2 Corintios 8

1Bele', sucu'une'ex, c káat tzicbal ti' te'exe' bix dzo'oc u ye'esicubáa u siibal utzil Ku ti' u iglesiailo'ob u lu'umil Macedonia. 2Quex tumen le ba'alo'ob talamtac úuch ti'ob tu taasaj jun p'éel nojoch túuntaj óolal ti'obe', jach qui'imac u yóolo'ob, cu dzo'ocole' quex tumen jach táaj óotzilo'obe' tu dzajo'ob u siibalo'ob yéetel qui' óolal bey ayikalo'obe'. 3Teen jaacuntic, tu jaajil u yóolo'obe', tu dzajo'ob je'el bix cu páajtalo'obe'. 4Tu jach kaj óolto'ob to'on ca c ch'a'a u yáantajo'ob u ti'al le sucu'uno'obo'. 5Tu beetajo'ob u asabil ti' le c p'atic u beetico'obo', tumen tu kubjuba'ob táanile' ti' Yuumtzil, cu dzo'ocole' ti' to'on, je'el bix u káat Kue'. 6Bey túuno' dzo'oc c káat óoltic ti' Tito ca u dzo'oques ichile'ex xane' le utzil meyaja' je'el bix cáajic u beetico'. 7Tumen te'exe' ca máantíip'ile'ex ti' tuláacal ocsaj óolal, ti' ca'ansaj ti' kaj óolalil, ti' líiksaj óolal yéetel ti' yaacunaj ti' to'on; le o'olale' unaj a máan tíip'ile'ex xan ti' le utzil meyaja'. 8Ma' táan in wa'alic te'ex lela' bey jun p'éel a'almaj t'aane'; chéen in káat ca a káaj óolte'ex u nojoch óolal u láako'ob u ti'al ca ila'ac wa jaaj yaan a yaacunaje'ex. 9Tumen te'exe' dzo'oc a kaj óoltique'ex u siibal c Yuumtzil Jesucristo. Leti'e' ayikal ca'achi, ba'ale' tu yóotzilcuntubáa tu yo'olal u yaacunaj ti' te'ex, u ti'al ca ayikalchajque'ex tu yo'olal u yóotzilil leti'. 10U ti'al a wutzile'exe' quin wa'alic ba'ax quin tucultic tu yóokol le ba'alo'oba'. Te'exe' chu'unpaje'ex le ja'ab máano', ma' chéen u ti'al a beetique'ex wa ba'ax tu yo'olal lela', ba'ale' u ti'al a beetique'ex yéetel nojoch óolal. 11Bele' túuna' xeene'ex táanil u ti'al a dzo'ocbesique'ex, yéetel le nojoch óolal yaan ti' te'ex tu yáax chuuno', u ti'al a dzáique'ex a siibale'ex le buca'aj ca páajtale'exe'. 12Tumen wa jun túul máac tu jaajil u káat u dzáa wa ba'axe' Kue' cu kamic le ba'ax yaan ti' le máaco', leti'e' ma' táan u káatic le ba'ax mina'an ti' le máaco'. 13Ma' u káat u ya'ale' ca a máanse'ex óotzililo'ob tu yo'olal a wáantique'ex u láako'ob; 14ba'ax u káat u ya'ale' ca a queet áantaba'ex. Bele' ti' te'exe' yaan le ba'ax cu bineltic ti' leti'ob; ti' u láak kiine' leti'obe' bíin yanac le ba'ax cu bineltic ti' te'exo'. Beyo' ca queet áanticaba'ex, 15je'el bix cu ya'alic le Quili'ich Dzíibo': Le máax tu molaj ya'abe', ma' tip'chaj ti'; le máax tu molaj jun p'íite' ma' tu bineltaj tii'. 16Nib óolal ti' Ku, tumen tu dzaj tu pucsi'ikal Titoe' le sen tuucul je'el bix le yaan ti' teen ta wo'olale'exo'. 17Tumen tu kamaj in kuben t'aan, yéetel jach u dzaamaj u yóol u yáantique'exe', le o'olale' bele' tu juunaj u yóol cu bin u yile'ex. 18Táan c túuxtic yéetel Titoe' jun túul sucu'un tu yo'olal máax jach ma'alob u yúuchul t'aan ti' tuláacal le iglesiaobo' tu yo'olal u meyaj ti' u ma'alob péectzilil tocsajil. 19Ma' chéen lela', ba'ale' ti' le iglesiaobo' tu yéeyajo'ob le sucu'una' u ti'al u máan t éetel, yéetel u ti'al u yáanto'on ti' le utzil meyaja' jun p'éel meyaj c beetic u ti'al c nojbe'encuntic Yuumtzil yéetel u ti'al c e'esic c nojoch óolal. 20Ba'ax c káate' ca a wet' u ya'ala'al to'on ba'al tu yo'olal le ya'abcach siibalo'ob cu máano'ob t c kabo'. 21Tumen táan c ilic c beetic toj tuláacal ba'al, ma' chéen tu táan Yuumtzilil' ba'ale' tac tu táan máaco'ob. 22Táan c túuxtic tu yéetelo'obe' u láak ti' c sucu'uno'ob, máax dzo'oc u ye'esic to'on u nojoch óolal ya'ab u téenel, yéetel u asab ya'abil cu ye'esic bele' tu yo'olal le nojoch alab óolal u dzaamaj ti' te'exo'. 23Tu yo'olal Titoe', quin wa'alique' leti'e' in wéet meyaj u ti'al c meyajte'ex. Le u láak sucu'uno'obo' túuxta'abo'ob tumen le iglesiaobo', yéetel táan u nojbe'encuntico'ob Cristo. 24Le o'olale', u ti'al ca u yojéelto'ob le iglesiaobo', e'ese'ex ti'obe' jach tu jaajil u yaabiltmaje'exo'ob, yéetel ma'alob ba'ax c beetic iquil u qui'imactal c óol ta wo'olale'ex.


Copyright
Learn More

will be added

X\