Hechos 10

1Tu caajil Cesareae' yaan ca'ach jun túul máaque' u kaaba'e' Cornelio, leti'e' u náacom jun múuch' aj ba'atelo'ob cu kaaba'inta'al le Italianoo'. 2Lela' jun túul máac cu kultic Ku jun múuch' yéetel tuláacal u yotoch yéetel cu tziquic xan. Bey xan cu dzáic ya'ab taakin u ti'al u yáanta'al le judíobo', yéetel mantadz cu payalchi' ti' Ku. 3Jun p'éel kiine', míin las tres u binbal kiine', j e'esa'ab jun p'éel chíiculal ti': tu yilaj u yocol jun túul u ángel Ku tac tu'ux yano', ca j a'ala'ab ti' ¡Cornelio! 4Cornelioe' p'áat táan u pactic le ángel yéetel nojoch sajaquil, ca tu káat chi'itaj ti': ¿Ba'axi' Yuumtzil? Le ángel túuno' tu ya'alaj ti': Kue' dzo'oc u kamic a payalchi'ob bey xan ba'ax dzo'oc a beetic u ti'al a wáantic le óotzilo'obo'. 5Túuxt máaco'ob tac tu caajil Jope u ti'al u t'anic Simón, u láak u kaaba'e' Pedro. 6Lela' kucha'an tu yotoch u láak máac, Simón u kaaba' xan, jun túul máac cu meyajtic kéewel, cajacbal tu jáal ka'anab. Leti' máaxcun a'alic teech ba'ax unaj a beetic. 7Le ca j bin le ángel t'aanaj yéetelo', Cornelioe' tu t'anaj ca'a túul u palitzilo'ob, bey xan ichil le máaxo'ob meyajtico' jun túul aj ba'atel yaan u sajaquil Ku ti'. 8Tu tzicbaltaj tuláacal ti'obe' ca tu túuxtajo'ob Jope. 9Tu jeel kiine' ca'aliquil táan u bino'ob te bejo' yéetel dzo'oc u naadz yanilo'ob tu caajil Jope, Pedroe' j na'ac tu yóokol le najo' óoli' chúumuc kiin u ti'al u payalchi'. 10Jach wi'ijchaje' ca tu yóoltaj janal; ba'ale' ca'aliquil táan u nu'ucta'al le janalo' tu yilaj jun p'éel chíiculal. 11Tu yilaj u je'epajal le ca'ano' yéetel táan u yéemel jun p'éel ba'al bey jun p'éel nojoch nooke', kaxa'an tu can ti'itzil. 12Ti' le nooko' yaan jejeláas ba'alche'ob can dzíit u yooco'ob, yaan xan caano'ob yéetel ch'íich'o'obi'. 13Tu yu'ubaj túun jun p'éel t'aan táan u ya'alic ti': Líiken, Pedro, quiimsajnen ca janaquech. 14Ba'ale' Pedroe' tu núucaj: Ma' Yuumtzil; mix jun téen in jaant ba'al ma' utz u jaanta'ali' mix wa ba'ax ma' kambe'eni'. 15Le t'aano' tu ya'alaj túun ti' tu ca'atéen: Le ba'ax ma'alob quinta'an tumen Kue' ma' wa'alic, ma' utzi'. 16Lela' j úuch óox téen, cu dzo'ocole' le nooko'j na'acsa'ab tu ca'a téen. 17Ca'aliquil Pedro táan u sen tucultic ba'ax tu yilajo', j kucho'ob jool naj le máaco'ob túuxta'abo'ob tumen Cornelio', táan u káat péectziltico'ob tu'ux yaan u yotoch Simón. 18Le ca j kucho'obe' tu káat péectzilto'ob wa ti' kucha'an jun túul máac Simón u kaaba', máax cu ya'ala'al xan Pedro ti'. 19Tumen Pedroe' láili' táan u tucultic le ba'ax tu yilajo', a'ala'ab ti' tumen quili'ich Pixan: Ile, óox túul máaco'ob, caxtiquech. 20Líiken j éemen ca xi'iquech yéetelo'ob. Ma' u ca'a p'éeltal a wóolal tumen teen túuxto'ob. 21Pedroe' j éem túun tac tu'ux yaan le máaco'ob túuxta'ano'ob tumen Cornelio' ca tu ya'alaj ti'ob: Teen wa le máax ca caxtique'exo'. ¿Ba'ax taale'ex a beete'ex? 22Leti'obe' tu núucajo'ob: Túuxta'abo'on tumen náacom Cornelio, jun túul máac toj u cuxtal, yéetel yaan u sajaquil Ku ti', máax yaabilta'an xan tumen tuláacal le judíobo'. Jun túul u ángel Yuum Ku a'alti' unaj u túuxtic t'anbilech u ti'al ca xi'iquech tu yotoch, u ti'al ca u yu'ub ba'ax yaan a wa'al ti'. 23Pedroe' tu beetaj u yocolo'obe' ca j p'áto'ob tu yicnal ti' le áakabo'. Tu jeel kiine' Pedroe' j bin yéetelo'ob, j bin xan yéetelo'obe' dze'edzec ti' le sucu'uno'ob cajacbalo'ob Jopeo'. 24Tu jeel kiine' j kucho'ob Cesarea, tu'ux táan u pa'atalo'ob tumen Cornelio yéetel jun múuch' u láaktzilo'ob bey xan le máaxo'ob jach utz u biscuba'ob tu yéetele', máaxo'ob j t'a'ano'ob tumen Cornelio. 25Le ca j kuch Pedro te j najo', Cornelioe' jóok u kame' caj xolaj tu táan u ti'al u kulte. 26Ba'ale' líiksa'ab tumen Pedroe' ca a'ala'ab ti': Wa'alen, tumen teen xane' wíiniquen je'el bix techo'. 27Ca'aliquil táan u t'aan yéetele' j ooque' ca tu yilaj ya'ab máaco'ob much'ucbalo'ob. 28Pedro túune' tu ya'alaj ti'ob: Te'exe' a wojele'ex wet'a'an ti' jun túul judío tu yo'olal u yocsaj óolale' u bisicubáa yéetel jun túul táanxel lu'umil wa u yocol tu yotoch. Ba'ale' Kue' dzo'oc u ca'ansic ti' tene' ma' unaj in wa'alic ti' mix máac kaas yanil wa mix kambe'eni'. 29Le o'olale' le ca j t'a'anene' mix ba'al tin wa'alaj, ca j taalen. In káat túun in wojéelte' ba'ax o'olal ta t'anjene'ex. 30Cornelio túune' tu núucaj: Míin can p'éel kiino'ob bejela'e', míin walquila', ti' yanen way tin wotoche' táan in su'ukin yéetel táan in payalchi', las tres u binbal u t'úubul kiine' ca chíicpaj teen jun túul j xiib u búuquintmaj jun p'éel nook cu léembal. 31Ca tu ya'alaj teen: Cornelio, Kue' dzo'oc u yu'ubic a payalchi' yéetel dzo'oc u ka'ajsic ba'ax ca beetic u ti'al a wáantic óotzilo'ob. 32Túuxt túun ch'a'abil tu caajil Jope jun túul Simón, máax xan Pedro u kaaba'. Kucha'an tu yotoch Simón, lela' jun túul j bon kéewel, caja'an tu jáal ka'anab. Le quéen taalaque' yaan u t'aan ta wéetel. 33Bey túuno' tin túuxtaj cha'abilech tu séebalquil, ta beetaj utz a taal. Bejla'e' tuláacalo'on ti'ano'on tu táan Kue', c káat u'uy tuláacal le ba'ax u ya'almaj teech Yuumtzil ca a wa'al to'ono'. 34Pedroe' j chu'unpaj u t'aane' ca tu ya'alaj: Bejla'e' quin na'atique' Kue' mix máac jela'an u pactic, 35ba'ale' ti' je'el ba'alac caajile' cu kamic le máax tziquique' yéetel cu beetic ba'ax utzo'. 36Kue' tu t'anaj u ch'i'ibal Israel, táan u tze'ectic ma'alob péectzilil tu yo'olal Jesucrito, lela' u Yuumtzil tuláacal. 37Te'exe' ma'alob a wojelile'x ba'ax úuch tuláacal u lu'umil judíobo', lela' cáaj Galilea, cu dzo'ocol u tze'ec yéetel u dzáic ocja' Juan. 38A wojele'ex bix Yuum Kue' tu dzaj páajtalil Quili'ich Pixan ti' Jesús Nazaretil, bix máanic xan leti' táan u beetic utz yéetel táan u dzáic toj óolal ti' tuláacal le máaxo'ob cu mukyajo'ob yáanal u páajtalil kaasil ba'alo'. Lela' tu beetaje' tumen Kue' ti' yaan tu yéetele'. 39To'one' jajcunajo'on ti' tuláacal ba'axo'ob tu beetaj Jesuso', ma' chéen tu lu'umil Judeai' ba'ale' tac tu caajil Jerusalén. Cu dzo'ocole' ca tu quiimsajo'ob úuchic u sinico'ob ti' jun p'éel cruz. 40Ba'ale' Kue' tu ca'a púut cuxquintaj tu yóox p'éel kiine' ca tu beetaj u chíicpajal ti' to'on. 41Ma' chíicpaj ti' tuláacal máaqui', ba'ale' ti' to'on máaxo'on yéeya'ano'on tumen Ku tu yáax chuun u ti'al jaacunaj. To'one' jaano'on, ukulnajo'ob xan tu yéetel cu dzo'ocol u ca'a púutcuxtal ichil le quimeno'obo'. 42Ca tu ya'alaj to'on ca tze'ecnaco'on ti' le máaco'obo'; yéetel u ti'al ca c a'ale' Kue' dzo'oc u dzáic Jesús je'el bix jun túul Aj p'is óol tu yóokol cuxa'ano'ob yéetel quimeno'ob. 43Bey xan, ma'ili' úuchuque', tuláacal le aj bóobato'obo' j t'aanajo'ob tu yo'olal Jesús, táan u ya'alico'obe' tuláacal le máaxo'ob cu yocsic u yóolo'ob ti'e' cu kamico'ob sa'atsaj si'ipil tu kaaba'. 44Láili' táan u t'aan Pedroe', ca j taal Quili'ich Pixan tu yóokol tuláacal le máaxo'ob u'uyic u tze'eco'. 45Le ocsaj óolo'ob judíob j taalo'ob yéetel Pedroe' ja'ak u yóolo'ob tumen dza'ab Quili'ich Pixan tac ti' le máaxo'ob ma' Judíobo'. 46Tumen tu yu'ubajo'ob u t'aano'ob ichil jejeláas t'ano'ob yéetel u qui'iqui' t'antico'ob Ku. 47Pedro túune' tu ya'alaj ti'ob: ¿Je'el wa túun u páajtal u we'et'el u yocja' le máaxo'ob dzo'oc u kamico'ob Quili'ich Pixan jeel bixto'one'? 48Ca tu túuxtaj ca ocja'anaco'ob tu kaaba' Jesucristo. Cudzo'ocole' ca tu káat óoltajo'ob ti' Pedro ca p'áatac tu yicnalo'ob u láak dze'edzec kiino'ob.


Copyright
Learn More

will be added

X\