1 Corintios 6

1Le quéen yanac ti' wa máax ichile'ex jun p'éel kuuxil yéetel u láake', ¿bix u bin tac pool tu táan máaco'ob ma' c éet ocsaj óolo'obi'? ¿Bix ma' tu bin tu táan u caajal Kuo'? 2¿ma' wa a wojele'ex le máaxo'ob u ti'alo'ob Ku cun u p'is óolto'ob le yóokolcaabo'? Wa te'ex cun p'is óoltic yóokolcaabe' ¿ma' wa tu páajtal a p'is óoltique'ex le mejen ba'alo'oba'? 3¿Ma' a wojele'ex yaan c p'is óoltic tac le ángelo'obo'? ¡Cux túun u ba'alilo'ob le cuxtala'! 4Wa yaan te'ex ba'atelo'ob tu yo'olal u ba'alo'obil le cuxtala' ¿ba'axten ca dzáique'ex le máaxo'ob mix ba'al yaan u yilo'ob yéetel le iglesiao' u ti'al ca u p'is óolto'obo'? 5Lela' quin wa'alic u ti'al ca a ch'a'ex subtal. ¿Mina'an wa ichile'ex quex jun túul ca u yojéelt bix u p'is óoltic le ba'alo'ob ichil sucu'uno'oba'? 6¿Jach kabéet wa ca u bis jun túul sucu'un u tac pool tu táan Jueso'ob ma' ocsaj óolo'obi'? 7Tu jaajile' kaas u yantal ba'atelilo'ob ta baatzile'ex. ¿Ba'axten ma' táan a mukyajtique'ex u beeta'al te'ex kaas? ¿Ba'axten ma' ta cha'aique'ex a wocla'ale'ex? 8Ba'ale' te'ex beetic le kaaso' yéetel ca woclique'ex tac a wéet sucu'une'ex. 9- 10¿Ma' wa a wojele'ex le máaxo'ob cu beetico'ob kaaso' ma' bíin u ti'alto'ob u ajawil Kui'? Ma' a tuscaba'ex, tumen ma' bíin u ti'alto'ob u ajawil Ku le máaxo'ob cu kaakas cuxtalo'obo', mix le cu kultico'ob beetbil kuo'obo', mix le cu nup kebano'obo', mix le cu nup kebantcuba'ob yéetel u yéet xiibilo'obo', mix le cu yoocolo'obo', mix le cu dzíiboltico'ob taakino', mix le cu cáaltalo'obo', mix le cu ya'alico'ob ba'alo', mix le cu tuuso'obo'. 11Dze'edzec ti' te'exe' beye'ex ca'acho', ba'ale' dzo'oc a p'o'obole'ex, jun páaycunta'ane'ex u ti'al Ku, yéetel dzo'oc a wantale'ex ma'alob tu táan, tu yo'olal u kaaba' c Yuumtzil Jesús yéetel tu yo'olal u quili'ich Pixan c Yuum Ku. 12Cu ya'ala'ale': Jun túul máaque' je'el u beetic je'el ba'alac u káate'. U jaajil, ba'ale' ma' tuláacal ba'al utz u beetiqui'. Bey anil, jun túul máaque' je'el u beetic je'el ba'alac u káate', ba'ale' ma' unaj u cha'ic u lúubsa'al tumen mix ba'ali'. 13Jaaj ba'ax cu ya'alico'ob, le janalo' u ti'al le nako', le nako' u ti'al le janalo', ba'ale' Kue' yaan u xu'ulsic tu ca'a p'éelal. Ba'ale' ma' jaaj wa le wíinclilo' u ti'al u nup kebantal máaqui', tumen le wíinclilo' u ti'al Yuumtzil, yéetel Yuumtzile' u ti'al le wíinclilo'. 14Je'el bix Ku tu ca'a púut cuxquintaj Yuumtzile', bey xan cun u ca'a púut cuxquinto'on yéetel páajtalil. 15¿Ma' a wojele'ex u wíinclil cada jun túul ti' te'exe' jun xéet' u wíinclil Cristo? ¿Je'el wa in ch'a'ic u wíinclil Cristo u ti'al in nupic yéetel jun túul kaakas co'olele'? ¡Jun puli' ma'! 16¿Jach tu jaajil ma' a wojele'ex le quéen u nupubáa jun túul máac yéetel jun túul kaakas co'olele', tu ca'a túulalo'ob cu béeytalo'ob bey jun p'éel wíinclile'? Tumem le Quili'ich Dzíibo' cu ya'alique': Tu ca'a túulalo'ob bíin béeychajco'ob bey jun p'éelili' wíinclile'. 17Ba'ale' le quéen u nupubáa wa máax yéetel Yuumtzile', tu ca'a túulalo'ob cu jun p'éelili'ichajo'ob ti' pixan. 18Púudzene'ex, túun ti' le nup kebano'. Je'el máacalmáac u láak kebanil ca u beet máaque', yo'ocabil ti' u wíinclil cu beetic. Ba'ale' le máax cu nup kebane' cu kebancuntic u wíinclil. 19¿Ma' a wojele'ex a wíinclile'exe' u najil Quili'ich Pixan dza'an ti' te'ex tumen Ku, yéetel le Quili'ich Pixano' caja'an ti' te'ex? Te'exe' ma' u yuumile'ex a wíinclile'exi', 20tumen nojoch u tojol ma'anique'ex. Le o'olale', unaj a nojbe'encuntique'ex Ku yéetel a wíinclile'ex bey xan yéetel a pixane'ex, tumen tu ca'a p'éelal u ti'al Ku.


Copyright
Learn More

will be added

X\