1 Corintios 9

1¿Ma' wa jáalkabeni? ¿ma' wa apóstoleni? ¿ma' wa dzo'oc in wilic Jesús c Yuumtzili? ¿ma' wa te'ex u yich in meyaj ti' u meeyjul Yuumtzil? 2Je'el u yúuchul ma' in kaj óolta'al bey je'el bix jun túul apóstol tumen yaanal máaco'obe', ba'ale' te'exe' unaj a kaj óoltiquene'ex, tumen dzo'oc a wocsaj óoltique'ex Yuumtzile' te'ex u chíiculal jach tu jaajil apóstolen. 3Lela' in núuc t'aan ti' le máaxo'ob cu ya'alico'ob teen ba'alo'. 4¿Ma' wa c najmatic u dza'abal to'on ba'al c jaant yéetel ba'al c uke'? 5¿Ma' wa c najmatic c bisic t éetel jun túul x ocsaj óol atan, bey je'el bix u beetico'ob u láak apóstolo'obo', u yíidzino'ob Yuumtzil bey xan Pedro? 6¿Wa ca tucultique'ex chéen teen yéetel Bernabé unaj c meyaj yéetel áakab? 7¿Máax cu beetic u soldadoil yéetel cu tojoltic ti' xan ba'ax cu xupic? ¿Máax cu pakic uva cu dzo'ocole' ma' tu jaantic u yich? ¿Máax cu canantic j tamano'ob cu dzo'ocole' ma' tu yukik u kaab u yiim le j tamano'obo'? 8Ma' a tuclique'ex wa táan in wa'alic lela' bey chéen jun p'éel u tuucul máaco'obe', tumen u ya'almaj t'aan Moisese' cu ya'alic xan. 9Tumen dzíiba'an tu libroil le a'almaj t'aano': Ma' a dzáic jok ni' ti' wacax cu meyaj tu nu'uculil u yoxo'omta'al le joocho'. Tu jaajile' Kue' ma' tu ya'alaj lela' tumen táan u canantic le wacaxo'obo', 10ba'ale' bey jun p'éel queett'aan c ti'al to'one'exe'. Le a'almaj t'aana' dzíibta'ab u ti'al c utzil, tumen le máax cu pakalo' yéetel le máax cu yoxo'ontic le joocho' cu beetico'ob u ti'al ca dza'abac jun jaatz le jooch ti'obo'. 11Bey túuno', wa to'on dzo'oc c pakic ichile'ex jun p'éel ca'anilbe'en pakale'. ¿Jach wa ya'ab ca wa'alique'ex ca c jooch ti' te'ex le lu'umcabil ba'alo'obo'? 12Wa u láak máaco'ob yaan páajtalil ti'ob ta wóokole'exa', buca'aj asab to'on. Ba'ale' ma' c kabéetcunt le páajtalil yaan ti' to'ona', tumen táan c mukyajtic tuláacal u ti'al ma' c dzáic mix ba'al katic u beel u tze'ecta'al u ma'alob péectzil Cristo. 13Te'exe' a wojele'ex le máaxo'ob cu meyajo'ob temploo', ti' le ba'axo'ob yano'ob templo cuxa'ano'obo'. U káat u ya'ale', le máaxo'ob cu táan óoltico'ob le cúuchil tu'ux cu dza'abal le quíimsbil siibalo', cu jaantico'ob u bakel le ba'alche'ob cu quiimsa'alo'ob te'elo'. 14Bey xan tu beetaj le Yuumtzil yéetel le máaxo'ob cu tze'ectico'ob le ma'alob péectzilo', ca j cuxlajo'ob ti' le meyaja'. 15Ba'ale' tene' mix jun téen in kabéetcunt le páajtalila', mix xan táan in dzíibtic lela' u ti'al ca a dza'ex teen wa ba'ax. ¡Asab ma'alob ca quíimquen que ca luksa'ac teen le qui'imac óolal yaan tena'! 16In ti'al tene' ma' u ti'al ca'anal ichil in tze'ectic le ma'alob péectzilo', tumen jach unaj in beetic. ¡Óotzilen wa ma' tin tze'ectic le ma'alob péectzilo'! 17Le o'olale', wa quin beetic tu juunal in wóole' yaan u bo'olil. Ba'ale' wa quin beetic chéen tumen táan u dza'abal tene', quex beya' lelo' jun p'éel ba'al kubenta'an teen tumen Ku. 18Bey túuno', le bo'olal yaan teno' leti' u qui'imac óolil in tze'ectic x ma' bo'olil le ma'alob péectzilo'; in káat in wa'ale', quex ma' in ka'abetcuntic le páajtalil yaan teno' u ti'al ca cuxlaquen ti' u meyajil in tze'ec. 19Quex ma' u palitzilen mix máaqui', dzo'oc in beetiquinbáa u palitzilen tuláacal, u ti'al in taasic u láak máaco'ob ti' Cristo. 20Le quéen yanaquen ichil le judíobo', quin beetiquinbáa je'el bix jun túul judíoe', u ti'al in taasico'ob xan. In káat in wa'ale', u ti'al le máaxo'ob cuxa'ano'ob yáanal u ya'almaj t'aan Moisese', tene' quin dzáiquinbáa tu yáanal le a'almaj t'aano' u ti'al in taasico'ob ti' Cristo, quex tu jaajile' tene' mina'anen tu yáanal le a'almaj t'aano'. 21U ti'al in taasico'ob xan le máaxo'ob ma' cuxa'ano'ob yáanal u ya'almaj t'aan Moiseso', quin betiquinbáa je'el bix jun túul ti' leti'obe', quex tu jaajile' ti' yanen tu yáanal u ya'almaj t'aan Kue' tumen ti' yanen tu yáanal u ya'almaj t'aan Cristoe'. 22Le que yanaquen tu yicnal le máaxo'ob luubul u yóolo'ob ti' le ocsaj óolalo', quin beetic bey luubul in wóole', u ti'al in taasico'ob xan. In káat in wa'ale', dzo'oc in beetiquinbáa je'el bix cada jun túule' u ti'al in toquic dze'edzec ti'ob je'el bix ca páataque'. 23Quin beetic tuláacal le ba'alo'oba' tu yo'olal le ma'alob péectzilo', u ti'al ca yanac teen wa ba'ax ti' le ayikalil cu taasic le ma'alob péectzilo'. 24A wojele'ex te'exe' jun p'éel queetlan áalcabile' tuláacal cu yáalcabo'ob, ba'ale' chéen jun túul cu kamic le siibalo'. Áalcabnaque'ex u ti'al ca kame'ex le siibalo'. 25Tuláacal le máaxo'ob cu táan óoltico'ob u yoclo'ob ti' jun p'éel báaxalo', cu tzelicuba'ob ti' tuláacal je'el ba'ax cu páajtal u beetic loob ti'obe'. Leti'obe' cu beetico'ob chéen u ti'al u kamico'ob jun p'éel u sibalil péet jo'ol beeta'an yéetel u le' laurel, jun puli' ma' tu xáantal. Ba'ale' to'one' táan c ba'atel u ti'al c kamic jun p'éel siibal cu xáantal u ti'al kiino'ob mina'an xuul. 26Tene' ma' táan in wáalcab ich éekjoche'enili', mix táan in ba'atel u ti'al in jadzic iiki'. 27Ma' beyi', tene' quin jadzic in wíinclil yéetel quin beetic u yu'ubic in t'aan bic úuchuc ma' in ka'amal teen cu dzo'ocol in ca'ansic u láak máaco'ob.


Copyrighted Material
Learn More

will be added

X\