1 Corintios 5

1Dzo'oc u yojéelta'ale' jun túul ti' te'exe' cajacbal yéetel u yatan u taata. Lela' jun p'éel keban jach nojoch ma' tu cha'abal u beeta'al mix ichil le máaxo'ob ma' u kaj óolo'ob Kuo'. 2¡Cu dzo'ocole' láili' jach ca'anal a wiche'exe'! ¡Unaj u yaatal a wóole'ex! Le máac beet le ba'ax jach kaasa' unaj u luksa'al ichile'ex. 3Tumen quex mina'anen ichile'ex yéetel in wíinclile' ti' yanen ichile'ex yéetel in pixane'. Dzo'oc in p'is óoltic le máax tu beetaj le nojoch kebana' bey ti' yanen ichile'exe'. 4Much'aba'ex tu kaaba' c Yuumtzil Jesucristo, teen xane' yaan in wantal ichile'ex ti' in pixan, bey xan u páajtalil Yuumtzil Jesús yaan u yantal ta wéetele'ex. 5Bey túuno' le máaco' unaj u ku'ubul ti' Satanás u ti'al ca quíimic u wíinclil yéetel ca to'ococ u pixan le quéen taalac Yuumtzil Jesuso'. 6Te'exe' ma' unaj u ca'analtal a wiche'ex tu yo'olal ba'ax ca beetique'exi'. ¿Ma' a wojele'exe' jun p'íit levadurae', cu pajcuntic tuláacal le sacano'? 7Jóokse'ex túun le úuchben levadura kascuntique'exo', u ti'al ca béeyaque'ex je'el bix le waaj cu jaanta'al tu kiinil Pascuao', beeta'an yéetel túumben sacan x ma' levadurail, je'el bix tu jaajil beeta'ane'exo'. Tumen Cristoe' máax u j tamanil c Pascuae' dzo'oc u quíimil. 8Bey túuno' unaj c kiinbesic c Pascua yéetel x ma' ca'a p'éel ichil bey xan yéetel jaajil, tumen lelo'oba' bey je'el bix le waaj x ma' levadurao'. Ma' unaj c kiinbesic yéetel loob wa yéetel kaakas tuuculo'ob ba'axo'ob beyo'ob le úuchben levadurao'. 9Ti' le u láak ju'un tin túuxtaj te'exo' tin wa'alaj te'exe' ma' unaj u yantal mix ba'al a wile'ex yéetel le j nuup kebano'obo'. 10Ma' tin wóoltaj in wa'al ca a tzelaba'ex jun puli' ti' le yóokolcaabilo'ob nup kebano'obo', wa le dzíibol taakino'obo', wa le j oocolo'obo', wa le máaxo'ob cu kultico'ob beetbil kuo'obo', tumen wa beyo' kabéet a jóokole'ex ti' le yóokolcaaba'. 11Ba'ax tin wóoltaj in wa'al te'exe' ma' u yantal mix ba'al a wile'ex yéetel le máax cu ya'alicubáa sucu'un, cu dzo'ocole' j nup keban, wa dzíibol taakin, wa cu kultic beetbil kuo'ob, wa cu ya'alic ba'al, wa cu cáaltal, wa cu yoocol. Ma' unaj mix a janale'ex yéetel le máax beyo'. 12- 13Tumen tene' mina'anen u ti'al in p'is óolt le máaxo'ob ma' ichilo'on yano'obo'. Leti'obe' Ku máax cun p'is óoltico'ob. Ba'ale' te'exe' yaan a p'is óoltique'ex le máaxo'ob ichilo'on yano'obo'. Le o'olale' lukse'ex le keban máac ichile'exo'.


Copyright
Learn More

will be added

X\