1 Corintios 12

1Sucu'une'ex yaan dze'edzec ba'alo'ob in káat ca a wojéelte'ex tu yo'olal le páajtalilo'ob cu dza'abal tumen Quili'ich Pixan ti' cada jun túulo'. 2Te'exe' ma'alob a wojelile'ex le ca'ach ma'ili' ocsaj óolnaque'exe', ca cha'ique'ex a jíiltale'ex tu paach le toot beetbil kuo'obo'. 3Le o'olale', in káat ca wojéelte'ex beoraa' mix máac ca u ya'al: ¡Kaakas t'anta'ac Jesús! wa táan u t'aan tu yo'olal u páajtalil Quili'ich Pixan. Mix máac xan cu páajtal u ya'alic: ¡Jesuse' Yuumtzil! wa ma' táan u t'aan tu yo'olal u páajtalil Quili'ich Pixan. 4Yaan jejeláas páajtalilo'ob cu páajtal u kamic máac, ba'ale' jun túulili' Pixan máax dzáic. 5Yaan xan jejeláas meyajo'ob cu páajtal u beetic máac, ba'ale' jun túulili' Yuumtzil máax c meyajtic. 6Yaan xan jejeláasil bix u beeta'al ba'al, ba'ale' jun túulili' Ku máax beetic tuláacal le ba'alo'oba' ti' tuláacal máac. 7Kue' cu dzáic ti' cada jun túule' u chíiculalil ti' yaan Quili'ich Pixan tu yicnale', u ti'al u yutzil tuláacal. 8Tu yo'olal u quili'ich Pixane' cu dzáic ti' jun túule' u páajtalil u t'aan yéetel na'at, ti' u láake', tu yo'olal u Quili'ich Pixane' cu dzíic ti' u páajtalil u t'aan yéetel jun p'éel nojoch kaj óolalil. 9U láake' cu kamic ocsaj óolal tu yo'olal láili' Quili'ich Pixane', u láake' cu kamic páajtalil u ti'al u dzáic toj óolal ti' le koja'ano'obo'. 10Yane'e' cu kamic páajtalil u ti'al u beetic chíiculalo'ob, u láake' cu kamic páajtalil u ti'al u tze'ec, ti' u láake', Kue' cu dzáic na'at u ti'al u kaj óoltic máacalmáac le kaakas pixano'obo' yéetel máacalmáac le Quili'ich Pixano'. U láake' cu kamic páajtalil u ti'al u t'aan ich jejeláas t'aano'ob. Bey xan máax cu kamic páajtalil u ti'al u tzolic ba'ax a'ala'ab yéetel jejeláas t'aano'obo'. 11Ba'ale' tuláacal le ba'alo'oba' chéen jun túulili' Quili'ich Pixan máax beetico'; leti' xan t'oxic le jejeláas páajtalilo'obo' ti' cada jun túul je'el bix u káate'. 12Tumen Cristoe' bey jun p'éelili' wíinclil yaan ya'ab u xéexet'ale'. Le u xéexet'alo'oba' quex ya'abo'obe' cu beetico'ob jun p'éelili' wíinclil. 13Tumen tuláacalo'one' quex wa judíon wa griego'one', quex palitzilo'on wa quex ma'e', ocja'anajo'on ti' jun p'éelili' wíinclil tu yo'olal le jun túulili' Quili'ich Pixano'. Ti' tuláacalo'on dzo'oc u dza'abal le jun túulili' Quili'ich Pixan u ti'al c uko'. 14Jun p'éel wíinclile' ma' chéen yéetel jun xéet' beeta'anili' ba'ale' yéetel ya'ab u xéexet'al. 15Wa le ooc cu ya'alic: Tene' ma' kabeni', le o'olale' ma' táacpaja'anen ti' le wíinclilo', ¿tu yo'olal lelo' ma' táacpaja'an wa ti' le wíinclilo'? 16Wa le xiquin cu ya'alic: Tene' ma' icheni', le o'olale' ma' táacpaja'anen ti' le wíinclilo' ¿tu yo'olal lelo' ma' wa táacpaja'an ti' le wíinclilo'? 17Tumen wa tuláacal le wíinclil icho', ¿bix je'el u páajtal c u'uyaje'? Wa tuláacal le wíinclil xiquino', ¿bix je'el u páajtal c úudzbentaje'? 18Ba'ale' Kue' tu dzaj ti'u jujun p'éel u xéexet'al le wíinclilo' je'el tu'uxac tu yóoltaje'. 19Wa tuláacal chéen jun p'éel u xéet'ele' ¿Tu'ux yaan le wíinclilo'? 20Ba'ale' tu jaajile' quex ya'ab u xéexet'ale', yaan chéen jun p'éelili' wíinclil. 21Le icho' ma' tu páajtal u ya'alic ti' le kabo': Ma' ka'abetech teni'. Mix le pool cu páajtal u ya'alic ti' le ooco'obo': Ma' ka'abete'ex teni'. 22Tu jaajile', le u xéexet'al le wíinclil cu yila'al bey mina'an ba'al u biilale', leti'ob mas jach kabéeto'ob. 23Yéetel u xéexet'al le wíinclil c tuclic ma' tzicbe'eno'obo' c dzáic c óol c búucbesico'ob. Yéetel le u xéexet'al c tuclic ma' qui'ichquelentaco'obo' jadzutz c búucbesico'ob, 24ma' je'el bix le u xéexet'al jach qui'ichquelemtaco'obo'. Bey tu beetbil Ku le wíinclilo' u ti'al ca tzi'iquic le u xéexet'al le wíinclil ma' jach yaan u tzicbe'enilo'obo'; 25u ti'al ma' u yantal jatzlantáanbail ti' le wíinclilo', ba'ale' tuláacal u xéexet'al le wíinclilo' ca u paaclan canantuba'ob. 26Wa jun xéet' le wíinclil cu mukyajo', tuláacal le u láak u xéexet'alo' cu mukyajo'ob xan. Wa jun xéet' cu táan óolta'al jach ma'alo'obe', tuláacal le u láak u xéexet'alo' cu qui'imactal u yóolo'ob jun múuch'. 27Ma'alob túun te'exe' u wíinclil Cristo, cada jun túule' jun p'éel u xéexet'al le wíinclilo'. 28Bey túuno', Kue' u dzaamaj jejeláas meyajo'ob ti' dze'edzec ichil le iglesiao': tu yáaxile' le apóstolo'obo', tu ca'a p'éelile' le máaxo'ob cu tze'eco'obo'. Tu yóox p'éele' le j ca'anbesajo'obo', cu dzo'ocole' le cu beetico'ob chíiculalo'obo', cu dzo'ocole' le máaxo'ob cu dzáico'ob toj óolal ti' le koja'ano'obo', le máaxo'ob cu yáantajo'obo', le máaxo'ob cu tzol bejo'obo', yéetel le máaxo'ob cu kamico'ob u páajtalil t'aano'ob ich jejeláas t'aano'obo'. 29¿Láaj apóstolo'ob wa? ¿tuláacal wa j tze'eco'ob? ¿Láaj ca'anbesajo'ob wa? ¿Tuláacal wa cu beetico'ob chíiculalo'ob? 30¿Tuláacal wa yaan páajtalil ti'ob u ti'al u dzáico'ob toj óolal ti' le koja'ano'obo'? ¿Tuláacal wa cu t'aano'ob ich jejeláas t'aano'ob? Tu jaajile' ma' 31Dzíibolte'ex ca kame'ex ti' Ku u páajtalil a beetique'ex u asab ma'alobil ba'alo'ob. Ba'ale' tene' bin in ca'aj in we'es te'ex jun p'éel bej asab ma'alob.


Copyright
Learn More

will be added

X\