2 San Pedro 2

1Ba'ale' yanchaj xan tuusil aj bóobato'ob ichil u caajil Israel; bey xan bíin yanac tuusil ca'anbesajo'ob ichile'ex. Leti'obe' bíin u x mucul ca'anso'ob tuuculo'ob cu kascunajo'ob, yéetel bíin u mixba'alcunto'ob beyo' le Yuumtzil máax j toco'obo', lela' bíin u taas tu yóokolo'obe' jun p'éel séeba'an xu'ulsajil. 2Ya'ab máax cun j bino'ob tu paacho'ob ti' u kaakas cuxtalo'ob, yéetel tu yóolalo'obe' bíin úuchuc t'aan kaas tu' yóokol u bejil le jaajo'. 3Tu yo'olal u dzíiboltico'ob ayikalile' yaan u jóoksico'ob te'ex taakin yéetel tuusil ca'ansajo'ob; ba'ale' mina'an tu'ux u jechico'ob le xu'ulsaj pa'atico'obo', tumen úuch xot kinta'aco'ob. 4Kue' ma' tu sa'atsaj le ángelo'ob kebanchajo'obo', ba'ale' tu pulajo'ob ich metnal ca tu p'atajo'ob ich éekjoche'enil, kala'ano'ob u ti'al u kiinil le p'is óolo'. 5Kue' ma' tu sa'atsaj xan le úuchben yóokolcaabo', ba'ale' tu túuxtaj le búulcabal tu yóokol le kasa'an máaco'obo; ca tu tocaj Noe', máax tu tze'ectaj toj cuxtal, yéetel u láak siete máaco'ob. 6Kue' tu xot kintaj xan u ti'al xu'ulsajil u caajilo'ob Sodoma yéetel Gomorra, ca tu tóocajo'ob tac u p'áatal chéen u ta'anil káak, u ti'al u dzáic tu yéetelo'obe' jun p'éel ka'asaj iik ti' le kaakas máaco'ob bíin cuxlaco'ob cu dzo'ocol u máano'ob leti'obo'. 7Ba'ale' tu tocaj Lot, máax jun túul utzil máac yéetel máax jach yaj tu yóol iquil u yilic u kaakas cuxtal le loolob máaco'obo'. 8Sáamsamal kiin le utzil máaco', máax caja'an ichilo'obo', cu mukyaj tu yutzil puksika'al tu yo'olal u yilic yéetel u yu'ubic le kaakas ba'alo'ob cu beetico'obo'. 9Beyo' Yuumtzile' u yojel u toc ti' le mukyajo'obo' le máaxo'ob u kubmajo'ob u cuxtalo'ob ti' leti'o', yéetel cu dzáic le máaxo'ob kasa'ano'obo' tu yáanal jaadz u ti'al u kiinil le p'is óolo', 10táanilbe'en le máaxo'ob cu bino'obo' tu paach le kaakas dzíibolalo'ob yéetel cu cúulpachcuntico'ob u páajtalil Yuumtzil. Chich u yóolo'ob yéetel co' u yóolo'ob, ma' sajaco'ob u poch'o'ob le nojbe'en páajtalilo'obo', 11ca'aliquil le áangelo'obo', quex mas ya'ab u muuko'ob yéetel u páajtalilo'obe' ma' táan u kuchpajal u yóolo'ob u xot kinto'ob yéetel pooch'ilo'ob le nojbe'en páajtalilo'obo' tu táan Yuumtzil. 12Ba'ale' le máaco'oba' beyo'ob le ba'alche'ob mina'an u na'ato'obo', cu síijilo'ob, chéen u ti'al ca chu'ucuco'ob yéetel u ti'al ca quiimsa'aco'ob. Cu t'aano'ob kaas tu yo'olal ba'alo'ob ma' táan u na'atico'ob; ba'ale' quíimico'ob je'el bix u quíimil le ba'alche'obo', 13táan u mukyajo'ob tu yo'olal le ba'ax dzo'oc u beetico'ob u mukyaj u láako'obo'. Cu tucultico'ob qui' u yóolo'ob iquil u náaisic u yóolo'ob sáamsamal yéetel u qui'imac óolalil yóokolcaab. Leti'obe' jun p'éel sublaquil yéetel jun p'éel wo'och'táanbail ca'aliquil cu láakintique'exo'ob ti' a kiinbesaje'ex, táan u náaisic u yóolo'ob yéetel u tuusil qui'imac óolalo'ob. 14Ma' tu páajtal u yilico'ob jun túul co'olel wa ma' yaan u dzíiboltico'ob; ma' tu ca'analo'ob kebanchajal. Cu tu'ubsico'ob le máaxo'ob ma' jedza'an u tuuculo'obo', jach canbalnaja'ano'ob ti' le dzuulilo'; máaco'ob kaakas t'anta'ano'ob. 15Saatal u máano'ob tumen dzo'oc u tzelicuba'ob ti' le toj bejo'. Táan u queticuba'ob yéetel profeta Balaam u paal Beor, máax tu yaabiltaj u náajaltic taakin iquil u beetic le kaaso', 16ba'ale' j ke'ey tu yo'olal u kebane' tumen jun túul x toot burra j t'aanaj je'el bix u t'aan máaque' yéetel ma' tu cha'aj ti'o' ca xi'ic tu paach u chocojo'olali'. 17Le máaco'oba' beyo'ob ch'e'eno'ob tu'ux mina'an ja'e', beyo'ob xan múuyalo'ob cu bisa'alo'ob tumen ka'amcach iike' xot kinta'ano'ob u ti'al u máanso'ob le kiino'ob mina'an u xuulo' ichil sen éekjoche'enil. 18Tumen yéetel ca'anal ichile' cu ya'alico'ob t'aano'ob mix ba'al u biilalo'ob, bey xan yéetel le ba'alo'ob kaastac suuc u beeta'alo'ob yéetel kaakas dzíibolal máaco'obe' cu táabsico'ob le máaxo'ob tu jaajil dzo'oc u púudzulo'ob ca'ach ti' le máaxo'ob cuxa'ano'ob ich tuuso'. 19Cu dzaa t'antico'ob jun p'éel jáalkab cuxtal ba'ale' leti'obe' palitzilo'ob ti' jun p'éel kaakas cuxtal. Tumen jun túul máaque' palitzil ti' le ba'ax dza'ancha'atico'. 20Tumen le máaxo'ob dzo'oc u kaj óoltico'ob c Yuumtzil yéetel c tocsajil Jesucristoe' yéetel dzo'oc u púudzulo'ob beyo' ti' u kasa'anilo'ob yóokolcaabe', wa cu dzo'ocole' cu cha'ico'ob u wo'oltalo'ob tu ca'a téen tumen le ba'alo'oba' yéetel cu dzáancha'atalo'ob tumeno'obe', asab kaas u p'áatalo'ob ti' le yanilo'ob ca'acho'. 21Tumen asab ma'alob u ti'alo'ob ca'ache' ma' u kaj óoltico'ob le toj bejo', que cu dzo'ocol u kaj óoltico'obe' ca u tzeluba'ob ti' le quili'ich a'almaj t'aan dzaab ti'obo'. 22Ba'ale' dzo'oc u yúuchul ti'obe' jach je'el bix cu ya'alic le t'aana': Le peeko' cu suut ti' le ba'ax tu xéajo', yéetel le x leech táant u p'o'obolo' cu suut u balkesuba ti' le luuko'.


Copyright
Learn More

will be added

X\