1 Corintios 13

1Wa ca t'aanaquen yéetel u t'aa máaco'ob wa u t'aa ángelo'ob, ba'ale' mina'an teen yaacunaje', quin béeytal je'el bix jun p'éel ba'al cu bojolaanquile' wa jun p'éel campana chéen táan u juume'. 2Wa táan in tze'ectic ma'alob péectzilo'ob in kammaj ti' Ku, wa in kaj óol tuláacal ta'acbil ba'alo'ob, wa in wojel tuláacal ba'al, wa yaan teen xan tuláacal le ocsaj óolal kabéet u ti'al in luksic le witzo'ob tu cúuchilo'obo', ba'ale' mina'an teen yaacunaje', mix ba'alen. 3Wa quin t'oxic tuláacal ba'ax yaan teen, wa quin kubic xan in wíinclil u ti'al ca tóoca'ac, ba'ale' mina'an teen yaacunaje', mix ba'al u biilal teen. 4Le máax yaan u yaacunaje', yaan chowac óolal ti', utz u pucsi'ikal, mina'an kaakas dzíibolal ti', ma' tu nojba'alcunsicubáa, ma' tu ca'analtal u yich. 5Ma' tu kaakas t'aan, ma' tu caxtic ba'al u ti'al, ma' tu p'u'ujul, ma' tu ch'a'a kuxtic mix máac. 6Ma' tu qui'imactal u yóol tu yo'olal u kebano'ob u láak máac, ba'ale' cu qui'imactal u yóol tu yo'olal le jaajilo'. 7tuláacal cu mukyajtic yéetel ocsaj óolal, yéetel alab óolal yéetel chuca'an óolal. 8Le yaacunajo' mix bikin cu quíimil. Bíin taalac u kiinil u xu'ulul u yúuchul tze'ec, bíin jáawac xan u yúuchul t'aan ti' jejeláas t'aano'ob, bíin luksa'ac xan le kaj óolalilo'. 9Tumen ma' chuca'an c kaj óolali', mix chuca'an c tze'equi'. 10Ba'ale' le quéen taalac le ba'ax chuca'ano', le ba'ax ma' chuca'ano' bíin luksa'ac. 11Ca'ach chan xi'ipalene', quin t'aan je'el bix jun túul paale' quin tuucul je'el bix jun túul paale' yéetel quin na'atic ba'al je'el bix jun túul paale', ba'ale' le ca j nojoch máacchajene', tin p'ataj paachil u ba'alubáa paalil. 12Bey xano' bejela'e' ma' sáasil c ilic tuláacal ba'ali', táan c ilic je'el bix u yila'a ti' jun p'éel néen u yoochel wa ba'axe', ba'ale', bíin c il tuláacal ba'al jach sáasil. bele' ma' chuca'an in kaj óolali', ba'ale' bíin in kaj óolt tuláacal ba'al, je'el bix u kaj óoltmajen Kue'. 13Bey túuno', le ocsaj óolalo', le alab óolalo' yéetel le yaacunajo' mix bikin u xu'ululo'ob. Ba'ale' u asab nojochil ichil le óox p'éela' leti' le yaacunajo'.


Copyright
Learn More

will be added

X\