1 Corintios 8

1Beleoraa' bin in ca'aj t'aan tu yo'olal le janal cu ku'ubul ti' le beetbil kuo'obo'. Tu jaajile' tuláacalo'on c ojel le ba'alo'oba', ba'ale' le ba'ax c ojelo' cu beetic u ca'analtal c ich, ca'aliquil le yaacunajo' cu beetic c ch'íijil c pixan. 2Wa yaan máax cu tuclic u yojel wa ba'axe', tu jaajile' mix ba'al u yojel je'el bix unaj u yojéeltique'. 3Ba'ale' wa yaan máax u yaabiltmaj Kue', leti'e' kaj óolta'an tumen Ku. 4Bey túuno' tu yo'olal le u jaanta'al le janal kuba'an ti' le beetbil kuo'obo', tu jaajile' le beetbil kuo'obo' mix ba'al u biilalo'ob way yóokolcaabe', tumen chéen jun túulili' Ku yaan. 5Tumen quex yaan te j ca'ano' yéetel way lu'ume' le máaxo'ob cu ya'ala'al kuo'obo', le o'olale' cu tuculta'al yaan ya'abcach kuo'ob yéetel ya'abcach yuumtzilo'obe', 6ba'ale' c ti'al to'one' chéen jun túulili' Ku yaan, le Taatao'. Le Taatao' tu beetaj tuláacal ba'al, to'one' yano'on u ti'al leti'. Yaan xan chéen jun túulili' Yuumtzil, Jesucristo. Tu yo'olal leti'e' yaan tuláacal ba'al, tac to'one'ex xan. 7Ba'ale' ma' tuláacal máac u yojel lela'. Le máaxo'ob suuca'an ti'ob u kultico'ob ca'ach le beetbil kuo'obo' bey jun p'éel ba'al kuba'an ti' le beetbil kuo'obo'. U tuuculo'ob túune', tumen luba'an u yóole', cu beetic u yu'ubicuba'ob u kascuntmuba'ob tu yo'olal le beetbil kuo'obo'. 8Tu jaajile' le ba'ax c jaantico' ma' tu beetic c ka'amal tumen Ku; tumen ma' táan c mas ma'alobtal tumen táan c janal. 9Ba'ale' ilawile'ex le páajtalil yaan te'ex a beetique'ex ma' u beetic u lúubul ti' keban le máaxo'ob luba'an u muuk u yocsaj óolo'obo'. 10Teche' a wojel le ba'alo'oba' cu dzo'ocole' ca cutal janal ti' jun p'éel cúuchil kuba'an ti' le beetbil kuo'obo', ca wila'al túun tumen jun túul sucu'un luba'an u muuk u yocsaj óolal, le sucu'un túuno' cu bine' cu jaantic le ba'ax kuba'an ti' le beetbil kuo'obo'. 11Bey túuno', teech tumen a wojel le ba'alo'oba', ca beetic u sa'atal le sucu'un luba'an u yóolo', máax o'olal j quíim Cristo xan. 12Bey túuno', iquil a loobiltique'ex u tuucul le sucu'uno'ob luba'an u muuk u yocsaj óolalo'obe', táan a kebanchajle'ex tu contra Cristo. 13Le o'olale', wa teen quin beetic u lúubul ti' keban in sucu'un tu yo'olal ba'ax quin jaantique', asab ma'alob ma' in jaantic bak mix bikin, u ti'al ma' in beetic u lúubul ti' keban.


Copyright
Learn More

will be added

X\