1 San Pedro 5

1Quin tzol xiquintic u ancianoilo'ob le u múuch'ul le ocsaj óolo'ob yano'ob ichile'exo', tumen tene' ancianoen je'el bix leti'obe' yéetel jun túulen u jaajcunajil u mukyajo'ob Cristo, bey xan je'el bix leti'obe' yaan in táacpajal ti' le nojbe'enil bíin chíicapajac tu dzooco'. 2Canante'ex je'el bix canan j tamano'obe' le u j tamano'ob Ku kubenta'an te'exo'; beete'ex yéetel ma'alob óolal, je'el bix u káat Kue', ma' tumen táan u tza'abal te'exi', mix tumen táan a dzíiboltique'ex taakini'. Beete'ex a meyaje'ex yéetel ma'alob óolal, 3ma' bey te'ex u yuumil le ba'ax ca canantique'exo', ba'ale' beete'ex tac tu'ux cu páajtal a we'esique'ex ma'alob bej ti' le j tamano'obo'. 4Beyo', le quéen chíicapajac le nojoch J canan j tamano', te'exe' bíin a kame'ex jun p'éel nojbe'en péet jo'ol ma' teech u kastal. 5Bey xan te'ex, táanquelem máaque'ex, dza'aba'ex yáanal u kab le anciano'obo'. Tuláacale'ex unaj a dzáicaba'ex yáanal a kabe'ex ta baatzile'ex yéetel cabal óolal, tumen: Kue' cu xachicubáa ti' le j ca'ana'al icho'obo', ba'ale' cu dzáic u siibal utzil ti' le máaxo'ob cabal u yóolo'obo'. 6Cabalchajac túun a wóole'ex yáanal u páajtalil u kab Ku, u ti'al ca líiksaque'ex tumen leti' le quéen kuchuc u kiinil. 7P'ate'ex tuláacal a yaamyam óolale'ex tu kab Ku, tumen leti'e' u dzaamaj u yóol u canante'ex. 8Il a wile'ex ma'alob ba'ax ca beetique'ex yéetel p'il ichnene'ex; tumen a enemigoex le kaasil ba'alo', táan u máan je'el bix león cu yáacame', táan u caxantic máax u luuke. 9Xachaba'ex ti', mu'uka'an jeedzele'ex ti' le ocsaj óolalo', tumen a wojele'ex a sucu'une'ex ti' tuláacal yóokolcaabe' táan u mukyajtico'ob xan le ba'alo'ob ca mukyajtique'exo'. 10Ba'ale' cu dzo'ocol a mukyaje'ex tu yo'olal jun p'íit kiine', Kue' bíin u beete'ex jach toje'ex, jeedzel a wanile'ex, mu'ukane'ex yéetel ma'alob a wanile'ex. Leti' u Kuil tuláacal siibal utzil máax dzo'oc u t'anico'on u ti'al ca táacpajaco'on ti' u nojbe'enil mina'an u xuul jun múuch' yéetel Jesucristo. 11Ti' leti' ca dza'abac le nojbe'enilo' yéetel le páajtalilo' u ti'al kiino'ob mina'an u xuul jun múuch' yéetel Jesucristo. Amen 12Yéetel u yáantaj silvano', máax quin tucultic jun túul sucu'un chuca'an u yóole', quin dzíibtic te'ex le chan ju'una' iquil in tzol xiquintique'ex yéetel quin wa'alic te'exe' le ba'ax dzo'oc a kamique'exo' jach tu jaajil u siibal utzil Ku. Jéedzel p'áatene'ex ti'. 13Le iglesia yaan Babiloniao', le yéeya'an xan tumen Ku je'el bix te'exe', cu túuxtic te'ex tziiquil t'aano'ob, bey xan in paal Marcos. 14Tziiquil t'antaba'ex ta baatzile'ex yéetel u dzu'udzil yaacunaj sucu'untzilo'ob. Ca yanac jéedzel óolal ti' tuláacale'ex máaxe'ex u ti'ale'ex Jesucristo.


Copyright
Learn More

will be added

X\