2 Thessalonians 2

1Bele' sucu'une'ex, tu yo'olal u taalbal c Yuumtzil Jesucristoe', le quéen taalac u much'quinto'on tu yéetele', c káat óoltic te'ex, 2ma' a kexique'ex séeba'an a tuucule'ex, mix a cha'ique'ex u ja'asa'al a wóole'ex tu yo'olal mix jun p'éel pixanbe'en péectzil, mix tu yo'olal wa ba'ax jadzutz t'aano'ob ca a wu'uye'ex, mix tu yo'olal wa ba'ax dzíibil ju'un ca a kame'ex ca chíicpajac bey to'on túuxtmaile', táan u ya'alic dzo'oc u kuchul u kiinil Yuumtzil. 3Ma' a cha'ique'ex a tu'usule'ex tu yo'olal mix ba'al. Tumen ma'ili' taalac le kiino' yaan u taal táanil le ba'atelil tu contra Kuo', le quéen chíicpajac u máaquil le kebano', le máax xot kinta'an u ti'al ca xu'ulsa'aco'. 4Lela' leti' le aj p'eec cu líikil tu contra tuláacal ba'ax cu bisic u kaaba' Ku, wa le ba'ax unaj u kulta'alo' yéetel cu kuchul tac cutal tu templo Ku, bey leti' Kue', yéetel leti' cu beeticubáa bey leti' Kue'. 5¿Ma' wa tu ka'ajal te'exe' le ca anjien ta wéetele'exe' tin wa'alaj te'ex lela'? 6Bela'ae' te'exe' a wojele'ex ba'ax katic u beel u ti'al ma' u chíicpajal ma'ili' kuchuc u kiinili'. 7Tumen u ta'acbil tuucul le kaaso' dzo'oc u cáajal u xíimbal; chéen cu bineltic ca luksa'ac chúumuc le ba'ax katic u beel bele'. 8Cu dzo'ocol túune' bíin chíicpajac le máax kasa'ano', Yuumtzil Jesuse' bíin u quíims yéetel u yiikal u chi' yéetel bíin u xu'uls yéetel u sáasjome'enil u taalbal. 9U kuchbal le máax kasa'ano' Satanás beetic; bíin kuchuc yéetel ya'ab páajtalil bey xan yéetel chíiculalo'ob yéetel tuusil jakbe'en ba'alo'ob. 10Bíin meyajnac ti' tuláacal jejeláasil kaasilo'ob u ti'al u tusico'ob le máaxo'ob cu bino'ob ti' xu'ulsajo', bey ma' tu yóoltajo'ob u kamo'ob le jaajo' u ti'al ca to'ococo'ob. 11Tu yo'olal lela', Kue' cu túuxtic ti'ob jun p'éel páajtalil táabsajil, le cu beetic u yocsaj óoltico'ob le tuuso', 12u ti'al ca xot kinta'aco'ob tuláacal le máaxo'ob ma' tu yóoltajo'ob u yocsaj óolto'ob le jaajo', ba'ale' asab utz tu t'aano'ob le kaaso'. 13Ba'ale' to'one' mantadz unaj c dzáic gracias ti' Ku ta wo'olale'ex, sucu'une'ex yaabila'ane'ex tumen Yuumtzil, tumen Kue' tu yéeyaje'ex tu yáax chuune' u ti'al ca to'ocoque'ex, tu yo'olal Quili'ich Pixano' jumpáay cuntique'exo' wocsaj óoltile'ex le jaajo'. 14Kue' tu t'anaje'ex u ti'al lela', tu yo'olal le ma'alob péectzil u ti'al c tze'ectic to'ono', u ti'al ca táacpajque'ex ti' u nojbe'enil c Yuumtzil Jesucristo. 15Bey túuno', sucu'une'ex, jéedzel p'áatene'ex, yéetel ma' a tu'ubsique'ex le ca'anbesajo'ob dzo'oc c dzáic te'ex yéetel c t'aano'obo' bey xan yéetel c dzíibo'ob. 16C Yuumtzil Jesuristo, yéetel Ku c taatae' le máax tu yo'olal u siibal utzil tu yaabilto'on yéetel tu dzaj to'on qui'imac óolal mina'an u xuule' bey xan jun p'éel ma'alob alab óolale', 17ca u líikes u yóol a pucsi'ikale'ex yéetel ca u beet a jéedzel p'áatale'ex u ti'al ca a wa'ale'ex yéetel ca a beete'ex tuláacal ba'ax utz.


Copyright
Learn More

will be added

X\