2 Thessalonians 3

1Tu dzooque', sucu'une'ex, payalchi'inene'ex t o'olal, u ti'al ca kuchuc séeba'an tuláacal tu'ux u ma'alob péectzil Yuumtzil, yéetel ca ka'amac yéetel utzil je'el bix úuchic ichile'exo'. 2Payalchi'inene'ex xan u ti'al ca to'ococo'on ti' máaco'ob kasa'ano'ob yéetel loochol u tuuculo'ob, tumen ma' ti' tuláacal yaan ocsaj óolali'. 3Ba'ale' Yuumtzile' chuca'an u yóol, leti' túun cun u beet a jéedzel páajtale'ex yéetel cun u canante'ex ti' kaas. 4C dzaama c alab óolal ti' Yuumtzile' te'exe' táan a beetique'ex yéetel táan u bin a beetique'ex le ba'ax c a'almaj te'exo'. 5Yuumtzil ca u yáam te'ex u ti'al ca a wu'uye'ex u yaacunaj Ku yéetel ca yanac te'ex u chuca'an óolal Cristo. 6Sucu'une'ex, c a'alic te'ex tu kaaba' Yuumtzil Jesucristoe', ca a tzelaba'ex ti' je'el máacalmáac sucu'unil ma' u káat meyaji', wa ti' le máax ma' u cuxtal je'el bix le ca'ansajo'ob dzo'oc c dzáaic te'exo'. 7Tumen te'exe' a wojele'ex bix unaj a cuxtale'ex u ti'al a beetique'ex je'el bix t beetaj to'one'; to'one' ma' cuxlajo'on ichile'ex x ma' meyajili', 8yéetel ma' t jaantaj u yo'och mix máac wa ma' c bo'otiqui'. Ma' beyi', ba'ale' meyajnajo'on yéetel mukul muuknajo'on yéetel kiin bey xan yéetel áakab u ti'al ma' c dzaíc u cuuch mix jun túul ti' te'ex. 9Quex yaan to'on u páajtalil ca wáanto'one'exe', ba'ale' j meyajnajo'on u ti'al c e'esic te'ex bix unaj a cuxtale'ex. 10Tumen le ca anji'on ta wéetele'exe', t dzaj te'ex le tzol t'aana': Le máax ma' u káat meyaje', ma' u janal xan. 11Tumen cu ya'ala'al to'one' dze'edzec ti' te'exe' cuxa'ano'ob x ma' meyajil, jach u kubmajuba'ob u ti'al ma' u beetico'ob mix ba'al, wa chéen u ti'al u yocsicuba'ob ti' yaanal ba'alo'ob. 12Ti' le cuxa'ano'ob beyo' c a'alic yéetel c kubentic ti'ob, tu yo'olal u páajtalil c Yuumtzil Jesucristoe', ca meyajnaco'ob yéetel jéedzel óolal u ti'al ca u náajalto'ob ba'al u jaanto'ob. 13Sucu'une'ex, ma' a ca'anle'ex a beete'ex utz. 14Wa yaan máax ma' táan u yu'ubic ba'ax c a'alic ti' le ju'una', ile'ex máaxi', bey xan ma' u yantal mix ba'al a wile'ex yéetel, u ti'al ca u ch'a'a subtal. 15Ba'ale' ma' a wilique'ex bey jun túul enemigoe', ba'ax a beete'exe' tzole'ex u xiquin bey jun túul sucu'une'. 16U Yuumtzil le jéedzel óolalo' ca u dzáa te'ex jéedzel óolal tuláacal kiin yéetel ti' jejeláas bixilo'ob. Yuumtzil ca yanac ta wéetele'ex tuláacale'ex. 17Teen Pabloe', quin dzíibtic te'ex le tziiquil t'aana' yéetel in kab. Bey in beetic ti' tuláacal in dzíibil ju'uno'ob. Bey in dzíibo'. 18U siibal utzil c Yuumtzil Jesucristoe' ca yanac ti' tuláacale'ex.


Copyright
Learn More

will be added

X\