1 Thessalonians 2

1Te'exe' a wojele'ex, sucu'une'ex, ma' cunelchaj binico'on xíimbalte'exi'. 2U jaajile', quex po'och'o'on yéetel ja'ajadza'abo'on tu caajil Filipos, je'el bix dzo'oc a wojéeltique'exo', Kue' tu yáanto'on u ti'al ca c tze'ect te'ex le ma'alob péectzilo' yéetel tuláacal kub óolal, chúumuc ti' jun p'éel nojoch ch'a'apachtajil. 3Tumen ma' keechel c tuucul ti' ba'ax c tze'ectiqui', mix táan c t'aan yéetel kaakas tuuculo'obi', mix yéetel tuusi'. 4Ba'ax ucha'ane' Kue' tu kamajo'on yéetel tu kubentaj to'on le ma'alob péectzilo', bey túun úuchic c t'aano'. Ma' táan c caxtix c lúubul utzil tu táan máaco'ob, ba'ale' tu táan Ku, máax xakaltic c pucsi'ikal. 5Je'el bix a wojelile'exe', mix jun téen t qui' óol t'antaje'ex yéetel jadzutz t'aano'ob, mix t caxtaj ba'al c a'al te'ex u ti'al c náajaltic taakin. Kue' u yojel lela'. 6Mix jun téen t caxtaj nojbe'enil ichil máaco'obi', mix ichile'exi' mix ichil u láako'obi' quex tumen cu páajtal ca'ach c beetic wu'uyique'ex u muukil c páajtalil je'el bix máaxo'ob túuxta'ano'ob tumen Cristoe'. 7Ba'ax t beetaje', táan óoltaje'ex yéetel muumun óolal, je'el bix jun túul maamatzil cu tzéentic yéetel cu canantic u mejen paalalo'obe'. 8Jach c yaabiltmaje'ex le o'olale' je'el c óoltic ca'ach c dzáa te'ex ma' chéen u ma'alob péectzilil Kui', ba'ale' tac c cuxtal, tumen dzo'oc c kuchul c yaabilte'ex jach ya'ab. 9Sucu'une'ex, cu ka'ajal te'ex bix meyajnajo'on yéetel c mukul muuknajo'on u ti'al ca cuxlaco'on. Meyajnajo'on yéetel kiin bey xan yéetel áakab, u ti'al ma' c dzáic mix jun p'éel cuuch ti' mix jun túul te'ex ca'aliquil táan c tze'ectic te'ex u ma'alob péectzil Ku. 10Te'ex jaajcuntic, bey xan Ku, to'one' xíimbalnajo'on yéetel utzil bey xan yéetel tojil ta wéetele'ex máax j ocsaj óole'ex, ma' t dzáa tu'ux u ta'acal c pool tumen mix máaqui'. 11Bey xan a wojele'ex bix t líiksaj u yóol yéetel t qui'imaccunsaj u yóol cada jun túul ti' te'ex, je'el bix u beetic jun túul taatatzil yéetel u paalalo'obe'. 12C kubentmaj te'ex ca cuxlaque'ex je'el bix unaj u cuxtal le máaxo'ob u ti'alo'ob Kuo', máax t'ane'ex u ti'al ca táacpajque'ex ti' u ajawil yéetel ti' u nojbe'enil. 13Tu yo'olal lela' mantadz c dzáic nib óolal ti' Ku, tumen le ca ta wu'uyaje'ex u ma'alob péectzil Kue', le t tze'ectaj to'on ti' te'exo', ta kamaje'ex je'el bix u ma'alob péectzil Kue' ma' je'el bix u ma'alob péectzil máaco'obe'. Jach tu jaajile' u ma'alob péectzil Ku, le cu dzáic u yicho'ob ti' te'ex máaxe'ex ca wocsaj óole'exo'. 14Sucu'une'ex, le ca ta mukyajte'ex ch'a'apachtajil tu kab a wéet caajale'exo'obe' j úuch ti' te'ex le ba'ax úuch ti' le u iglesiaob Ku yano'ob Judeao' yéetel u ti'alo'ob Cristo Jesuso', tumen leti'obe' ch'a'apachta'abo'ob xan tumen u yéet caajalo'ob, le judíobo'. 15Le judíoba' tu quiimsajo'ob Yuumtzil Jesús, je'el bix tu quiimsilaco'ob le aj bóobato'obo', yéetel tu tojolch'into'ono'ob to'on. Ma' tu lúubulo'ob utzil tu táan Kui' yéetel ti' yano'ob tu contra tuláacal máaco'obe', 16tumen le quéen c óolt t'aan le máaxo'ob ma' judíobo' u ti'al ca to'ococo'ob xane', ma' táan u cha'aico'ob c beetic. Bey túuna' táan u mas ya'abcuntico'ob u kebano'ob. Ba'ale' bele, u yaayaj jaadz Kue' dzo'oc u taal tu yóokolo'ob. 17Sucu'une'ex, le ca t p'ataje'ex tu yo'olal dze'edzec kiino'obe' quex ma' táan c ilique'exe', mantadz ti' yane'ex t pucsi'ikale', yéetel túun ya'abcach dzíibolale' c káat ca c ile'ex. 18T óoltaj bin, teen Pablo, dze'edzec u téenel tin wóoltaj bin, ba'ale' tuláacal u téenele' Satanase' ma' tu cha'aj to'oni'. 19Tumen, ¿máacalmáac c alab óolal, wa c qui'imac óolal, wa ba'ax óolalil u yantal to'on nojbe'enil? ¿ma' wa te'ex le quéen taalac c Yuumtzil Jesucristoi'? 20Bey, te'ex c nojbe'enil yéetel c qui'imac óolal.


Copyright
Learn More

will be added

X\