1 Thessalonians 1

1Teen Pablo, bey xan Silvano yéetel Timoteo, ti' u sucu'unilo'ob yaan tu caajil Tesalónicao', máaxo'ob nupa'ano'ob ti' Ku le taatao yéetel ti' Yuumtzil Jesucristo. Ca yanac te'ex siibal utzil yéetel jéedzel óolal. 2Mantadz c dzáic nib óolal ti' Ku tu yo'olal tuláacale'ex, yéetel c ka'ajsique'ex ichil c payalchi'ob. 3C ka'ajsic tu táan Ku yéetel tu táan c Taatae' yéetel buca'aj ocsaj óolal meyajnajique'ex, yéetel buca'aj yaacunaj táan óolnajique'ex, yéetel bix p'aatlil jach jeedzel a alab óolale'ex ti' c Yuumtzil Jesucristo. 4Sucune'ex Kue' u yaabilmaje'ex, yéetel c ojele' leti' u yéeymaje'ex. 5Tumen le ca t tze'ectaj te'ex le ma'alob péectzilo' ma' t beetaj yéetel chéen t'aano'obi', ba'ale' yéetel xan u páajtalil Quili'ich Pixan, bey xan yéetel u chuca'anil alab óolalil le péectzila' leti' u jaajil. Ma'alob a wojelile'ex bix xíimbalnajico'on ichile'ex u ti'al a wutzile'ex. 6Te'ex xane', xíimbalnaque'ex je'el bix c xíimbal to'one', bey xan je'el bix xíimbalnajic Yuumtzile', yéetel ta kame'ex le ma'alob péectzilo' yéetel jun p'éel qui'imac óolal cu dzáic te'ex le Quili'ich Pixano', quex tu tojoltaj te'ex ya'abcach mukyajilo'ob. 7Bey túuna' ta we'esaje'ex ti' tuláacal le ocsaj óolo'ob tu lu'umilo'ob Macedonia yéetel Acayao', Bix unaj u yúuchul xíimbal. 8U jóokbal ti' te'exe' u ma'alob péectzil Yuumtzile' dzo'oc u t'i'it'pajal ma' chéen Macedonia yéetel acayai', ba'ale' tuláacal tu'ux, yéetel ojéela'an le ocsaj óolal yaan te'ex ti' Yuum Kuo', bey túuno' to'one' ma' kabéet c a'alic mix ba'ali'. 9Ba'ale' leti'ob cu tzicbaltico'ob bix binico'on c xíimbalte'ex bey xan cu ya'alico'ob yéetel buca'aj utzil ta kamilajico'one'ex, yéetel bix ta p'atilaque'ex le beetbil kuo'obo' u ti'al a tzaypachtique'ex Ku yéetel u ti'al a meyajtique'ex le cuxa'an yéetel u jaajil Kuo'. 10Bey xan cu tzicbaltico'ob bix te'exe' táan a pa'atique'ex u suut Jesús, u Paal Ku, le máax yaan te j ca'ano', le máax xan ca'a púut cuxquinta'ab tumen Kuo'. Leti' máax toquico'on ti' le yaayaj jaadz cu taalo'.


Copyright
Learn More

will be added

X\