Hechos 13

1Ti' le iglesia yaan Antioquíao' yaan aj bóobato'ob yéetel j ca'anbesajo'ob. Lelo'oba' Bernabé, Simón (máax cu ya'ala'al xan ti'e' j Boox), Lucio Cireneil, Manaén (máax yéet ch'íijac Herodes u jalachil Galilea) yéetel Saulo'. 2Jun p'éel kiine', ca'aliquil táan u kultico'ob Yuumtzil táan u su'ukino'obe', Quili'ich Pixane' tu ya'alaj: Dza'ex teen jun páayil Bernabé yéetel Saulo u ti'al le meyaj ti' ba'ax o'olal tin t'aano'obo'. 3Cu dzo'ocol túun u payalchi'ob yéetel u su'ukino'obe', tu dzáalanto'ob u kabo'ob tu yóokol Bernabé yéetel tu yóokol Sauloe' ca tu utzil túuxtajo'ob. 4Cu dzo'ocole', Bernabé yéetel Sauloe', túuxta'abo'ob tumen Quili'ich Pixane', ca j bino'ob Seleucia; te'elo' j ooco'ob ti' jun p'éel cheeme' ca j bino'ob tac tu petenil chipre. 5Le ca j kucho'ob te'elo', tu caajil Salaminae', jo'op' u tze'ectico'ob u ma'alob péectzil Ku tu sinagoagaob le judíobo'. Juane' cu bin tu yéetelo'ob bey jun túul áantaje'. 6Tu xíimbalto'ob tuláacal le peteno' ca j kucho'ob Pafos. Te tu yilo'ob jun túul judío Barjesús u kaaba', lela' j meen, jun túul j tuusil wíinic, cu ya'alic táan u t'aan tu kaaba' Ku. 7Le meeno' ti' yaan tu yicnal jalach Sergio Pauloe', jun túul máac jach yaan u na'at. Le jalacho' tu túuxtaj t'anbil Bernabé yéetel Saulo, tumen u káat u yu'ub u ma'alob péectzil Ku. 8Ba'ale' le j meeno', u kaaba'e' j Elimas, tu dzajubáa ba'atel yéetelo'ob, tumen tu yóoltaj u wet' ca ocsaj óolnac le jalacho'. 9Saulo túune', Pablo xan u kaaba', chuup yéetel Quili'ich Pixane', tu jach pactaje' 10ca tu ya'alaj ti': ¡J tuusil wíinic, loolob máac, u paalech kaasil ba'al, u aj p'eec tuláacal ba'ax utz! ¿Ba'axten ma' ta p'atic a lo'olochic u toj bejilo'ob le Yuumtzilo'? 11Bejla' túune', Yuumtzile' bin u ca'aj u jadzech; bin a ca'aj ch'óoptal, dze'edzec kiino'obe' ma' bíin a wil mix u sáasil kiini'. Tu séebalquil j p'áat ich éekjoche'enil, ca jo'op' u caxantic máax bisic tu kab, tumen ma' táan u páajtal u paacat. 12Le ca tu yilaj le jalach lela', ocsaj óolnaji, tumen jaka'an u yóol tu yo'olal u ca'ansajil Yuumtzil. 13Pablo yéetel le máaxo'ob láakintique' j luko'ob tu caajil Pafos ti' jun p'éel cheeme' ca j bino'ob tac Perge tu lu'umil Panfilia, ba'ale' Juane' j luk tu yicnalo'obe' ca j suunaj Jerusalén. 14Cu dzo'ocole' leti'obe' j máano'ob Perge, ca j bino'ob tu caajil Antioquía tu lu'umil Pisidia. Te'elo' ti' u kiinil sábadoe' j ooco'ob ti' le sinagogao' ca j culajo'ob. 15Bey túuno', cu dzo'ocol u yúuchul xooc tu dzíibil le a'almaj t'aan yéetel le aj bóobato'obo', u nuuctaquil le sinagogao' tu túuxtajo'ob a'albil ti'ob: Sucu'une'ex wa yaan tzol xiquino'ob a dza'ex ti' le máaco'oba', cu páajtal a wa'alique'ex bejla'e'. 16Pablo' túune' ca tu beetaj yéetel u kab ca u mac u chi'ob, ca tu ya'alaj: u'uye'ex j israelile'ex, bey xan te'ex ti' máaxe'ex yaan u sajaquilil Junab Ku: 17U Ku u caajil Israele' tu yéeyaj c úuchben taataobe' ca tu beetaj jun p'éel nojoch caaj tu yéetelo'ob, ca'aliquil caja'ano'ob tu lu'umil Egiptoe' beyo'ob j táanxel lu'umilo'obe'. Cu dzo'ocole' tu jóokesajo'ob te j lu'umo' yéetel u páajtalil. 18Kue' tu mukyajtaj ba'ax tu beetajo'ob te x tocoy lu'umo' míin cuarenta ja'abo'ob, 19ca tu xu'ulsaj siete caajo'ob yano'ob tu lu'unil Canaane' u ti'al u dzáic u lu'umo'ob ti' c úuchben ch'i'ilancabilo'ob. 20Cu dzo'ocole' ichil cuatrocientos cincuenta ja'abo'obe' tu beetaj u jalachil tu yóokolo'ob yéetel jueso'ob tac tu kiinilo'ob aj bóobat Samuel. 21Leti'ob túune' tu káatajo'ob jun túul ajaw u ti'al u beet u jalachil tu yóokolo'ob, Ku túune' tu dzaj ti'ob u ti'al cuarenta ja'abo'obe' jun túul ajaw u kaaba'e' Saul, u paal Cis, jun túul máac taalaja'an ti' u chi'ibalil Benjamín. 22Cu dzo'ocole' ca tu lu kesaj Saul tu cúuchile', ca tu dzaj Davide' ajawil tu yóokolo'ob tu yo'olal máax tu ya'alaj: Dzo'oc in caxtic David, u paal Isaí, jun túul máac cu lúubul teen utzil yéetel máax cu bin beet tuláacal ba'ax in káate'. 23Jun túul ti' u ch'i'ibal Davide' Jesús máax líikesa'ab tumen Ku u ti'al u toc Israel je'el bix u ya'almaje'. 24Ma'ili' taalac Jesuse' Juane' tze'ecnaj ti' tuláacal u máaquilo'ob Israel, táan u ya'alic ti'ob kabéet u kexic u tuuculo'ob yéetel kabéet u yocja'ob. 25Le ca j náadz u xuul u cuxtal Juane', leti'e' tu ya'alaj: Ma' teen le máax ca tucultique'ex teno'; ba'ale' tin paache' táan u taal jun túul máax ma' táan in najmatic in wach'ic mix u táabil u xanab. 26Sucu'une'ex, paalale'ex a taalbale'ex tu chi'ibal Abraham, yéetel le máaxo'ob ichile'ex yaan u sajaquilil Ku ti'obo', ti' te'ex túuxta'ab le ma'alob péectzil u ti'al tocsajila'. 27Tumen le máaxo'ob cajnáalo'ob Jerusaleno' yéetel u nuuctaquilo'obo' ma' u yojelo'ob máax Jesusi', mix táan u na'atico'ob u t'aan le aj bóobato'ob cu xo'ocol ti' le sinagogaob ti' sábadoo'; beyo' leti'ob tu dzo'ocbesajo'ob ba'ax cu ya'alic le Quili'ich Dzíibo'ob le ca tu xot kintajo'ob Jesuso'. 28Quex ma' tu caxtajo'ob ba'ax o'olal u quiimsico'obe', tu káatajo'ob ti' Pilato ca u túuxt quíimsbil. 29Bey túuno', le ca j dzo'oc u beetico'ob tuláacal le ba'ax cu ya'ala'al tu yo'olal leti' te j Quili'ich Dzíibo', tu yéemsajo'ob ti' le cruzo' ca tu mucajo'ob. 30Ba'ale' Kue' tu líiksaj ti' le quíimilo'. 31Ti' ya'abcach kiino'ob Jesuse' tu chíicbesajubáa ti' le máaxo'ob láakint ca'aliquil tu xíimbal ti' Galilea tac Jerusaleno', bejla'e' leti'ob máaxo'ob cu t'aano'ob tu yo'olal leti' ti' le máaco'obo'. 32Bey túuno', to'one' táan c dzáic ti' te'exe' u ma'alob péectzilil le ba'ax tu ya'alaj Ku ti' c úuchben taataobo'. 33Tumen ti' to'on, máaxo'ob u paalalo'one', leti'e' dzo'oc u dzo'ocbesic ba'ax tu ya'alaj iquil u ca'a púut cuxquintilac Jesús, je'elbix dzíibanil ti' le u ca'a p'éel salmo': Teche' in paalech; tene' dzo'oc in dzáic teech cuxtal bejela'e'. 34Kue' u ya'almaje' yaan u ca'a púut cuxquintic, beyo' ma' tu kastal u wíinclil je'el bix tu ya'alaj te Quili'ich dzíibo': Bin in ca'aj in dzáa ti' te'exe' siibalo'ob tin wa'alaj ti' David. 35Le o'olal xan cu ya'alic ti' u láak salmoe': Ma' bíin in cha'a u kastal u wíinclil le a palitzil a yaabilmajo'. 36U jaajile' Davide' tu meyajtaj le yéet kiinilo'obo' je'el bix a'ala'ab ti' tumen Ku, cu dzo'ocole' ca j quíimi, ca j much'laj yéetel u taataob, ca j tu'uji u wíinclil. 37Ba'ale' u wíinclil le máax ca'a púut cuxquinta'ab tumen Kuo' ma' j tu'uchaji'. 38Sucu'une'ex te'exe' unaj a wojéeltique'exe', u sa'atsajil le kebano'obo' cu tze'ecta'al ti' te'exe' tu yo'olal Jesús. 39Tu yo'olal leti'e', tuláacal le cu yocsaj óolo'obo' cu sa'atsa'alo'ob ti' tuláacal le ba'ax ma' páajtji u sa'atsa'alo'ob tu yáanal u ya'almaj t'aan Moisesi'. 40Canantaba'ex ma' lúubul ta wóokole'ex le ba'ax tu dzíibtaj le aj bóobato'ob, le ca tu ya'alajo'ob: 41Ile'ex, j p'a'as máaque'ex, ja'akac a wóole'ex yéetel sa'ataque'ex, tumen tene', Junab Kuen, quin beetic nucuch ba'alo'ob ta kiinile'ex ma' bíin a wocsaj óolte'exi', quex ca dzíibta'ac te'ex tumen wa máax. 42Le ca jóok Pablo yéetel le máaxo'ob yano'ob ti' u sinagoga le judíobo', le máaxo'ob ma' sijnalo'ob judíobe' tu káat óoltajo'ob ti'ob ca tzicbalta'ac le ba'alo'ob ti'oba' ti' le u láak sábado cu taalo'. 43Le ca dzo'oc u jóokolo'ob ti' le much'tal te sinagogao', ya'ab ti' le judíobo' bey xan ti' le máaxo'ob u kammajo'ob u yocsaj óolal le judíobo' yéetel táan u beetico'ob yéetel chuca'an óolale' j bino'ob tu paach Pablo yéetel Bernabé. Lelo'oba' tu tzolaj u xiquino'ob u ti'al ca p'áataco'ob mantadz ti' u yaacunaj Ku. 44Ti' u láak semanae', ti' sábadoe', j much'laj óoli' tuláacal u cajnáalilo'ob le cúuchilo' u ti'al u yu'ubico'ob u ma'alob péectzilil Ku. 45Ba'ale' le judíobo', le ca tu yilajo'ob buca'aj máaco'ob much'laje', tu yaj óoltajo'ob, ca jo'op' u káakat t'antico'ob u t'aan Pablo bey xan cu poch'ico'ob. 46Pablo yéetel Bernabe' j t'aanajo'ob yéetel páajtalile' ca tu ya'alaj ti'ob: kabéet u tze'ecta'al u ma'alo'ob péectzil Ku yáaxil ti' te'ex judíoex; ba'ale' bey ma' a káat a kame'exo' yéetel táan a tucultique'ex ma' táan a najmatique'ex le cuxtalo' mina'an u xuulo', bejela'e' táan c bin ti' le máaxo'ob ma' judíobo'. 47tumen bey tu túuxtilaco'on Yuumtzil, táan u ya'alic: In dzaamajech bey sáasilil ti' le caajo'obo', yéetel u ti'al a bis tocsajil tac tu xuul yóokolcaab. 48Le ca tu yu'ubajo'ob lela', le máaxo'ob ma'judíobo', qui'imacchaj u yóolo'ob ca jo'op' u ya'alico'obe' jach ma'alob u péectzil Ku. Ca j ocsaj óolnajo'ob tuláacal le yéeya'ano'ob u ti'al ca yanac ti'ob cuxtal mina'an u xuulo'. 49Bey tze'ecta'abic u ma'alob péectzil Yuumtzil ti' tuláacal le lu'umo'. 50Ba'ale' le judíobo' j t'aanajo'ob yéetel dze'edzec co'olelo'ob ma'alob u cuxtalo'ob yéetel yaan u tzicbe'enilo'obe' bey xan yéetel u nuuctaquilo'ob le caajo', ca tu líikesajo'ob u yóolo'ob tu yóokol Pablo yéetel ti' Bernabé ca tu ch'a'apachtajo'ob tu yo'olal u jóokesico'ob te j lu'umo'. 51Leti'ob túune' tu tíitajo'ob u lu'umil u yooco'ob bey jun p'éel chíiculal u ti'al le máaco'obo', ca j bino'ob tu caajil Iconio. 52Ba'ale' le ocsaj óolo'obo' jach qui'imac u yóolo'ob yéetel chuupo'ob xan yéetel Quili'ich Pixan.


Copyright
Learn More

will be added

X\