2 Timoteo 3

1Bey xan unaj a wojéeltique' ti' u dzo'oc ja'abo'obe' bíin taalac talam kiino'ob. 2Máaco'obe' bíin dzu'utchajco'ob, bíin u yaabilto'ob taakin, bíin ca'analchajac u yicho'ob yéetel bíin u nojba'alcunsuba'ob. Bíin t'aanaco'ob tu contra Ku, ma' túun u yu'ubo'ob u t'aan u taataob, ma' túun u dza'ob nib óolal yéetel ma' túun u tziquilto'ob u ma'alob cuxtalil le ocsaj óolalo'. 3Ma' túun yantal u yaacunajo'ob mix u ch'a'a óotzililo'ob, bíin u beeto'ob u j líiksaj t'aanilo'ob, ma' túun páajtal u dzáanche'etico'ob u kaakas dzíibolalo'obi', bíin jach kasa'anchajac u pucsi'ikalo'ob yéetel bíin u p'ecto'ob tuláacal ba'al ma'alob. 4Bíin u cúulpachcunto'ob máac, bíin u yocsuba'ob tu'ux ma' unaji', chuupo'ob yéetel nonojbáil, bíin u yaabilto'ob u kaakas dzíibolalo'ob ba'ale' ma' bin u yaabilto'ob Kui'. 5Bíin u beeto'ob jach ma'alob ba'ax chéen u yo'ocabil le ma'alob cuxtalo', ba'ale' bíin u cúulpachcunto'ob u páajtalil le ma'alob cuxtalo'. Ma' a wocsicabáa yéetel le máaco'ob beyo'obo'. 6Tumen ichilo'obe' yaan le máaxo'ob cu jupicuba'ob ti' le najo'obo' yéetel cu tusico'ob le co'olelo'ob luba'an u muuko'ob yéetel chuupo'ob yéetel kebano'. Lelo'oba', tumen táan u jíilta'alo'ob tumen u jejeláasil kaakas dzíibolalo'obe', 7mantadz táan u canbalo'ob ba'ale' ma' táan u kuchul u na'atico'ob le jaajo'. 8Bey túun je'el bix le j wáayo'ob Janes yéetel Jambres yanji'ob tu contra Moisese', bey xan le máaco'obo' cu yanta'alo'ob tu contra le jaajo'. Máaco'ob dzo'oc u kastal u tuuculo'ob, ma' kambe'eno'ob ti' tuláacal ba'ax yaan u yil le ocsaj óolalo'. 9Ba'ale' ma' bíin xi'ico'ob náachili', tumen u x ma' na'atilo'obe' bíin kaj óolta'ac tumen tuláacal máac je'el bix úuchic ti' le ca'a túulo'ob yanji'ob tu contra Moiseso'. 10Ba'ale' teche' dzo'oc a bin ma'alob tu paach in ca'ansajo'ob, ti' bix in cuxtal, ti' ba'ax in káati', ti' in wocsaj óolal, ti' in chuca'an óolal, ti' in yaacunaj yéetel ti' tuláacal ba'ax dzo'oc in mukyajtic, 11le ca j ch'a'apachta'aben yéetel le ca j yanchaj in mukyajo'. A wojel tuláacal ba'ax úuch teen tu caajilo'ob Antioquía, Iconio yéetel Listra, yéetel le ch'a'apachtajilo'ob tin mukyajtajo'; ba'ale' Yuumtzile' tu tocajen ti' tuláacal lelo'. 12Tumen tu jaajile' tuláacal le máaxo'ob u káato'ob cuxtal u kubmaj u yóolo'ob ti' Cristo Jesuse' yaan u mukyajtico'ob ch'a'apachtajilo'ob. 13Ba'ale' le máaxo'ob kasa'ano'obo' yéetel le cu tuuso'obo' bíin xi'ico'ob ti' kaas tac tu mas kaasil, táan u tuuso'ob yéetel táan u tu'usulo'ob. 14Ba'ale' teche' jéedzel p'áaten ti' le ba'ax dzo'oc a canico', ti' le ba'ax dzo'oc a ma'alob ocsic ta tuuculo'. Teche' a wojel máax ca'ans teech. 15Tumen ta kaj óoltaj ta paalil le Quili'ich Dzíibo'obo', lela' cu páajtal u dzáic teech na'at u ti'al le tocsajil cu yantal tu yo'olal u yocsaj óolta'al Cristo Jesuso'. 16Tuláacal Quili'ich Dzíibe' Ku j dzáa ti' tuucul u ti'al ca dzíibta'ac, ma'alob xan u ti'al ca'ansaj, u ti'al keyaj, u ti'al tojquinaj yéetel u ti'al tzol xiquin ti' jun p'éel toj cuxtal, 17u ti'al beyo' le máac u ti'al Kuo' ca utzil chuca'anchajac yéetel nu'uca'an u ti'al u beetic tuláacal u jejeláasil ma'alob meyajo'ob.


Copyright
Learn More

will be added

X\