2 San Pedro 3

1In yaabilaj sucu'une'ex, lela' u ca'a p'éel ju'un quin dzíibtic ti' te'exa'. Tu ca'a p'éelil ju'une' tin wóoltaj in beet yéetel tzol xiquino'obe' ca yanac te'ex toj tuucul. 2Ka'ajac te'ex le ba'ax tu yáax a'alajo'ob le quili'ich aj bóobato'obo' bey xan u ya'almaj t'aan Yuumtzil c J tocsajil j ca'ansa'ab te'ex tumen le apóstolo'obo'. 3Ojéelte'ex táanil lela': Ti' le u dzo'oc kiino'obo' bíin taalac p'a'as máaco'ob, táan u cuxtalo'ob je'el bix u káat u kaakas dzíibolalo'obe', 4yéetel táan u ya'alico'ob: ¿Ba'ax j úuch yéetel u dzaa t'aanil bíin taalac Cristo? Tumen likbal tu kinil ca j quíim le c úuchben taataob tac bejela'e' tuláacal ba'al queet yanil je'el bix u yanil ca'ach le ca j beeta'ab yóokolcaabe'. 5Ba'ax cu yúuchule' leti'obe' ma' u káat u kaj óolto'obe' le ca'ano'ob yanili'ob ti' le úuchben kiino'obo' bey xan le lu'umo' jóok ti' le ja'o' yéetel t'ubucbal ichil le ja'o' tu yo'olal u t'aan Ku. 6Tu yo'olal lela' le yóokolcaab yaan ca'acho' xu'ulsa'ab tu yo'olal u ja'il le búulcabalo'. 7Ba'ale' le ca'ano'ob yéetel le lu'um yano'ob bele', cananta'ano'ob u ti'al le káako', tu yo'olal u t'aan Ku xan. Le káako' bíin u tóoco'ob tu kiinil le p'is óolo', le quéen xu'ulsa'aco'ob le máaxo'ob kasa'ano'obo'. 8In yaabilaj sucu'une'ex, ma' u tu'ubul te'ex lela': U ti'al Yuumtzile' jun p'éel kiine' bey mil ja'abo'obe', yéetel mil ja'abo'obe' bey jun p'éel kiine'. 9Ma' tumen táan u xáantal Yuumtzil u dzo'ocbesic u dzaa t'aano'obi', je'el bix yaan dze'edzec cu tucultique'; ba'ax cu yúuchule' chuca'an u yóol t éetel; tumen ma' u káat ca xu'ulsa'ac mix máaqui', ba'ale' u káat ca u kex u tuucul tuláacal máac. 10Ba'ale' u kiinil Yuumtzile' bíin taalac ti' le kiin ma' táan u pa'ata'alo', je'el bix u taal jun túul j oocol yéetel áakabe'. Le ca'ano'ob túuno' bíin xu'ulsa'aco'ob yéetel jun p'éel jakbe'en juum, tuláacal ba'ax beeta'anile' bíin xu'ulsa'ac yéetel káak, bey xan le lu'umo' bíin tóoca'ac pa'ate' yéetel tuláacal ba'ax yaani'. 11Tumen tuláacal bíin xu'ulsa'ac beyo' bey túuno' yéetel buca'aj kub óolal yéetel quili'ichil unaj a cuxtale'ex. 12Pa'ate'ex yéetel séebcunte'ex u kuchbal u kiinil Ku. Ti' le kiino' le ca'ano'obo' bíin xu'ulsa'aco'ob yéetel káak bey xan ba'ax beeta'anilo'obe' bíin yíibico'ob te j káako'; 13ba'ale' to'one' táan c pa'atic le túumben ca'ano'obo' yéetel le túumben lu'um u dzaa t'antmaj Kuo', tu'ux tuláacal ba'al toj. 14Le o'olale', in yaabilaj sucu'une'ex, ca'aliquil táan a pa'atique'ex le ba'alo'oba', beete'ex tac tu'ux cu páajtal u ti'al ca ila'aque'ex tumen Ku ich jéedzel óolal x ma' kaasil yéetel x ma' si'ipilil. 15Yanac ta tuucule'ex lela': le chuca'an óolal yaan ti' c Yuumtzilo' u ti'al c tocsajil. Bey xan dzo'oc u dzíibtic te'ex c yaabilaj sucu'un Pablo, yéetel le na'at dza'an ti' tumen Kuo'. 16Ti' tuláacal u dzíibo'obe'. Le máaxo'ob mixba'al u yojelo'obo' yéetel le máaxo'ob ma' jedza'an u tuuculo'obo' cu jelbesico'ob je'el bix u beetico'ob yéetel u láak jaatzo'ob ti' le Quili'ich Dzíibo' u ti'al u xu'ulsajilo'ob. 17Le o'olale', in yaabilaj sucu'une'ex, tumen te'ex a wojele'ex le ba'alo'ob ma'ili' úuchuca', canantaba'ex, u ti'al ma' a jíilta'ale'ex tu yo'olal u tuuso'ob le máaxo'ob kasa'ano'obo' mix a lukule'ex ti' le ba'ax jeedzel a wanile'exo'. 18Ba'ale' ch'íijene'ex ti' u siibal utzil yéetel ti' u kaj óolalil c Yuumtzil yéetel c J tocsajil Jesucristo. ¡Nojbe'enil ti' leti' bele' yéetel u ti'al kiino'ob mina'an u xuul! Amén.


Copyright
Learn More

will be added

X\