1 San Pedro 2

1Le o'olale' p'ate'ex tuláacal u jejeláasil kaas, tuláacal tuusil, ca'a p'éel ichil yéetel kaakas dzíibolalil, yéetel tuláacal u jejeláasil a'alaj ba'al. 2Je'el bix paalalo'ob táant u síijilo'obe' dzíibolte'ex yéetel yaamyamil le pixanbe'en leche mina'an u kasa'anilo', u ti'al ca ch'íijique'ex tu yo'olal yéetel ca yanac te'ex tocsajil, 3wa tu jaajil dzo'oc a wilique'ex Yuumtzile' utz. 4Co'ox nadzicbáa, túun ti' Yuumtzil, je'el bix ti' jun p'éel cuxa'an tuunich p'ecta'an tumen máaco'ob, ba'ale' yaabilta'an tumen Ku je'el bix jun p'éel tuunich yéeya'an yéetel nojoch u tojole'. 5Te'ex xane', je'el bix cuxa'an tuunicho'obe', cha'ex a meyajta'ale'ex tumen Ku, ca u beet ti' te'exe' jun p'éel pixanbe'en naj, jun múuch' kiino'ob quili'ichcunta'ano'ob, máaxo'ob tu yo'olal Jesucristoe' cu dzáico'ob pixanbe'en siibalo'ob cu páajtal u ka'amalo'ob tumen Ku. 6Le o'olal xane' le Quili'ich Dzíibo' cu ya'alic: Tene' quin dzáic Sión jun túul máax u noj tuunichil le najo', jun p'éel tuunich yéeya'an yéetel nojoch u tojol; le máax cu yocsic u yóol ti'e' ma' bíin sublaccunta'aqui'. 7A ti'al te'ex ca wocsaj óolale'exe' le tuunicho' jach nojoch u tojol ba'ale' u ti'al le máaxo'ob ma' táan u yocsaj óolo'obo', cu dzo'ocpajal ba'ax cu ya'alic le Quili'ich Dzíibo': Le tuunich p'ecta'ab tumen le pakbalo'obo', j kuch u beet u noj tuunichil. 8Bey xan cu dzo'ocpajal ba'ax cu ya'alic: Jun p'éel tuunich u ti'al t'óochpajal, yéetel jun p'éel nojoch tuunich cu beetic u lúubul máac. Tumen leti'obe' cu t'óochpajlo'ob tumen ma' táan u beetico'ob u cuentail le ma'alob péectzilo'; j dzaabo'ob xan u ti'al lela'. 9Ba'ale' te'exe' jun p'éel caaj yéeya'ane'ex, jun múuch' kiino'ob táan u meyajtico'ob le ajawo', jun p'éel caaj quili'ich, jun p'éel caaj u ti'al Ku. Lela' bey anilo' u ti'al ca tze'ecte'ex u jakbe'en meyajo'ob Ku, máax t'ane'ex u ti'al ca jóokoque'ex ti' le éekjoch'e'enilo' u ti'al ca ocoque'ex ti' le qui'ichquelem sáasil. 10Te'ex ca'ache' mix caajale'exi', ba'ale' bele' u caajale'ex Ku; ca'ache' mix máac ch'a'ic te'ex óotzilil, ba'ale', bele' Kue' u ch'a'amaj óotziilil te'ex. 11In yaabilaj sucu'une'ex, quin káat óoltic te'ex, je'el bix ti' táanxel lu'umilo'ob caja'ano'ob náach ti' u lu'umo'obe', ma' dzáique'ex cúuchil ti' le yóokolcaabil dzíibolalo'ob cu ba'atelo'ob tu contra le pixano'. 12xíimbalnene'ex ma'alob ichil le máaxo'ob ma' u kaj óolo'ob Kuo'. Beyo' leti'obe', quex táan u t'aano'ob bele' ta contraex je'el bix wa beye'ex loolob máaque'exe', bíin u yilo'ob le utz ca beetique'exo' yéetel bíin u qui'iqui' t'anto'ob Ku le quéen kuchuc u kiinil u xíimbalta'alo'obe'. 13Tu yo'olal yaacunaj ti' Yuumtzile', dzáaba'ex yáanal tuláacal páajtalil, 14bey xan tu yáanal le jalach wíinico'ob túuxta'ano'ob tumen leti'o' u ti'al u jadzico'ob le máaxo'ob loolob máaco'obo' yéetel u ti'al u tziquico'ob le máaxo'ob cu beetico'ob utzo'. 15Tumen Kue' u káat ca a beete'ex le utzo', u ti'al a beetique'ex u maquic u chi'ob le máaxo'ob mix ba'al u yojelo'obo' yéetel j ma' na'ato'obo'. 16Cuxlene'ex ma'alob je'el bix máaco'ob jáalkabo'obe' ba'ale' ma' a ch'a'ique'ex le jáalkabilo' je'el bix jun p'éel ba'ax o'olalil u ti'al a beetique'ex le kaaso'. Xíimbalnene'ex je'el bix u paalilo'ob Kue'. 17Tziquilte'ex je'el bix unaje'. Yaabilte'ex le sucu'uno'obo', ch'a'ex sajaquilil ti' Ku, tziquilte'ex le ajawo'. 18Palitzile'ex, dza'aba'ex yéetel tuláacal tziiquil yáanal u kab a dzuulile'ex, ma' chéen ti' le máaxo'ob utzo'ob yéetel cu ch'a'ico'ob óotzilil te'exo' ba'ale' tac ti' le máaxo'ob kasa'ano'obo'. 19Tumen jun p'éel ba'al ma'alob wa yaan máax cu mukyajtic yaayaj óolalo'ob ma' unajo'obi' tu yo'olal u kub óolal tu táan Ku. 20Tumen wa te'ex ca beetique'ex ba'al kaase', yéetel tu yo'olal lelo' ca ja'adzale'exe', ¿ba'ax ca numyajtique'ex iquil a mukyaje'ex yéetel chuca'an óolal? Ba'ale' wa ca mukyaje'ex tu yo'olal a beetique'ex ba'al utze', yéetel ca mukyaje'ex yéetel chuca'an óolale', lela' ma'alob tu táan Ku. 21Tumen Kue' tu t'anaje'ex u ti'al lela', tumen Cristoe' mukyajnaj ta wo'olale'ex, ca tu dzaj te'ex jun p'éel ca'ansaj, u ti'al ca cuxlaque'ex je'el bix cuxlajic leti'o'. 22Leti'e' ma' tu beetaj mix jun p'éel kebani', yéetel jun puli' ma' tu tusaj mix máaqui'; 23le ca j po'och'e' ma' tu núucaj yéetel pooch'ilo'obi'; le ca j beeta'ab u mukyaje', ma' kaakas t'aanaji', ba'ale' tu kubentaj ti' Ku máax cu p'is óol jach tu beel. 24Cristoe' tu bisaj c kebano'ob tu wíinclil tu yóokol le cruzo', u ti'al ca quíimico'on ti' le kebano' yéetel ca cuxlaco'on ti' jun p'éel toj cuxtal. Leti'e' j loobilta'abi u ti'al ca dza'acaque'ex te'ex. 25Tumen te'exe' táan a máane'ex ca'ach je'el bix j tamano'ob saatalo'obe', ba'ale' bele' dzo'oc a suute'ex ti' Cristo, máax canantique'ex je'el bix j tamano'ob saatalo'obe', ba'ale' bele' dzo'oc a suute'ex ti' Cristo, máax canantique'ex je'el bix jun túul j canan j tamane', yéetel tu kab leti' yaan a pixane'ex.


Copyright
Learn More

will be added

X\