2 Corintios 4

1Bey túuno' mix bikin cu lúubul c óol, tumen Ku ichil u ch'a'a óotzilile' tu kubentaj to'on le meyaja'. 2Dzo'oc c dzáic jun tzéelil le ba'ax cu beeta'al ich ta'acbilo' tumen subtzilo'ob; ma' táan c máan yéetel tuuso'ob mix táan c jelbesic u ma'alob péectzil Ku. Ba'ale' c a'alic chéen u jaajil, beyo' c kubenticbáa ti' u tuucul tuláacal máac tu táan Ku. 3Ba'ale' wa ta'aca'an le ma'alob péectzil c tze'ectico', ta'aca'an chéen u ti'alo'ob le máaxo'ob saatalo'obo'. 4Tumen tu yo'olal ma' táan u yocsaj óolo'obe', u kuil le yóokolcaaba' tu éekjoch'e'encunsaj u na'ato'ob u ti'al ma' u sáasjomenta'al u sáasilil u ma'alob péectzil Cristo máax qui'ichquelem, máax xan u chíicbesajil Ku. 5Tumen ma' táan c tze'ecticbáa to'oni', ba'ale' táan c tze'ectic Jesucristo máax Yuumtzil. To'one' chéen palitzilo'on ti' te'ex tu yo'olal u yaacunaj Jesús. 6Tumen le Ku tu túuxtaj ca sáasilchajac le sáasil ichil le éekjoch'e'enilo', leti' máax dzo'oc u beetic u sáasilchajal u sáasilil ti' c pucsi'ikal, u ti'al ca páatac c kaj óoltic yéetel le sáasilo' u nojbe'enil Ku cu léembal tu táan yich Jesucristo. 7Ba'ale' le ayikalila' ti' yaan ti' c wíinclile', le wíinclila' bey cuum beeta'an yéetel kate', u ti'al ca ila'aque' le nojoch páajtalila' ti' Ku u taal, ma' ti' to'oni'. 8Beyo', quex yaan to'on yaayaj óolalo'ob tuláacal tu'uxe', mix jun téen cu p'áatal mina'an tu'ux c jóokol. Quex yaan ba'ax c sen tuculte', mix jun téen cu sa'atal c óol. 9Quex c ch'a'apachta'ale', ma' táan c xúump'atta'al; quex c lúubsa'al lu'ume', ma' táan c xu'ulsa'al. 10Je'el tu'uxac ca xi'ico'one', mantadz c bisic t wíinclil u quíimil Jesús, u ti'al ca ila'ac ti' to'on xane' u cuxtal Cristo Jesús. 11Tumen to'one', ca'aliquil cuxa'ano'one', ti' yano'on tu táan quíimil sáamsamal tu yo'olal Jesuse' u ti'al ca ila'ac xan u cuxtal Jesús ti' le c wíinclil cu quíimila'. 12Bey túuno' le quíimilo' cu beetic u meyaj ti' to'on, ba'ale' le cuxtalo' cu beetic c meyaj ti' te'ex. 13Le Quili'ich Dzíibo' cu ya'alic: J ocsaj óolnajen le o'olale' j t'aanajen bey xan to'on, yéetel láili' le ocsaj óolalo', c ocsaj óol le o'olale' c t'aan. 14Tumen c ojele' Ku máax tu ca'a púut cuxquintaj Yuumtzil Jesuse', yaan u ca'a púut cuxquintico'on tac to'on yéetel Jesús; yéetel jun múuch' ta wéetele'exe' yaan u bisico'on ta táan. 15Tuláacal lela' j úuche' u ti'al a wutzile'ex, u ti'al beyo', wa ya'ab cu kamico'ob u dzaa utzilo'ob Kue', ya'ab xan cun u dza'ob nib óolal ti', u ti'al u nojbe'enil Ku. 16Le o'olale', mix jun téen cu lúubul c óol. Tumen quex le wíinclil táan u xu'upula', c pixane' sáamsamal cu túumbelchajal. 17Tumen le jun p'íit ba'ax c mukyajtic chéen jun súutuc ti' le cuxtala' cu taasic t óokole' jun p'éel nojbe'enil mina'an u xuul, jach táaj nojoch yéetel jach táaj ya'ab. 18Tumen ma' táan c p'atic le ba'alo'ob cu yila'alo'obo', ba'ale' le ba'alo'ob ma' tu yila'alo'obo'; tumen le ba'alo'ob cu yila'alo'obo' cu xu'ululo'ob, ba'ale' le ba'alo'ob ma' tu yila'alo'obo' ma' táan u xu'ululo'ob.


Copyright
Learn More

will be added

X\