1 Corintios 3

1Bey túuno' sucu'une'ex, ma' páatji in t'anique'ex je'el bix máaxo'ob cu bisa'alo'ob tumen Quili'ich Pixani', ba'ale' je'el bix lu'umcabil máaco'obe' je'el bix chaan palo'ob ti' u ba'alo'obil Cristo. 2Tin dzaj te'ex ca'ansajo'ob ma' talamo'obi', je'el bix jun túul chaan pal chéen chu'uch cu dzaabal ti'e' tumen ma' tu páajtal u jaantic chichich janal; tumen te'exe' ma' páatji a jaantique'ex le chichich janalo'. Mix bejela'a' cu páajtal a jaantique'exe', 3tumen láili' jach lu'umcabil máaque'exe'. Ca'aliquil yaan ti' te'ex kaakas dzíibolalo'ob, kuxiltáanbail yéetel jadzlantáanbailo'obe' jach lu'umcabil máaque'ex yéetel táan a beetique'ex le ba'axo'ob cu beetic tuláacal máaco'obo'. 4Tumen le quéen u ya'al wa máax: Tene' u ti'alen Pablo, u láake' cu ya'alic: Tene' u ti'alen apolos, ¿ma', táan a quetcaba'ex yéetel le chéen lu'umcabil máaco'obo'? 5Tumen ¿máax Pablo? ¿máax Apolos? chéen u palitzilo'ob Ku, máaxo'ob meyajnajo'ob u ti'al ca a wocsaj óolte'ex Yuumtzil. Tu jujun túule' tu beetaj le meyaj dzaab ti' tumen Yuumtzil ca u beeto'. 6Teen j pak le i'inajo', Apolos jóoyabte', ba'ale' Ku beet u ch'íijil. 7Bey túuno' le máax cu pakalo' yéetel le máax cu jóoyao' mix ba'alo'ob, ba'ale' Kue' leti' tuláacal, tumen leti' beetic u ch'íijil le pakalo'. 8Le máax cu pakalo' queet yéetel le máax cu jóoyabo', quex tumen Ku cun bo'otic ti' cada jun túule' le meyaj tu beetajo'. 9Éet meyajo'ob u ti'al c meyajtic Ku, te'ex túune' beye'ex le lu'um cu meyajta'al tumen Kuo'. Wa beye'ex bey jun p'éel pakilnaj cu líikesa'al tumen Kue'. 10Tene' beyen u nojochil le j pakalo'ob máax t'a'an tumen Ku u ti'al u dzáa u yáax tuunichil, u láako'obe' táan u líiksico'ob le pak tu yóokolo'. Ba'ale' cada jun túule' yaan u canantic bix u meyaj. 11Tumen mix máac cu páajtal u dzáic u láak yáax tuunich jela'an ti' le dzo'oc u dza'abalo', lela' Jesucristo. 12Ba'ale' yaan máax cu páajtal u meyajtic yóokol le yáax tuunicha' oro, plata, qui'ichquelem tuunicho'ob, che', su'uc yéetel sakab. 13U meyaj cada jun túule' yaan u chíicbesa'al tu kiinil, tumen le kiino' yaan u taal yéetel káak, le káak túuno' yaan u ye'esic bix le meyaj tu beetaj cada jun túulo'. 14Wa yaan wa máax tu beetaj jun p'éel naj ma' tu yelele', cu bo'ota'al ti'. 15Ba'ale' wa le naj tu beetaj cu yelelo', cu láaj sa'atal, quex tumen leti'e' yaan u to'ocol, ba'ale' bey jun túul máac cu púudzul ti' káake'. 16¿Ma' wa a wojele'ex te'exe' u najile'ex Kui', yéetel cajacbal ti' te'exe' u quili'ich Pixan Ku? 17Wa jun túul ti' te'ex cu xu'ulsic u najil Kue', leti' xane' yaan u xu'ulsa'al tumen Ku, tumen u najil Kue' quili'ich, te'ex u najil Ku. 18Mix máac ca u tusubáa. Wa yaan máax ichile'ex cu tucultic jach yaan u na'at je'el bix u na'atil yóokolcaabe', unaj u beeticubáa bey jun túul mix ba'al u yojele', u ti'al ca yanac u na'at jach tu jaajil. 19Tumen u na'at le yóokolcaaba' mix ba'al u biilal tu táan Ku. Le quili'ich Dzíibo' cu ya'alic: Kue' cu beetic u lúubul le j na'ato'obo' ti' le kaas tu tuclajo'ob u beetico'obo'. 20Cu ya'alic xan: Yuumtzile' u yojel mix ba'al u biilal u tuucul le j na'ato'obo'. 21Le o'olale', mix máac unaj u ca'analcuntic u yich tu yo'olal ba'ax cu páajtal u beetic wa máax máaquil, tumen tuláacal a ti'ale'ex: 22Pablo, Apolos, Pedro, yóokolcaab, cuxtal, quíimil, bejela'e', sáamal, tuláacal a ti'ale'ex; 23te'exe' u ti'ale'ex Cristo, Cristoe', u ti'al Ku.


Copyright
Learn More

will be added

X\