1 Corintios 7

1Bele' bin in ca'aj in núuc le káat chi'ob ta dzíibtaje'ex teno'. Tu jaajil utz u ti'al máac ma' u dzo'ocol u beel, 2ba'ale' tumen jach ya'ab nup keban yane', unaj u yantal u yatan máac bey xan co'olele' unaj u yantal u yíicham. 3Le íichamtzilo' unaj u dzo'ocbesic ba'ax unaj u beetic jun túul íichamtzil yéetel u yatan, bey xan le atantzilo' unaj u dzo'ocbesic ba'ax unaj u beetic jun túul atantzil yéetel u yíicham. 4Le atantzilo' ma' u yuumil u wíinclili', ba'ale' u ti'al u yíicham. Bey xan le íichamtzilo' ma' u yuumil u wíinclili', ba'ale' u ti'al u yatan. 5Ma' a wa'alique'ex ma'il ta baatzile'ex, ja'ali wa dzo'oc a múuch' tuclique'ex ma' a nupicaba'ex dze'edzec kiino'ob, u ti'al a kubicaba'ex payalchi'. Cu dzo'ocole' unaj a nupicaba'ex tu ca'a téen, u ti'al ma' u túunta'al a wóole'ex tumen Satanás tu yo'olal u dzíibolal a bakele'ex. 6Quin wa'alic te'ex lela' jun p'éel ba'al cu páajtal u beeta'al ma' tumen kabéet u beeta'ali'. 7Teen, tu juunal in wóole', in káat tuláacal ca béeyaco'ob je'el bixene'. Ba'ale' Kue' u dzaamaj ti' cada jun túule' jejeláas páajtalilo'ob, ti' dze'edzeque' beya', ti' u láako'obe' jela'an. 8Ti' le ma' dzoca'an u beelo'obo' yéetel ti' le quimen u yíicha'amo'obo', quin wa'alic ti'obe' ma'alob ma' u dzo'ocol u beelo'ob, je'el bix teno'. 9Ba'ale' wa ma' tu páajtal u dzáancha'atico'ob u dzíibolalo'ob u bakelo'obe', dzo'ococ u beelo'ob, tumen ma'alob ca dzo'ococ u beelo'ob ma' ca xu'ulsa'aco'ob tumen u dzíibolalo'obi'. 10Le máaxo'ob dzoca'an u beelo'obo' quin wa'alic ti' le atantzilo' ma' u p'atic u yíicham. Lela' tu jaajile' ma' teen a'aliqui', Yuumtzil a'alic. 11Ba'ale' wa le atantzil cu p'atic u yíicha'amo' ma' unaj u ca'a dzo'ocol u beeli', wa suunac yéetel u yíicham. Bey xan le íichamtzilo' ma' unaj u p'atic u yatani'. 12Ti' le u láako'obo' quin wa'alic teen, ma' Yuumtzili', wa jun túul sucu'un yaan u yatan ma' x ocsaj óoli', ba'ale' wa le co'olel utz tu t'aan u yantal tu yéetele', le sucu'una' ma' unaj u p'atiqui'. 13Wa u yíicham jun túul co'olel ma' ocsaj óoli', ba'ale' wa le máac utz tu t'an u yantal tu yéetele', le co'olela' ma' unaj u p'atiqui'. 14Tumen le íichamtzil ma' ocsaj óolna'aco', dzo'oc u ku'ubul ti' Ku tu yo'olal u nupmubáa yéetel jun túul co'olel ocsaj óolnaja'an. Bey xan le atantzil ma' ocsaj óolnaco' dzo'oc u ku'ubul ti' Ku tumen u nupmubáa yéetel jun túul íichamtzil sucu'un ti' ocsaj óolal. Wa ma' beyo' a paalale'exe' yaan u béeytalo'ob je'el bix u paalalo'ob le ma' ocsaj óolnaco'obe'. Ba'ale' beya' kuba'ano'ob ti' Ku. 15Ba'ale' wa le íichamtzil wa le atantzil ma' ocsaj óolnac u káat u xúump'attaje', u beete. Ti' lela' le sucu'un wa le quiico' mina'an mix jun p'éel kaas, tumen Kue' u t'anmajo'on u ti'al jéedzel. 16Tumen ¿bix je'el a wojéeltic, teech atantzilech, wa je'el u páajtal a toquic a wíichame'? ¿wa bix je'el a wojéeltic, teech íichamtzilech, wa je'el u páajtal a toquic a watane'? 17Je'el bixaque', cada jun túule' unaj u cuxtal je'el bix dza'an ti' tumen Kue', yéetel je'el bix yanili' ca'ach le ca j t'a'an tumen Kue'. Bey in ca'ansic ti' tuláacal le iglesiaobo'. 18Wa Ku cu t'anic jun túul máac súut kupta'ane', ma' u muclic wa súutkupta'an. Wa cu t'anic jun túul máac ma' súutkupta'ane', ma' unaj u súutkupta'ali'. 19Mix ba'al ti' wa súutkupta'an wa ma'. Ba'ax kabéete' u dzo'ocbesa'al u ya'almaj t'aan Ku. 20Tu jujun túule' unaj u p'áatal je'el bix ca j t'a'an tumen Kue'. 21Wa palitzilech le ca j t'a'aneche', ma' a sen tuclic lelo', ba'ale' wa cu páajtal a jáalkabta'ale', ma' unaj u cha'ic u máan u kiinili'. 22Tumen máax palitzil le ca j t'a'an u yocsaj óolt Yuumtzile', bejela'e' jáalkab u ti'al u meyajtic Yuumtzil. Bey xan le máax jáalkab le ca j t'a'ano', bejela'e' u palitzil Cristo. 23Tumen jach nojoch u tojol ma'anique'ex. Ma' a cha'ique'ex a palitzilta'ale'ex tumen máaco'ob. 24Bey túuno', sucu'une'ex, cada jun túule' je'el bix yanil le ca j t'a'ano', bey unaj u p'áatal tu táan Ku. 25Tu yo'olal le máaxo'ob ma' dzoca'an u beelo'obo' mina'an mix jun p'éel t'aan dza'an teen tumen Yuumtzil, ba'ale' quin wa'alic ba'ax quin tuclic, je'el bix jun túul máac cu najmatic u alab óolta'al tu yo'olal u ch'a'a óotzilil Yuumtzile'. 26In ti'al tene' ma'alob ca p'áatac máaque' je'el bix yanilo', tu yo'olal u talamil le kiino'ob cuxa'anilo'ona'. 27Wa yaan a watane' ma' a tuclic a p'atic. Wa mina'an a watane', ma' a caxantic. 28Ba'ale' wa cu dzo'ocol a beele' ma' a kebantal. Wa jun túul x ch'úupal cu dzo'ocol u beele', ma' tu kebantal xan. Ba'ale' le máaxo'ob cu dzo'ocol u beelo'obo' yaan u yantal yaayaj óolal ti'ob ti' le cuxtala', teen túune' in káat in tzelo'ob ti' le yaaya óolalo'. 29Sucu'une'ex ba'ax in káat in wa'ale' leti' lela': Chéen jun p'íit kiin p'aatal to'on. U cáajbal bejela'e', le máaxo'ob dzoca'an u beelo'obo' unaj u cuxtalo'ob bey je'el bix wa ma' dzoca'an u beelo'obe'. 30Le máaxo'ob yaj u yóolo'obe', unaj u cuxtalo'ob bey mina'an yaayaj óol ti'obe'. Le máaxo'ob qui'imac u yóolo'obe' unaj u cuxtalo'ob bey mina'an qui'imac óolal ti'obe'. Le máaxo'ob cu máano'obo' unaj u cuxtalo'ob bey mix ba'al yaan ti'obe'. 31Le máaxo'ob táan u náajaltico'ob u ba'alo'obil yóokolcaabe' unaj u cuxtalo'ob bey ma' táan u náajaltico'obe', tumen le yóokolcaab c ilica' táan u xu'ulul. 32Ma' in káat ca yanac te'ex sesen tuuculo'obi'. Le máax ma' dzoca'an u beele', cu táan óoltic u ba'aluba'ob Yuumtzil yéetel bix cun lúubul utzil ti'. 33Ba'ale' le quéen dzo'ococ u beele', yaan u táan óoltic u ba'aluba'ob yóokolcaab yéetel bix cun lúubul utzil ti' u yatan. 34Bey xan yaan u jela'anil ichil le co'olel dzoca'an u beelo' yéetel le mina'an u yíichamo'. Le ma' dzoca'an u beelo', cu táan óoltic u ba'aluba'ob Yuumtzil, u ti'al u quili'ichtal ti' u wíinclil bey xan ti u pixan. Ba'ale' le dzoca'an u beelo' cu táan óoltic u ba'aluba'ob yóokolcaab yéetel bix cun lúubul utzil ti' u yíicham. 35Quin wa'alic le ba'alo'oba' u ti'al a wutzile'ex, ma' u ti'al in katic a beele'exi', ba'ale' u ti'al ca cuxlaque'ex ma'alob, táan a meyajtique'ex Yuumtzil yéetel tuláacal a pucsi'ikale'ex. 36Ba'ale' wa yaan máax cu tuclic asab ma'alob ca dzo'ococ u beel u x ch'úupal, tumen tu máan u x lo'obaynile' wa le kabéet u beeta'ala', u beet túun ba'ax cu tuclic asab ma'alob, cu páajtal u dzo'ocol u beel tumen ma' kebani'. 37Ba'ale' wa yaan máax tu juunal u yóol, u dzaamaj tu pucsi'ikal u tuuculil ma' u dzo'ocol u beel u x ch'úupale', utz ba'ax cu beetic. 38Bey túuno', le máax cu kubic u ti'al dzo'ocol u beele', utz ba'ax cu beetic; le máax ma' tu kubic u ti'al dzo'ocol u beele', asab ma'alob ba'ax cu beetic. 39Le co'olel dzoca'an u beele' nupa'an ti' u yíicham tumen le a'almaj t'aano', ca'aliquil cuxa'an u yíicham. Ba'ale' wa le íichamtzil cu quíimilo' le co'olelo' cu páajtal u dzo'ocol u beel yéetel je'el máaxac u káate' ichil le ocsaj óolo'obo'. 40Ba'ale' mas je'el u qui'imactal u yóol wa ma' tu ca'a dzo'ocol u beele'. Lela' teen a'alic, tumen quin tucultique' yaan teen xan u Quili'ich Pixan Ku.


Copyright
Learn More

will be added

X\