1 San Pedro 3

1Bey xan te'ex atantzile'ex, dzáaba'ex yáanal u kab a wíichame'ex, u ti'al beyo' wa yaan ti' leti'ob ma' táan u yocsaj óoltico'ob le ma'alob péectzilo', ca kuchuc u yocsaj óolto'ob tu yo'olal bix a cuxtale'ex te'ex, quex ma' a wa'alique'ex mix ba'al 2le quéen u yilo'ob a toj yéetel tziiquil cuxtale'ex. 3A jadzutzile'exe' ma' u yantal ti' yo'ocabil ba'alo'ob, je'el bix u niqui' xáache'eta'al u tzo'otzel poole', jadzutz ba'alo'ob beeta'an yéetel oro wa co'ocoj nooko'ob, 4ba'ale' a jadzutzile'exe' unaj u yantal tu dzu' a pucsi'ikale'ex, jun p'éel qui'ichquelemil ma' táan u sa'atal, tumen ti' yaan ti' jun p'éel ch'ujuc jéedzel óole', tumen lela' jach nojoch u tojol tu táan Ku. 5Tumen ti' le úuchben kiino'obo' bey tu jadzutzquintuba'ob le quili'ich co'olelo'obo' leti'obe' tu alab óoltajo'ob Ku yéetel tu dzajuba'ob tu yáanal u kab u yíichamo'ob. 6Bey tu beetil Sara, máax tu yu'ubaj u t'aan Abraham yéetel tu ya'alaj in yuumtzil ti'. Te'exe' bíin kuchuque'ex béeytal je'el bix leti'e', wa ca beetique'ex ba'ax utz yéetel wa ma' sajaque'ex ti' mix ba'ali'. 7Bey xan te'ex íichamtzile'ex, muunchajac a pucsi'ikale'ex u ti'al a watane'ex. Dza'ex ti'ob le tziiquil unaj u dza'abal ti'obo', ma' chéen tumen asab muun u wíinclil le co'olelo'obo', ba'ale' tumen leti'obe' yaan ti'ob xan le cuxtal u dzaamaj te'ex Ku ichil u ch'a'a óotzililo'. Beete'ex beyo' u ti'al ma' u ka'akatcubáa mix ba'al ti' a payalchi'ex. 8U dzooque' cuxlene'ex tuláacale'ex ichil jun p'éelili' tuucul bey xan yéetel ch'a'a óotzilil ta baatzile'ex, yaabiltaba'ex je'el bix sucu'uno'obe'. Yanac te'ex muumun pucsi'ikal bey xan cabal óolal. 9Ma' a sutique'ex kaas tu yo'olal kaas, mix pooch'il tu yo'olal pooch'il. Ba'ax unaje' sute'ex qui'iqui' t'aan, tumen Kue' dzo'oc u t'anique'ex u ti'al a kamique'ex qui'iqui' t'aan. 10Tumen: Le máax u káat u yaabilt le cuxtala' yéetel u máans kiino'ob yéetel qui'imac óolale', unaj u canantic u yaak ma' u ya'alic ba'al kaas mix u ya'alic tuuso'ob yéetel u bóoxel u chi'. 11Unaj u tzelicubáa ti' le kaaso' ca u beet ba'ax utz, u caxant le jéedzelo' ca u tzaypachte. 12Tumen Yuumtzile' cu canantic le máaxo'ob toj u cuxtalo'obo' yéetel cu yu'ubic u payalchi'ob, ba'ale' ti' yaan tu contra le máaxo'ob cu beetico'ob ba'ax kaaso'. 13¿Máax je'el u páajtal u beetic te'ex kaas, wa te'ex mantadz táan a beetique'ex le utzo'? 14Ba'ale' quex mukyajnaque'ex tu yo'olal a toj cuxtale'exe', bíin qui'imac óolchajque'ex. Ma' a ch'a'ique'ex sajquil ti' mix máac, mix u péec a wóole'ex, 15ba'ale' tziquilte'ex Cristo je'el bix Yuumtzil ta pucsi'ikale'exe'. Mantadz u nu'uctmaje'ex u ti'al a núuquique'ex ti' tuláacal ca u káato'ob a chi'e'x tu yo'olal le alab óolal yaan ti' te'exo', ba'ale' beete'ex yéetel cabal óolal bey xan yéetel tziiquil. 16Cuxlene'ex ma'alob u ti'al ca yanac jéedzel ti' a tuucule'ex, u ti'al ca sublacchajco'ob ti' u t'aano'obe' le máaxo'ob cu t'aano'ob kaas tu yo'olal a ma'alob cuxtale'ex je'el bix u yocsaj óolo'ob Cristoe'. 17asab ma'alob u yúuchul mukyaj tu yo'olal u beeta'al utz, wa bey u káat Kuo', que tu yo'olal u beeta'al kaas. 18Tumen Cristoe' tu mukyajtaj le quíimilo' tu yo'olal c kebano'obe' jun téenili' u ti'al mix bikin. Leti'e' utz, ba'ale' mukyajnaj t o'olal to'on máaxo'on kasa'ano'on, u ti'al u bisico'on ti' Ku. J quíim ti' u wíinclil, ba'ale' cuxa'an ti' u pixan. 19Ti' le pixan xano' j bine' ca tze'ecnaj ti' le pixano'ob kala'ano'obo'. 20Lelo'oba' tu beeto'ob u x ma' u'uyaj t'aanilo'ob ti' le úuchben kiino'obo' ti' u kiinilo'ob Noe', le ca'ach táan u pa'ataj Ku yéetel chuca'an óolal ca'aliquil táan u beeta'al le cheemo', tu'ux dze'edzec máaco'ob ocho u túululo'ob, j to'oco'ob tu yo'olal le ja'o'. 21Le ja'o' cu que'etel yéetel u ja'il le ocja'o', tu yo'olal ba'ax c to'ocol bejela'e'. Le ocja'o' ma' u káat u ya'al u p'o'obáil le wíinclilo' ba'ale' cu káatal ti' Ku jun p'éel tuucul toj; yéetel cu toquico'on yéetel u ca'a púut cuxtal Jesucristo, 22máax na'ac ca'an yéetel ti' yaan tu x no'oj kab Kue'; yáanal u kabe' ti' yaan xan le ángelo'obo', le jalacho'obo' yéetel le páajtalilo'obo'.


Copyright
Learn More

will be added

X\