1 Timoteo 4

1Ba'ale' Quili'ich Pixane' jach t'áalcab cu ya'alique' ti' le dzo'oc kiino'obo' yaan dze'edzec bíin u tzeluba'ob ti' le ocsaj óolalo', u ti'al u bino'ob tu paach pixano'ob cu tuuso'ob yéetel u ti'al u yu'ubico'ob ca'ansajo'ob ti' kaakas pixano'ob u taalo'ob. 2Bíin u yu'ubo'ob u t'aan máaco'ob ca'a p'éel icho'ob yéetel j tuuso'ob, mixba'al yajcuntic u yóol u na'ato'ob, tumen u na'ato'obe' bey dzo'oc u tóoca'al yéetel jun p'éel chacjole'en hierroe'. 3Le máaco'oba' cu wet'ico'ob u dzo'ocol u beel máac bey xan cu wet'ico'ob u jaanta'al dze'edzec janalo'ob; quex tumen Ku beet le janalo'obo' u ti'al ca jaanta'ac tumen le j ocsaj óolo'obo' yéetel le máaxo'ob u kaj óolo'ob le jaajo' táan u dzáico'ob nib óolal ti' Yuum Ku. 4Tumen tuláacal ba'ax tu beetaj Kue' ma'alob, ma' unaj c p'ectic mixba'ali', ba'ale' unaj c kamic yéetel c dzáic nib óolal ti' Ku, 5tumen cu quili'ichcunta'alo'ob yéetel u t'aan Ku bey xan yéetel le payalchi'o'. 6Wa ca ca'ansic ti' le sucu'uno'ob lela', jun túulech u ma'alob palitzil Jésucristo, yéetel yaan a tzéenticabáa yéetel u t'aanilo'ob le ocsaj óolalo' bey xan yéetel le ma'alob ca'ansaj dzo'oc a tzaypachtico'. 7Ba'ale' ma' a beetic u cuentail lu'umcabil yéetel x ma' na'atil tzicbalo'ob. Mu'uka'ancuntabáa ti' a kub óolal ti' Ku; 8tumen quex u mu'uka'ancunta'al le wíinclil yaan u biilalo' le u kubic u yóol máac ti' Kuo' ma'alob u ti'al tuláacal ba'al, tumen cu taasic to'on náajal u ti'al le cuxtala' bey xan u ti'al le cuxtal bíin taalaco'. 9Lela' jach jaaj, tuláacal máac unaj u yocsaj óoltic. 10Tu yo'olal lela' c meyaj yéetel c mukyajtic pooch'ilo'ob, tumen dzo'oc c dzáic c alab óolal ti' le cuxa'an Kuo', máax u J tocsajil tuláacal máaco'ob, asab le máaxo'ob cu yocsaj óolo'obo'. 11A'al ca beeta'ac yéetel ca'ans le ba'alo'oba'. 12Mix máac ca u mixba'alcunt a táanquelemil; ba'ale' e'es ti' le j ocsaj óolo'obo' bix unaj u yúuchul cuxtal, ti' a t'aan, ti' a xíimbal, ti' a yaacunaj, ti' a wocsaj óolal yéetel ti' u tojil a cuxtal. 13Ca'aliquil in kuchule', dzáa a wóol xooc, tzol xiquin yéetel ca'ansaj. 14Ma' a cha'ic u mixba'altal le páajtalil j dza'ab techo' tu yo'olal u t'aan Ku le ca tu dzáa u kabo'ob le Presbiterio ta wóokolo'. 15Dzáa tuláacal a wóol ti' le ba'alo'oba', u ti'al ca páatac u yila'al tumen tuláacale' bix a bin táanil. 16Canantabáa teech yéetel canant ba'ax ca ca'ansic, jéedzel p'áaten xan ti' tuláacal. Wa ca beetic lela', bíin a tocabáa teech yéetel bíin a toc xan le máaxo'ob u'uyiquecho'.


Copyright
Learn More

will be added

X\