2 Corintios 11

1¡Quexi' ca páatac a mukyajtique'ex teen jun p'íit x ma' na'atile'! je'el bixaque', mukyajtene'ex. 2Tumen táan in canantique'ex yéetel jun p'éel canan cu taal ti' Ku; tumen dzo'oc in nupique'ex yéetel Cristo, yéetel in káat in taase'ex tu táan bey jun túul sujuy x ch'úupal mix ba'al kascuntmail, cu dzo'ocol u beel chéen yéetel jun túul j xiibe'. 3Ba'ale' je'el bix le caan tu tusaj Eva yéetel u kaakas tuuculo'obo', bey xan sajaquen ca a cha'a a tu'usule'ex yéetel ca tzele'ex a tuucule'ex ti' a kub óolale'ex ti' Cristo, tu'ux mina'an ca'a p'éel ichil mix kaasil. 4Tumen te'exe' ca wu'uyique'ex jach ma'alob le máax cu kuchul táan u tze'ectic jun túul Jesús jela'an ti' le c tze'ectic te'exo'. Ca kamique'ex xan jun túul Pixan jela'an ti' le dzo'oc a kamique'exo', bey xan jun p'éel péectzil jela'an ti' le ma'alob péectzil dzo'oc a wocsaj óoltique'exo'. 5Quin tucultique' tene' ma' chichanen tu tzéel le nucuch apóstolo'ob ca tzaypachtique'exo'. 6Quex istiquiail in t'aane', ma' beyen ti' ba'axo'ob in wojeli'. Lela' dzo'oc c e'esic te'ex mantadz yéetel tuláacal ba'ax dzo'oc c beetic. 7¿Tin beetaj wa kaas iquil tin tze'ectajil x ma' bo'olil u ma'alob péectzilil Ku, iquil tin chichancuntinbáa beyo' u ti'al in líiksique'ex te'ex? 8Tin kamaj taakin ti' u láak iglesiaob, iquil tu bo'otileno'obe' u ti'al in meyajtique'ex te'ex. 9Le ca yanchajen ichile'exe' ma' tin beetaj u xuup mix máac le ca kabéetchaj teen wa ba'axi', tumen le sucu'uno'ob Macedonia u taalo'obo' tu dzajo'ob teen ba'ax tu bineltaj teen. Beyo' tin canantaj ma' in béeytal bey jun p'éel cuuch u ti'al mix máac ichile'exi', bey quin in beet mantadzo'. 10Jach je'el bix in wojel in kaj óol u jaajil t'aan Cristoe', bey xan in wojel mix máac ti' tuláacal u lu'umilo'ob Acaya cun líiksic teen le qui'imac óolala'. 11¿Ba'axten quin t'aan beyo'? ¿Tumen ma' in yaabilmaje'exi'? Kue' u yojel buca'aj in yaabiltmaje'ex. 12Ba'ale' bin in ca'aj in beet mantadz le ba'ax quin beetica', u ti'al c luksic tu'ux u t'aano'ob le máaxo'ob táan u caxtico'ob bix je'el u queticuba'ob t éetele' ti' le meyaj iquil u nojba'alcunsicuba'obo'. 13Tumen leti'obe' ma' u jaajil apóstolo'obi', chéen j tuuso'ob, máaxo'ob cu chíicbesicuba'ob bey a apóstolo'ob Cristoe'. 14Lela' ma' u ti'al jak óolali', tumen Satanase' cu chíicbesicubáa bey jun p'éel u ángel u sáasilile'. 15Le o'olale' tzaa ca úuchuque' le máaxo'ob cu meyajtico'ob Satanase' cu chíicbesicuba'ob xan bey máaco'ob cu beeticuba'ob ba'al utze'. Ba'ale' leti'obe' yaan u dzo'ocolo'ob je'el bix cu najmatic u meyajo'obe'. 16Tu ca'a téen quin wa'alic te'ex: mix máac ca u tuculte' wa dzo'oc u chocotal in pool; ba'ale' wa ca tucultique'ex beyo', cha'ex in t'anique'ex bey jun túul máac dzo'oc u chocotal u pool, u ti'al ca páatac u ca'analtal in wich tac teen. 17Lela' ma' táan in wa'alic tumen Yuumtzil u káat ca in wa'ale', ba'ale' bey jun túul máac dzo'oc u chocotal u poole', iquil tin wa'aljilac u ca'analtal in wich. 18Bey tumen yaan ya'ab máaco'ob cu ca'analtal u yicho'ob ti' u ba'alilo'ob le yóokolcaaba', bey xan teen bin in ca'aj ca'analtal in wich. 19Tumen bey te'ex jach yaan a na'ate'exo', ca mukyajtique'ex yéetel ma'alob óolal le máaxo'ob dzo'oc u chocotal u poolo'obo'. 20Tumen te'exe' ca mukyajtique'ex le máax beetic a meyaje'ex quex ma' a káate'exi', wa le máax cu ch'a'ic ba'ax yaan ti' te'exo', wa le máax cu palitziltique'exo' wa le máax cu cúulpachcuntique'exo', wa le máax cu lajique'exo'. 21¡Quex sublaquen iquil in wa'alique', to'one' ma' kuchpaj c óol c beet lelo'! Ba'ale' wa u láako'ob cu ca'analtal u yicho'obe', bey xan teen je'el u ca'analtal in wiche', quex táan in wa'alic yéetel choco jo'olal. 22¿Hebreob leti'ob? Bey xan teen. ¿Ti' u caajal Israel u taalo'ob? Bey xan teen. ¿U ch'i'ilancabilo'ob Abraham? Bey xan teen. 23¿U palitzilo'ob Cristo? Tene' asab, quex táan in t'aan bey jun túul máac choco u poole'. Tumen dzo'oc in meyaj asab ti' leti'ob, dzo'oc in ka'alal asab ya'ab u téenel, yéetel ya'ab u téenel anaja'anen tu táan quíimil. 24Cinco u téenele' le judíobo' tu jadzeno'ob yéetel treintinueve u puulul jaadz. 25Óox téen u jadzmeno'ob yéetel che', jun téen u ch'i'inch'ineno'ob yéetel tuunich. Óox téen in mukyajmaj u búulul u cheemil tu'ux quin bino', yéetel jun téen in máamsmaj jun p'éel áakab yéetel jun p'éel kiin tu yóokol taamcach ka'anab. 26Ya'ab tu'ux dzo'oc in máan yéetel in wilminbáa ich sajbe'entzil tu'ux cu yáalcab ja'ob, ich sajbe'entzil tu kab j oocolo'ob, ich sajbe'entzil tu kab in wéet caajalo'ob bey xan tu kab táanxel caajilo'ob. In wilminbáa ich sajbe'entzilo'ob ti' caaj, ti' x tocoy lu'um, yéetel ti' ka'anab, yéetel ich sajbe'entzilo'ob tu kab le máaxo'ob ma' u jaajil sucu'uno'obo'. 27Dzo'oc u yantal teen meyajo'ob yéetel talamilo'ob; ya'ab u téenel p'aatalen x ma' wenelil; in mukyajmaj wi'ij yéetel ukaj; in su'ukintmaj ya'ab u téenel; in mukyajmaj yéetel p'aatal mina'an in nook. 28Tu yóokol lelo'oba' yéetel u láak ba'alo'obe', sáamsamal quin wu'uyic u aalil in sen tuucul tu yo'olal tuláacal le iglesiaobo'. 29Wa yaan máax mina'an u muuke', bey teen mina'an in muuke'. Wa cu beeta'al u lúubul wa máaxe', teen quin mukyajtic sublaquil yéetel kuuxil. 30Wa kabéet in nojbe'encunsiquinba'e', quin nojbe'encunsiquinbáa tu yo'olal le ba'alo'ob cu ye'esico'ob mina'an in muuko'. 31U Ku yéetel u Taata c Yuumtzil Jesucristo, máax cu najmatic u quili'ichcunta'al mantadze', u yojel táan in wa'alic u jaajil. 32Le ca j anjien Damascoe', le jalach wíinic cu meyajtic ajaw Aretaso', tu dzaj máaco'ob u ti'al canantic u jool najil le caajo' u ti'al ca u mach u biseno'ob; 33ba'ale' j dzaaben ti' jun p'éel xaaque' ca jalkesa'aben tu paachil le caajo' ti' jun p'éel u joolil le pako', beyo' j púudzen tu kab.


Copyright
Learn More

will be added

X\