1 Corintios 14

1Il a wile'ex, túun, u yantal te'ex yaacunaj, yéetel dzíibolte'ex ca dza'abac te'ex pixanbe'en páajtalilo'ob tumen Ku, u mas nojochil páajtalil unaj a dzíiboltique'exe' leti' lela' ca páatac a tze'eque'ex. 2Tumen le máax cu t'aan ich jejeláas t'aano'obe' táan u t'aan yéetel Ku ma' yéetel máaco'obi', tumen mix máac na'atic. Ba'ax cu ya'alique' cu ya'alic tu yo'olal Quili'ich Pixan ba'ale' ta'acbil ba'alo'ob. 3Ba'ale' le máax cu tze'eque', táan u t'aan yéetel u láak máaco'ob u ti'al u mu'ukanquintic u yóolo'ob, u líiksic u yóolo'ob yéetel u qui'imaccuntic u yóolo'ob. 4Le máax cu t'aan ich jejeláas t'aano'obe' chéen leti' cu caxtic utz, ba'ale' le máax cu tze'eque' cu beetic u caxtic utz tuláacal le yano'ob te j iglesiao'. 5In káat ca yanac ti' tuláacale'ex u páajtalil a t'ane'ex ich jejeláas t'aano'ob. Ba'ale' asab in káat ca páatac a tze'eque'ex. Tumen mas ma'alob u beeta'al lela' ti' u yúuchul t'aan ich jejeláas t'aano'ob, ja'ali ca tzo'oloc le ba'ax cu ya'ala'al ich le jejeláas t'aano'obo', u ti'al u yutzil le máaxo'ob yano'ob te j iglesiao'. 6Le o'olale', sucu'une'ex, wa teen quin bin in xíimbalte'ex táan in t'anique'ex ich jejeláas t'aano'obe'. ¿Ba'ax u biilal te'ex wa in t'aano'ob ma' tu taasic te'ex wa ba'ax chíicbesajil, wa ba'ax kaj óolalil, wa ba'ax tze'equil wa ba'ax ca'ansajil? 7Co'ox dzáic u queet t'aanil u nu'uculilo'ob paax, mina'an cuxtal ti'ob, je'el bix le flauta wa le arpao'. Wa ma' tu páajtal u yu'uba'al u jejeláas juume', ma' tu páajtal u yojéelta'al ba'ax cu paxic. 8Yéetel ti' le ba'atelo'obo' wa ma' tu na'ata'al ba'ax cu paxic le trompetao', mix máac cun u líiksubáa u ti'al le ba'atelo'. 9Queet u yúuchul ti' te'ex: wa yéetel a waake'ex ma' táan a wa'alique'ex t'aano'ob cu páajtal u na'ata'ale', ¿bix je'el u páajtal u yojéelta'al ba'ax ca wa'alique'exe'? ¡Chéen bin a ca'aje'ex t'aan ti' iik! 10Tu jaajile' yaan ya'abcach jejeláas t'aano'ob yóokolcaab, yéetel tuláacal na'atbe'eno'ob, 11ba'ale' wa teen ma' táan in na'atic u t'aan máax t'aniquene', quin béeytal bey táanxel lu'umil in ti'al tene'. 12Le o'olale', bey jach yaan ti' te'ex u dzíibolalil a kamique'ex pixanbe'en páajtalilo'obe', táanilcunte'ex tu yóokol tuláacale' le páajtalilo'ob cu beetic u caxtico'ob utz le máaxo'ob yano'ob te j iglesiao'. 13Bey túuno' le máax cu t'aan ich jejeláas t'aano'obe' unaj u káatic ti' Ku ca dza'abac ti'e' u páajtalil u tzolic ba'ax cu ya'alic. 14Ba'ale' wa teen quin payalchi' ti' jun p'éel t'aan ma' kaj óola'ane', tu jaajile' in pixane' táan u payalchi', ba'ale' in tuucule' ma' tu kamic mix jun p'éel utz. 15¿Ba'ax túun unaj in beetic? Unaj in payalchi' yéetel in pixan, ba'ale' unaj in payalchi' xan yéetel in na'at. Unaj in kaay yéetel in pixan, ba'ale' unaj in kaay xan yéetel in na'at. 16Tumen wa teech táan a qui'iqui' t'antic Ku chéen yéetel a pixane', le máax u'uyiqueche' ¿bix cun u ya'alil Amén tu yo'olal le gracias ca dzáico' wa ma' tu na'atic ba'ax ca wa'alic? 17A payalchi' iquil a dzáic graciase' jach ma'alob, ba'ale' le u láako' ma' tu caxtic mix jun p'éel utz. 18Quin nib óolal ti' Ku tumen tene' cu páajtal in t'aan ich jejeláas t'aano'ob asab ti' tuláacale'ex. 19Ba'ale' ichil u múuch'ul le yano'ob te j iglesiao' mas in káat in wa'al cinco u p'éelel t'aan cu na'ata'ale', u ti'al in ca'ansic u láakobe', ti' ca in wa'al diez mil u p'éelel t'aan ma' tu na'ata'alo'ob. 20Sucu'une'ex ma' a tuucule'ex je'el bix mejen paalale'. Beetaba'ex je'el bix paale' ti' le ba'alo'ob kaastaco'obo', ba'ale' je'el bix nucuch máaco'obe' ti' a tuucule'ex. 21Tu libroil le a'almaj t'aano' dzíiba'an: Bíin in t'aan le caaj ich yaanal t'aano'ob yéetel tu chi' táanxel lu'umil máaco'ob, ba'ale' mix bey cun u yu'ubeno'obo', cu ya'alic Yuumtzil. 22Bey túuno', u páajtalil u yúuchul t'aan ich jejeláas t'aano'obe' jun p'éel chíiculal u ti'al le máaxo'ob ma' ocsaj óolo'obo' ma' u ti'al le ocsaj j óolo'obo'. Ba'ale' u páajtalil u tze'ecta'al le ma'alob péectzilo' jun p'éel chíiculal u ti'al le j ocsaj óolo'obo', ma' u ti'al le máaxo'ob ma' ocsaj óolo'obo'. 23Bey túuno', le quéen much'lac tuláacal le iglesiao', wa tuláacal táan u t'aano'ob ich jejeláas t'aano'obe', wa cu yocol máaxo'ob ma' u kaj óolo'ob Ku mix cu yocsaj óoltico'obe', ¿ma' je'el u ya'alico'ob dzo'oc u chocotal a poole'exe'? 24Ba'ale' wa tuláacal táan u tze'ectic le ma'alob péectzilo' wa cu yocol wa máax ma' yocsaj óoli' mix u kaj óol Kui', yaan u kaj óoltic u kebano'ob yéetel yaan u xaklic u pucsi'ikal tu juunal, le quéen u yu'ub ba'ax cu ya'alic tuláacal. 25Beyo' le ba'ax u ta'acmaj tu pucsi'ikalo' yaan u chíicpajal, yéetel yaan u xoltal u ti'al u kult Junab Ku, tumen yaan u ya'alique': Ku ti' yaan ta wéetele'ex tu jaajile'. 26Bey túuna', sucu'une'ex, le ba'ala' bey yanila'. Le quéen much'laque'exe', dze'edzec ti' te'exe' yaan kaayo'ob ti', wa ca'ansajo'ob, wa yaan ba'ax dza'an u yojéelt tumen Ku, wa tze'eco'ob ich jejeláas t'aano'ob wa u tzoolol le tze'eco'oba'. Ma'alob, tuláacale' beeta'ac u ti'al u yutzil le máaxo'ob yano'ob te j iglesiao'. 27Le quéen úuchuc t'aan ich jejeláas t'aano'obe', t'aanac chéen ca'a túul wa óox túul máac ba'ale' jujun túulil. Unaj u yantal xan máax tzolic ba'ax cu ya'alico'ob. 28Ba'ale' wa mina'an mix máac cu páajtal u tzolique', mas ma'alob ma' u ya'ala'al mix ba'al ich jejeláas t'aano'ob ti' le much'a'ano'obo', ba'ale' t'aanac chéen u ti'al leti' yéetel u ti'al Ku. 29Bey xan, wa yaan u tze'ecta'al le ma'alob péectzilo' t'aanac ca'a túul wa óox túul, u láako'obo' u p'is óolto'ob ba'ax cu ya'ala'al. 30Ba'ale' wa Ku cu dzáic ojéeltbil wa ba'ax ti' máax culucbale', le máax cu t'aan túuno' unaj u maquic u chi'. 31Bey túuno' tuláacale'ex cu páajtal a tze'eque'ex jujun túulil u ti'al ca canbalnac yéetel ca yanac u yóol tuláacal. 32Le máaxo'ob cu tze'ectico'ob le ma'alob péectzilo' unaj u péedz óoltico'ob u pixano'ob, 33tumen Junab Kue' u Kuil jéedzel, ma' u Kuil xa'aka'an tuuculi'. Wa ca beetique'ex je'el bix u beeta'al ti' tuláacal u iglesiaob le ocsaj óolo'obo', 34le co'olelo'obo' ma' unaj u t'aano'ob ti' u kultajil le iglesiao', tumen lela' ma' tu cha'abal. Unaj u yu'ubico'ob t'aan je'el bix cu ya'alic u ya'almaj t'aan Kue'. 35Wa u káat u yojéelto'ob wa ba'axe', unaj u káatico'ob ti' u yíichamo'ob tu taanajo'ob, tumen ma' ma'alob u yila'a ca t'aanac jun túul co'olel ti' le kultajo'. 36Unaj a kaj óoltique'exe' u ya'almaj t'aan Kue' ma' chu'unpaj ta wéetele'exi', mix chéen te'ex ta kamaje'exi'. 37Wa yaan máax cu tuclic yaan páajtalil ti' u tze'ectic u ma'alob péectzil Kue', wa cu tuclic yaan u sáasilil Quili'ich Pixan ti'e', unaj u kaj óoltique' le ba'ax quin dzíibtic te'exa' u ya'almaj t'aan Yuumtzil. 38Ba'ale' wa ma' tu kaj óoltique', ma' unaj u kaj óolta'al leti' xani'. 39Bey túuno', in sucu'une'ex, il a wile'ex ca páatac a tze'ectique'ex u ma'alob péectzil Ku, yéetel ma' a wet'ique'ex u yúuchul t'aan ich jejeláas t'aano'ob; 40ba'ale' tuláacale' unaj u beeta'al ma'alob yéetel tu tzoolol.


Copyright
Learn More

will be added

X\