1 Corintios 15

1Beoraa', sucu'une'ex, in káat ca ka'ajac te'ex le ma'alob péectzil tin tze'ectaj te'exo'. Lela' leti' le ma'alob péectzil ta kame'exo', tu'ux jeedzel a wóole'ex xan. 2Bey xan tu yo'olal le ma'alob péectzila' te'exe' toca'ane'ex, wa cu p'áatal te'ex le t'aan tin tze'ectaj te'exo', wa ma'e' chéen cunel ocsaj óolnajique'ex. 3Yáaxile', tin dzaj a wojéelte'ex le ca'ansaj tin kamajo'. Tin ca'ansaj te'exe' Cristoe' j quíim tu yo'olal c keban, je'el bix cu ya'alic le Quili'ich Dzíibo', 4j mu'uqui, yéetel tu yóox p'éel kiine' j ca'a púut cuxlaji, je'el bix cu ya'alic xan le Quili'ich Dzíibo'. 5Chíicpaj ti' Pedro, cu dzo'ocole' ti' le apóstolo'obo'. 6Cu dzo'ocole' chíicpaj ti' asab ti' quinientos sucu'uno'ob much'ucbalo'ob, ya'ab ti' leti'obe' cuxa'ano'ob tac bejela'e' dze'edzeque' dzo'oc u quíimilo'ob. 7Cu dzo'ocole' chíicpaj ti' Jacobo, cu dzo'ocole' ti' tuláacal le apóstolo'obo'. 8Tu dzooc tuláacale' chíicpaj xan ti' teen quex tene' beyen máax ma' síij tu kiinili'. 9Tumen tene' u asab chichanilen le apóstolo'obo', mix táan in najmatic in kaaba'intic apóstol, tumen tin ch'a'apachtaj u iglesia Ku. 10Ba'ale' tene' j kuchen béeytal je'el bixena' tu yo'olal u siibal utzil Ku; yéetel u siibal utzil ti' tene' ma' p'áat ma' u yichanquili'. Tumen tene' dzo'oc in meyaj asab ya'ab ti' tuláacalo'ob, quex ma' teni', ba'ale' u siibal utzil Ku cu meyaj ti' teen. 11Ba'ale' ma' c ilic wa teen wa leti'ob. Lela' leti' le ma'alob péectzil c tze'ectica' leti' xan le dzo'oc a wocsaj óoltique'exa'. 12Ba'ale' wa to'on táan c tze'ectic u ca'a púut cuxtal Cristo ichil le quimeno'obo', ¿bix u ya'alico'ob dze'edzec ti' te'exe' mina'an ca'a púut cuxtal? 13Tumen wa mina'an ca'a púut cuxtale' mix Cristo jesús ca'a púut cuxlaji'. 14Wa Cristo ma' ca'a púut cuxlaje', le ma'alob péectzil c tze'ectica' mix ba'al u biilal, yéetel le ocsaj óolal yaan te'exo' mix ba'al u biilal xan. 15Wa beyo', to'one' chéen j tuuso'on u ti'al Ku, tumen dzo'oc c a'alic Kue' tu ca'a púut cuxquintaj Cristo; tumen wa jaaj ma' tu ca'a púut cuxtal le quimeno'obo', ma' jaaj túun wa Ku tu ca'a púut cuxquintaj Cristoi'. 16Tumen wa ma' tu ca'a púut cuxtal le quimeno'obo', mix túun Cristo ca'a púut cuxlaji'. 17Wa Cristo ma' ca'a púut cuxlaje' a wocsaj óolale'exe' mix ba'al u biilal, láili' ti' yane'ex ichil a kebane'exe'. 18Wa beyo', bey xan le quíimo'ob táan u yocsaj óoltico'ob Cristoo' saatal yanilo'ob. 19Wa c alab óolal ti' Cristo chéen u ti'al le lu'umcabil cuxtala', to'on u asab óotzilil ichil tuláacal máaco'ob. 20Ba'ale' u jaajile' Cristoe' j ca'a púut cuxlaj ichil le quimeno'obo', leti' u yáaxil ichil le quimeno'ob yaan u ca'a púut cuxtalo'obo'. 21Tumen bey je'el bix tu yo'olal jun túul máac j taal le quíimil way yóokolcaabo', bey xan tu yo'olal jun túul máaque' le ca'a púut cuxtalo'. 22Bey je'el bix tuláacal cu quíimil tu yo'olal Adane', bey xan ti' tuláacal cu yantala' cuxtal tu yo'olal Cristo. 23Ba'ale' cada jun túule' tu tzoolol: Cristo yáax táanil je'el bix u yáax ich le joocho', cu dzo'ocole' le quéen taalac Cristoe', le máaxo'ob u ti'alo'obe'. 24Cu dzo'ocole' cu taal u xuul, lela' le quéen xu'ulsa'ac tumen Cristo tuláacal Yuumtzilo'ob, jalachilo'ob yéetel páajtalilo'ob, yéetel le quéen u kub le ajawil ti' Ku Yuumbil. 25Tumen Cristoe' yaan u ajawtal tac quéen dza'abac le máaxo'ob p'ecmaile' yáanal u yooc tumen Ku; 26u dzo'oc ba'ax cun xu'ulsbile' leti' le quíimilo'. 27Tumen Kue' u dzaamaj tuláacal ba'al tu yáanal u yooc Cristo. Ba'ale' le quéen u ya'al le Quili'ich Dzíib tuláacal ba'al dza'an tu yáanal u yooque', lela' cu na'ata'ale' ma' tac Kui', tumen leti' máax dzáa tu yáanal u yooc Cristo tuláacal ba'al. 28Le quéen p'áatac tuláacal ba'al yáanal u yooc Cristoe', tac Cristo máax u paal Kue' yaan u yantal yáanal u páajtalil Ku, máax dzáa tuláacal ba'al yáanal u yooc leti'. Beyo' bíin tuláacalchajac Ku ti' tuláacal. 29U láak ba'ax, yaan dze'edzec cu yocja'ob tu yo'olal le quimeno'obo'. ¿Ba'axten cu beetico'ob lela'? Wa le quimeno'ob ma' tu ca'a púut cuxtalo'obo' ¿ba'ax ti'al cu yocja'ob tu yo'olalo'ob? 30¿Ba'axten túun c dzáicbáa tu táan sajbe'entzilo'ob? 31Sáamsamal yanen tu táan quíimil, lela' jach jaaj, sucu'une'ex je'el bix le qui'imac óolal yaan teen ta wo'olale'exo', tumen dzo'oc a wocsaj óoltique'ex Yuumtzil Jesucristo. 32Wa tu yo'olal lu'umcabil ba'alo'ob ba'atelnajen yéetel dzíidzic ba'alche'ob tu caajil Efesoe'; ¿ba'ax túun tin náajaltaj yéetel lelo'? Wa jaaj ma' tu ca'a púut cuxtal le quimeno'obo', ti' jaajil yano'ob máax cu ya'alico'ob: Janaco'on yéetel ukulnaco'on tumen sáamal bíin quíimico'on. 33Ma' a cha'ique'ex a tu'usle'ex. Je'el bix cu ya'alic le queett'aano': Le kaakas éet xíimbalo'obo' cu kascuntico'ob le ma'alob cuxtalo'. 34Suunene'ex ti' jun p'éel cuxtal ma'alob yéetel toj, ma' a kebantale'ex, tumen dze'edzec ti' te'exe' ma' u kaj óolto'ob Yuum kui'. Quin wa'alic lela' u ti'al ca a ch'a'ex subtal. 35Yaan máax je'el u páajtal u káatique': ¿Bix cun ca'a púut cuxtal le quimeno'obo'? ¿Ba'ax wíinclil cun yantal ti'ob? 36J ma' na'at máac, le ba'ax ca pakico' ma' tu cuxtal wa ma' tu quíimil táanil. 37Le ba'ax ca pakico' ma' leti' le pakal cu jóokolo', ba'ale' chéen jun p'éel semilla, wa trigo wa u láak neek. 38Cu dzo'ocole' Kue' cu dzáic ti' le semillao' le wíinclil u káato', ti' jun p'éele' cu dzáic le wíinclil unaj u yantal ti'o'. 39Ma' queet tuláacal le wíinclilo'obo', u wíinclil máaque' jela'an, u wíinclil le ba'alche'obo' jela'an xan, yaanal u ti'al le ch'íicho'obo' yaanal xan u ti'al le cayo'obo'. 40Bey xan yaan ca'anil wíinclilo'ob yéetel lu'umcabil wíinclilo'ob, ba'ale' u jadzutzil le ca'anil wíinclilo'obo' jela'an ti' u jadzutzil le lu'umcabil wíinclilo'obo'. 41U sáasilil le kiino' jela'an ti' u sáasilil le ujo', bey xan jela'an ti' u sáasilil le eeko'obo'; ichil xan le eeko'obo' u sáasilil jun p'éele' jela'an ti' u sáasilil u láak. 42Bey xan cu yúuchul yéetel u ca'a púut cuxtal le quimeno'obo'. Cu mu'ucul jun p'éel wíinclil cu tu'utale' cu ca'a púut cuxtal jun p'éel wíinclil ma' tu tu'utal. 43Cu mu'ucul jun p'éel wíinclil p'ecbe'ene', cu ca'a púut cuxtal jun p'éel nojbe'en wíinclil. Cu mu'ucul wíiclil mina'an u muuke', cu ca'a púut cuxtal jun p'éel wíinclil mu'uka'an. 44Cu mu'ucul jun p'éel lu'umcabil wíinclile', cu ca'a púut cuxtal jun p'éel pixanbe'en wíinclil. Wa yaan lu'umcabil wíinclile', yaan xan pixanbe'en wíinclil. 45Bey túuno' cu ya'alic le Quili'ich Dzíibo': Adán le yáax máaco' beeta'ab jun túul máac yaan cuxtal ti'; ba'ale' le u dzooc Adano', jun túul pixan cu dzáic cuxtal. 46Ba'ale' ma' táanil le pixanbe'enilo', táanil le lu'umcabilo', cu dzo'ocole' le pixanbe'enilo'. 47Le yáax máaco', beeta'an yéetel lu'ume', lu'umcabil; u ca'a túul máaco', lela' c Yuumtzil, ca'anil. 48U wíinclilo'ob yóokolcaabe' je'el bix le máac beeta'an yéetel le lu'umo'. U wíinclilo'ob ca'ane' je'el bix le máax ca'anile'. 49Je'el bix chica'ano'on ti' le máac beeta'an yéetel lu'umo', bey xan bíin chíicpajco'on ti' le máax ca'anile'. 50In káat in wa'al te'ex, sucu'une'ex, le ba'ax bak yéetel ki'ike' ma' tu páajtal u yocol tu ajawil Ku; tumen le ba'ax cu xu'ulule' ma' tu páajtal yantal ti' jun p'éel cúuchil ma' tu xu'ulul mantadz. 51In káat ca wojéelte'ex jun p'éel ta'acbil ba'al: Ma' tuláacalo'on bíin quíimico'oni' ba'ale' tuláacalo'on yaan c jelbesa'al 52ti' jun súutuc, ti' jun p'éel mudz ich, le quéen u'uya'ac le dzooc paax ti' le trompetao'. Bíin juumnac le trompetao', le quimeno'ob túuno' yaan u ca'a púut cuxtalo'ob u ti'al ma' u quíimilo'ob tu ca'a téen mix bikin; to'on túune' yaan c jelbesa'al. 53Tumen le c wíinclil ma' tu xáantala', yaan u búucbesa'al yéetel le ba'ax cu xáantal mantadzo'; yéetel le c wíinclil cu quíimila' yaan u búucbesa'al yéetel le wíinclil ma' tu quíimil mix bikino'. 54Le quéen búucbesa'ac le c wíinclil ma' tu xáantala' yéetel le ba'ax cu xáantal mantadzo', yéetel le quéen búucbesa'ac le c wíinclil cu quíimila' yéetel le ba'ax mix bikin u quíimilo', bey túuno' cu dzo'ocpajal ba'ax cu ya'alic le Quili'ich Dzíibo': Le quíimilo' dzo'oc u dzáancha'ata'al. 55Quíimil ¿tu'ux yaan a páajtalil u ti'al loobiltico'on? ¿Tu'ux yaan, quuíimil, a dza'ancha'atajil? 56U yaach le quíimilo' leti' le kebano', yéetel u muuk le quíimilo' leti' le a'almaj t'aano'. 57Ba'ale', nib óolal ti' Yuum Ku cu beetic c dzáancha'atic tuláacal ba'al tu yo'olal c Yuumtzil Jesucristo. 58Le o'olale', in yaabilaj sucu'une'ex ca p'áataque'ex yéetel muuk ma' u péec a wóole'ex, meyajnene'ex asab ya'ab mantadz ti' u meeyjul Yuumtzil; tumen te'exe' a wojele'exe' le meyaj ca beetique'ex jun múuch' yéetel Yuumtzile' ma' chéen cuneli'.


Copyright
Learn More

will be added

X\