2 Corintios 10

1Teen Pablo, quin káat óoltic te'ex tu yo'olal u muunil yéetel u yutzil u pucsi'ikal Cristo. Cu ya'ala'ale' jach cabal in wóol ca'aliquil ti' yanen ta wéetele'exe', ba'ale' dzíic in t'aan ta wo'olale'ex ca'aliquil náach yanen ti' te'ex. 2Ma'alob, quin káat dzíidzic t'antic le máaxo'ob cu taquico'ob c pool táan u ya'alico'obe' táan c beetic ba'alo'ob chéen tu yo'olal u dzíibolal máaco'ob. Tumen in dzaamaj in wóol in wilquinbáa tu yéetelo'ob. 3Quex tumen lu'umcabilo'one' ma' táan c ba'atel je'el bix u máaquilo'ob le yóokolcaaba'. 4Tumen u nu'uculilo'ob c ba'atele' ma' yóokolcaabilo'obi', ba'ale' u nuuquilo'ob c ba'ate'ele' yaan u páajtalil Ku ti'ob u ti'al u xu'ulsico'ob nucuch pakil najo'ob. 5Bey túuno', c xu'ulsic le tac poolo'obo' bey xan je'el ba'alac ca líikic yéetel ca'anal ichil u ti'al u wet'ic u kaj óolta'al Kue'. tuláacal lu'umcabil tuucule' c dzáic yáanal u páajtalil u tuucul Cristo, u ti'al u yu'uba'al u t'aan leti', 6yéetel c dzaamaj c óol u ti'al c jadzic tuláacal máax ma' tu yu'ubic t'aane', le quéen a wu'uye'ex t'aan jach tu beelil. 7Te'exe' ma' ta wilique'ex wa ma' chéen u chica'anil ba'al. Wa yaan máax jach cu yu'ubicubáa u ti'al Cristoe', unaj u tucultique' bey xan to'on u ti'alo'on Cristo. 8Tumen quex ca in wa'al jun p'íit asab ti' le unaj tu yo'olal c páajtalile', mina'an u ba'ax o'olalil in ch'a'ic subtal, tumen Yuumtzil dzáa to'on le páajtalila' u ti'al c beetic a ch'íijile'ex ti' a pixane'ex, ma' u ti'al c xu'ulsique'exi'. 9Ma' in káat ca chíicpajac bey in káat in ja'as a wóole'ex yéetel le ju'un quin túuxtic te'exa'. 10Cu ya'ala'ale' le ba'axo'ob quin wa'alic te j ju'uno'ob quin dzíibtico' chichtac yéetel mu'ukantac, ba'ale' tene' mina'an in muuk, yéetel in t'aane' ma' kambe'eni'. 11Ba'ale' le máax cu ya'alic lela' unaj u yojéeltique' bey je'el bixo'on ti' c dzíibo'ob ca'aliquil náach yano'on ti' te'exe' bey xan bíin c béeytal yéetel ba'ax c beetic le quéen yanaco'on ta wéetele'exe'. 12Ma' táan u kuchpajal c óol queticbáa wa c béeytal je'el bix dze'edzec máaxo'ob cu qui'iqui' t'anticuba'obo'. Leti'obe' táan u beetico'ob jun p'éel x ma' na'atil ba'al, iquil u p'isicuba'ob yéetel u queticuba'ob tu baatzilo'ob je'el bix u tucultico'obe'. 13To'one' ma' tu máantíip'il u ca'analtal c ich, ba'ale' to'one' c p'isicbáa yéetel le p'isib u dzaamaj to'on Kuo' iquil tu beetil c kuchul tac ta wicnale'ex Corinto. 14Le o'olale' ma' táan c píitmáan ti' le p'isib dza'an to'ono' bey je'el u yúuchul ca'ach wa ma' c antal táanil ta wéetele'exe'. Tumen to'on yáax bis te'ex u ma'alob péectzilil Cristo. 15Ma' táan u ca'anatal c ich tu yo'olal jun p'éel Meyaj tu beetaj yaanal, bey to'on beetmaile'. Ma' beyi', ba'ale' c p'atic ca páatac c meyaj asab ichile'ex le quéen yanac te'ex asab ocsaj óolale' ba'ale' láili' ichil le p'isib dza'an ti' to'ono'. 16Cu dzo'ocole' c tuclic c bin u ti'al c tze'ectic le ma'alob péectzilo' ti' le cúuchilo'ob yano'ob mas paachil ti' te'exo', u ti'al ma' u ca'analtal c ich tu yo'olal le meyaj beeta'an tumen yaanalo'. 17Wa yaan máax cu qui'iqui' t'anticuba'e' u qui'iqui' t'antubáa ti' Yuumtzil. 18Tumen ma' le máax cu qui'iqui' t'anticubáa tu juunal u yóole' leti' máax kambe'eni', ba'ale' le máax cu qui'iqui' t'anta'al tumen Yuumtzile'.


Copyright
Learn More

will be added

X\