2 Corintios 13

1Lela' u yóox páac in bin in xíimbalte'exa'. Tuláacal ba'ax yaan u dzo'ocpajal yéetel u t'aan ca'a túul wa óox túul jaajcunajo'ob. 2Ti' le máaxo'ob kebanchajo'ob táanilo' yéetel ti' tuláacale', bejela'a' náach in wanila' quin ca'a a'alic le tzol xiquin tin wa'alaj tin chi'il le ca tin xíimbalte'ex tu ca'a téeno': wa quin bin in xíimbalte'exe' ma' bíin in ch'a'a óotzilil ti' te'exi'. 3Bey túuno' je'el u yantal le chíiculal táan a caxtique'exo' wa tu jaajil Cristo cu t'aan ti' teen. Cristoe' ma' tu táan óoltique'ex yéetel x ma' muukil, ba'ale' cu ye'esic u páajtalil ichile'ex. 4Tu jaajile' j si'in ti' Cruz bey máax mina'an u muuke', ba'ale' cuxa'an tu yo'olal u páajtalil Ku. Bey xan to'on c táacpajal ti' u x ma' muukil, ba'ale' tumen nupano'on yéetele' yaan cuxtal tu yo'olal u páajtalil Ku u ti'al ca páatac c meyajtique'ex. 5P'is óoltaba'ex tu juunal a wóole'ex, u ti'al ca a wile'ex wa jeedzel a wanile'ex ti' le ocsaj óolalo'; p'is óoltaba'ex. ¿Ma' wa táan a wilique'ex ti' yaan Jesucristo ti' te'exe'? ¿Ja'ali' ma' jóokole'ex ma'alob ti' le p'is óolala'? 6Ba'ale' quin pa'atic ca a wile'exe' to'one' ma'alob jóokico'on. 7Yéetel c payalchi' ti' Ku u ti'al ma' a beetique'ex mix jun p'éel ba'ax kaas, ma' u ti'al ca ila'ac wa jóoko'on ma'alobi' ba'ale' chéen u ti'al ca a beete'ex ba'ax utz; quex chíicpajac bey kaas jóokico'one'. 8Tumen ma' tu páajtal c beetic mix ba'al tu contra le jaajo' ba'ale' chéen tu yo'olal le jaajo'. 9Le o'olal cu qui'imactal c óol wa mina'an c muuk, u ti'al ca yanac a muuke'ex te'ex, yéetel c payalchi' mantadz u ti'al ca chuca'an ma'alobchajque'ex. 10Quin dzíibtic te'ex le ju'una' ma'ili' xi'iquen in wile'exi', beyo' le quéen xi'iquen in wile'exe' ma' u ka'abéetchajal in chichcuntic in páajtalil ta wóokole'ex, páajtalil tu dzaj teen Yuumtzil u ti'al a wutzile'ex, ma' u ti'al a xu'ulsa'ale'exi'. 11Bele', sucu'une'ex ca xi'ic te'ex utzil. Caxte'ex a chuca'an ma'alobtale'ex ta cuxtale'ex, yanac te'ex qui'imac óolal, cuxlene'ex ichil jun p'éelili' óolal yéetel jéedzel óolal. U Kuil yaacunaj yéetel jéedzel óolale' bíin yanac ta wéetele'ex. 12Tziiquil t'antaba'ex ta baatzile'ex yéetel jun p'éel quili'ich dzu'udz. 13Tuláacal le sucu'uno'ob ti' le ocsaj óolalo' cu túuxtico'ob te'ex tziiquil t'aano'ob. 14U siibal Yuumtzil Jesucristo, u yaacunaj Junab Ku yéetel u nup óolal Quili'ich Pixane' ca yanac ta wéetele'ex tuláacale'ex. Amén.


Copyright
Learn More

will be added

X\