Le ca j dzo'oc u t'aano'obe', Jacoboe' tu ya'alaj: Sucu'une'ex u'uyene'exi': 14Simón Pedroe' dzo'oc u tzicbaltic to'on bix yáax beeta'abic utz ti' le máaco'ob ma' judíob tumen Kuo', bix xan tu yéeyajil ichilo'obe' jun p'éel caaj u ti'alinte. 15Lela' tu beel yanil yéetel le ba'ax tu dzíibtaj le aj bóobato'obo' je'el bix cu ya'alic le Quili'ich Dzíibo'obo': 16Cu dzo'ocol lela' bíin suunaquen yéetel bíin líikes tu ca'a téen u yotoch David luba'ano'; bíin in wutzquint u juutlilo'ob, yéetel bíin in líikes tu ca'a téen, 17u ti'al ca caxta'ac Yuumtzil tumen tuláacal le u láak máaco'obo', bey xan tumen tuláacal le ca'ajo'obo', tu yóokol máaxo'ob ch'a'achi'ita'an in kaaba'. 18Bey cu ya'alic Yuumtzil máax úuch u dzáa ojéeltbil le ba'alo'oba'. 19Le o'olale' teen quin wa'alique' ma' unaj u xa'akta'al u tuucul le máaxo'ob ma' judíobo' máaxo'ob cu p'atico'ob u yúuchben ocsajóolo'obe' u ti'al u bino'ob tu paach Ku. 20Chéen yéetel ca dzíibta'ac ti'obe' ma' u yantal mixba'al u yilo'ob yéetel ba'alo'ob kascunta'ano'ob tu yo'olal beetbil kuo'ob, ma' u nup kebano'ob yéetel ma' u jaantico'ob u bakel ba'alche'ob cup iikil quíimico'ob mix u jaantico'ob ki'ik. 21Tumen úuch suucac u tze'ecta'al cajal caaj u ya'almaj t'aan Moisés yéetel u xo'ocol ti' le sinagogaobo' u ti'al sábado. 22Le apóstolo'ob yéetel le anciano'ob yéetel tuláacal le iglesiao', tu tuclajo'ob u yéeyico'ob dze'edzec ti' ichilo'obe' u ti'al u túuxtico'ob Antioquía yéetel Pablo yéetel Bernabé. Tu yéeyajo'ob Judas u láak u kaaba'e' Barsabás; bey xan Silas, máaco'ob nuuctaco'ob ichil le sucu'uno'obo'. 23Tu túuxtajo'ob yéetel leti'obe' le dzíiba': Le apóstolo'obo', le anciano'ob, yéetel le sucu'uno'obo' utz kaj óola'anilo'ob tumen le sucu'uno'ob ma' judíob caja'ano'ob Antioquía yéetel tu lu'umilo'ob Siria yéetel Cilicia. 24Dzo'oc cojéeltique' dze'edzec máaco'ob jóoko'ob waye', ba'ale' ma' to'on túuxto'obi', dzo'oc u xa'akbesic a tuucule'ex yéetel u t'aano'ob bey xan dzo'oc u satic a wóole'ex, táan u ya'alico'obe' unaj a súutkuptcaba'ex yéetel a beetique'ex ba'ax cu ya'alic u ya'almaj t'aan Moisés. 25Le o'olal t ilaj ma'alobe' ca t múuch' tucultaj c yéeyic dze'edzec sucu'uno'ob ichilo'on u ti'al ca xi'ico'ob u yile'exo'ob, jun múuch' yéetel le c jach yaabilaj sucu'uno'ob Bernabé yéetel Pablo, 26máaxo'ob u kubmaj u cuxtalo'ob tac u ti'al j quíimil tu yo'olal c Yuumtzil Jesucristo. 27Bey túuno' c túuxtic te'ex Judas yéetel silas, leti'ob cu bin tzol te'ex tuláacal le ba'alo'oba'. 28Tumen ma'alob tu yiljilac Quili'ich Pixan, bey xan to'on ma'c dzáic te'ex u láak cuuch wa ma' chéen le ba'alo'ob jach ka'abéeta': 29Ma' jaantique'ex u bakel ba'alche'ob quiimsa'ano'ob tu táan mentbil kuo'ob; bey xan ma' a jaantique'ex ki'ik, mix u bakel ba'alche'ob cup iikil quíimico'ob, yéetel ma' a nup kebane'ex. Wa ca cananticaba'ex ti' le ba'alo'oba', utz ba'ax ca beetique'ex. Ca xi'ic te'ex utzil. 30Leti'obe' le ca j túuxta'abo'obe', j bino'ob Antioquía. Te'elo' tu much'quintajo'ob le sucu'uno'obo' ca tu kubajo'ob le dzíib tubiso'obo'. 31Le sucu'uno'obo' le ca tu xoco'obe', jach qui'imacchaj u yóolo'ob tu yo'olal le jéedzel óolal cu dza'abal ti'obo'. 32Tumen Judas yéetel Silase' yaan páajtalil ti'ob u ya'alico'ob péectzilo'ob cu kamico'ob ti' Ku, yéetel u t'aano'obe' tu dzajo'ob ya'ab jéedzel óolal yéetel tu cux óolto'ob le sucu'uno'obo'. 33Cu dzo'ocol u beetico'ob dze'edzec kiino'ob te'elo', utzil túuxta'abo'ob tumen le sucu'uno'obo' yéetel jeedzel t'aano'ob u ti'al ca suunaco'ob ti' le máaxo'ob túuxto'obo'. 34Ba'ale' silase' tu tucultaj u p'áatali'. 35Bey xan Pablo yéetel Bernabé j p'áato'ob Antioquía; jun múuch' yéetel ya'ab u láako'obe' tu dzaj u yóolo'ob u ca'ansico'ob yéetel u tze'ectico'ob u ma'alo'ob péectzil Yuumtzil. 36Cu dzo'ocol u máan dze'edzec kiino'obe' Pabloe' tu ya'alaj ti' Bernabé: Co'ox xíimbaltic tu ca'a téen le sucu'uno'ob ti' tuláacal le caajo'ob tu'ux dzo'oc c tze'ectic u ma'alo'ob péectzil Yuumtzilo' u ti'al c ilic bix yanilo'ob. 37Bernabee' tu yóoltaj u bis Juan marcos tu yéetelo'ob, 38ba'ale' Pabloe' tu tucultaj ma' ma'alob ca u biso'obi', tumen j p'a'ato'ob tumen Marcos tu caajil Panfilia, yéetel ma' bin tu yéetelo'ob te j meyajo'. 39Jach t'anal t'aanajo'ob tu yo'olal lela', ca tu jatzjuba'ob jun túul ti' u láak; Bernabee' tu bisaj marcos, ca c ooc ti' jun p'éel cheem u ti'al u binbal chipre. 40Pablo túune' tu yéeyaj Silase', ca jóok u binbal cu dzo'ocol u kubenta'al ti' u yaacunaj Yuumtzil tumen le sucu'uno'obo'. 41J máan ti' Siria yéetel ti' Cilicia táan u cux óoltic u sucu'unilo'ob le iglesiaobo'.


Copyright
Learn More

will be added

X\