1 San Juan 3

1Ile'ex buca'aj u yaabiltmajilo'on Ku le Taatao', iquil cu páajtal u ya'ala'al to'one' u paalalo'on Ku tumen leti'on. Le o'olale' le máaxo'ob yóokolcaabilo'obo' ma' u kaj óolo'oni', tumen ma' tu kaj óolto'ob Kui'. 2In yaabilaj sucu'une'ex, bele' u paalalo'on Ku; ba'ale' ma' e'esa'ac to'on ba'ax bíin béeyaco'on je'el bix leti'o', tumen bíin c il jach je'el bix leti'o'. 3Tuláacal le máax u dzaamaj ti' Cristo jun p'éel alab óolal beya' cu lukesic u kaasil, je'el bix Jesucristo mina'an kaasil ti'o'. 4Ba'ale' tuláacal le máax cu beetic kebane' cu si'ipiltal ti' u ya'almaj t'aan Ku, tumen le kebano u si'ipil máac ti' le a'almaj t'aano'. 5Te'exe' a wojele'ex Jesucristoe' j taal way yóokolcaabe' u ti'al u lukesic c kebano'ob, ti' leti'e' mina'an keban. 6Bey túuno', tuláacal le máax cu xíimbal ti' le kebano' ma' u yilmaji' mix u kaj óoltmaji'. 7In mejen paalale'ex, mix máac ca u tuse'ex; le máax cu beetic ba'ax toje' toj, je'el bix leti' toje'. 8Ba'ale' le máax cu xíimbal ti' le kebano' u ti'al kasiba'al, tumen kasiba'ale' j kebanchaj tu yáax chuun. U Paal Kue' j taal u ti'al u mixba'alcunt le ba'ax u beetmaj kasiba'alo'. 9Tuláacal máax sija'an ti' Kue' ma' tu xíimbal ti' le kebano', tumen ti' leti'e' yaan le cuxtal cu dzáic Kuo'; yéetel ma' tu páajtal u xíimbal ti' le kebano' tumen sija'an ti' Ku. 10Ojéela'an máaxo'ob u paalalo'ob Ku yéetel máaxo'ob u paalalo'ob kasiba'al, tumen je'el máaxac ma' táan u beetic ba'ax toje', mix táan u yaabiltic u sucu'une', ma' u ti'al Kui'. 11Tumen le ca'ansaj dzo'oc a wu'uyique'ex cáajic tu yáax chuuno' leti' lela': ca c yaabiltbáa t baatzil. 12Ma' unaj c béeytal je'el bix Caine' máax u ti'al kasiba'ale' ca tu quiimsaj u yíidzin. ¿Ba'axten tu quiimsaj? Tumen le ba'ax cu beetic Caino' kaas, yéetel le ba'ax cu beetic u yíidzino' utz. 13In sucu'une'ex, ma' a wilique'ex jela'anil wa ca p'ecta'ale'ex tumen le yóokolcaabilo'obo'. 14To'one'; dzo'oc c lukul ti' le quíimilo' u ti'al c máan ti' le cuxtalo', c ojele' tumen c yaabiltic le sucu'uno'obo'. Le máax ma' tu yaabilaje' láili' quimene'. 15Tuláacal le máax cu p'ectic u sucu'une' jun túul j quiimsaj wíinic, yéetel te'exe' a wojele'exe' mix jun túul j quiimsaj wíinic cu páajtal u yantal cuxtal mina'an u xuul tu pucsi'ikal. 16C kaj óol ba'ax le yaacunajo' iquil tu dzajil u cuxtal Jesucristo t o'olal; bey xan túuno' to'one' unaj c dzáic c cuxtal tu yo'olal le sucu'uno'obo'. 17Tumen wa yaan jun túul máac yaan lu'umcabil ayikalil ti', cu dzo'ocole' cu yilic u yóotzilil u sucu'une' ba'ale' ma' tu ch'a'ic óotzilil ti'e' ¿bix je'el u ya'alic wa yaan u yaacunaj Ku tu pucsi'ikale'? 18In mejen paalale'ex ma' c yaacunaj chéen yéetel le ba'ax c a'alic yéetel c chi'o; ba'ale' unaj c yaacunaj yéetel jaaj bey xan yéetel ba'ax c beetic. 19Bey je'el u páajtal c ojéeltic u ti'alo'on le jaajo', yéetel u'uyic jeedzel anilo'on tu táan Ku; 20tumen wa c pucsi'ikal cu taquic c pool ti' wa ba'axe', Kue' asab nojoch ti' c pucsi'ikal, yéetel leti'e' u yojel tuláacal. 21Bey túuno' in yaabilaj sucu'une'ex, wa c pucsi'ikal ma' táan u taquic c poole', yaan to'on kub óolal tu táan Ku; 22leti'e' bíin u dzáa to'on tuláacal ba'ax ca c káat ti', tumen c u'uyaj t'antic u ya'almaj t'aano'ob yéetel c beetic ba'ax utz tu t'aan. 23U ya'almaj t'aane' leti' lela': Ca c ocsaj óolt Jesucristo u Paal, yéetel ca c yaabiltbáa t baatzil je'el bix tu ya'alaj to'ono'. 24Le máax cu u'uyaj t'antic u ya'almaj t'aano'obe' cuxa'an ti' ku yéetel Kue' cuxa'an ti' leti'. C ojel leti'e' cuxa'an ti' to'one' tu yo'olal le Quili'ich Pixan u dzaamaj to'ono'.


Copyright
Learn More

will be added

X\