1 Corintios 11

1Cuxlene'ex je'el bix in cuxtal teno', je'el bix tene' táan in cuxtal je'el bix u cuxtal Cristoe'. 2Sucu'une'ex, quin qui'iqui' t'antique'ex tumen mantadz ca ka'asiquene'ex yéetel ca beetique'ex ba'ax tin ca'ansaj te'ex. 3Ba'ale' in káat ca a na'ate'exe' Cristoe' u pool tuláacal máac, yéetel le íichamo' u pool u yatan, je'el bix Kue' u pool Cristo. 4Wa jun túul máac cu pixic u pool ca'aliquil táan u payalchi' wa ca'aliquil táan u tze'eque' subtzil u ti'al u pool. 5Ba'ale' wa jun túul co'olel ma' tu pixic u pool ca'aliquil táan u payalchi' wa ca'aliquil táan u tze'eque' subtzil u ti'al u pool. Lelo' queet wa cu kos u tzo'otzel u pool. 6Wa jun túul co'olel ma' tu pixic u poole' ma'alob ca u kos tuláacal u tzo'otzel u pool jun puli'. Ba'ale' wa cu tuclic subtzil u ti'al jun túul co'olel ca u kos u tzo'otzel u pool wa ca norochquinta'ac u poole', u pix u pool túun. 7Jun túul j xiibe' ma' unaj u pixic u pooli' tumen leti'e' u yoochel Ku yéetel cu ye'esic u nojbe'enil Ku. Ba'ale' jun túul co'olele' cu ye'esic u nojbe'enil máac. 8Tumen le ca tu beetaj Ku le j xiibo', ma' tu beetaj ti' co'oleli', ba'ale' co'olele' tu beetaj ti' j xiib. 9Co'olele' j beeta'ab tu yo'olal j xiib, ma' j xiib beeta'ab tu yo'olal co'oleli'. 10Le o'olale' le j co'olelo' unaj u yantal tu yóokol u poole' jun p'éel u chíiculal ti' yaan yáanal u páajtalil yíichame' tu yo'olal le ángelo'obo'. 11Tu jaajile', ti' le cuxtal yaan to'on ti' Cristoa', jun túul j xiibe' ma' tu páajtal u yantal wa ma' tu yo'olal le co'olelo', mix jun túul co'olel cu yantal wa ma' tu yo'olal le j xiibo'. 12Tumen quex co'olel beeta'ab ti' xiibe', bey xan xiibe' cu síijil ti' co'olel. Ba'ale' tuláacal lela' ti' Ku u taal. 13A'ale'ex te'ex wa toj u payalchi' jun túul co'olel ti' Ku quex ma' u pixmaj u pooli'. 14Le cuxtalil anilo'ona' cu ca'ansic to'one' subtzil u ti'al jun túul xiib ca u cha'a u chowactal u tzo'otzel u pool, 15ba'ale' jun p'éel tzicbe'enil ti' co'olel u chowactal u tzo'otzel u pool, tumen dzaab ti' ca úuchuc beyo' u ti'al u pixic u pool. 16Wa yaan máax u káat ba'atel t'aan tu yo'olal lela', unaj u yojéeltique' mix u iglesiaob Ku suuc u beetic yaanal ba'al. 17Ba'ale' ma' tu páajtal in qui'iqui' t'antique'ex tu yo'olal le ba'ax quin in dzíibt ti' te'ex beoraa', tumen ca much'caba'ex u ti'al kaas, ma' u ti'al utzi'. 18Tumen yáax táanile' cu ya'ala'al tene' le quéen much'laque'ex u ti'al kultaje', yaan jatztáanbail ichile'ex. Quin tuclique' yaan ba'ax jaaj ti' tuláacal le ba'ax cu ya'alalo'. 19Tumen kabéet ca yanac jatztáanbail ichile'ex u ti'al ca kaj óolta'ac máaxo'ob u yoquesmaj u yóolo'ob tu jaajil ti' Cristo. 20Tu yo'olal le jatztáanbailo', le janal ca jaantique'ex le quéen much'laque'exo' ma' jaaj wa u quili'ich janal Yuumtzili'. 21Tumen tu yorail le janalo', cada jun túule' cu jaantic u janal. Ca'aliquil jun túul wi'ije' u láake' cala'an. 22¿Mina'an a wotoche'ex u ti'al a janale'ex yéetel a wukule'ex? Beya' táan a p'ectique'ex u iglesia Ku yéetel táan a pajique'ex u subtal le máaxo'ob mina'an mix ba'al ti'obo'. ¿Ba'ax quin in wa'al te'ex? ¿unaj in qui'iqui' t'antique'ex? ¡Ti' lela' ma'! 23Tumen tene' tin kamaj ti' Yuumtzil le ca'ansaj tin dzaj ti' te'exa': Ti' le áakab j ku'ubic Yuumtzile', tu ch'a'aj le waaj tu kabo', 24cu dzo'ocol u dzáic gracias ti' Kue', tu xet'aje' ca tu ya'alaj: Jaante'ex, lela' in wíinclil, xet'a'an ta wo'olale'ex. Beete'ex lela' u ti'al a ka'asiquene'ex. 25Bey xan, cu dzo'ocol u janalo'obe', tu ch'a'aj tu kab le u nu'ucul le ukulo' ca tu ya'alaj: Le ukula' leti' le nup t'aan jaajcunta'an tumen in ki'ikelo'. Je'el jay téen ca wuke'exe', beete'ex u ti'al a ka'asiquene'ex. 26Bey túuno' je'el jay téen ca a jaante'ex le waaja' yéetel ca a wuke'ex le ukula' táan a dzáique'ex kaj óoltbil u quíimil Yuumtzil tac quéen taalac. 27Bey túuno', je'el máaxac ca u jaant le waaja' wa ca u yuk u yukul Yuumtzil ma' je'el bix unaje' táan u kebantal tu contra u wíinclil yéetel u ki'ikel Yuumtzil. 28Le o'olal cada jun túule' unaj u xaklic u tuucul ma'ili' u jaant le waajo' wa u yuk le ukulo'. 29Tumen wa cu janal yéetel cu yukul ba'ale' ma' tu na'atic wa u wíinclil Yuumtzile', cu janal yéetel cu yukul u ti'al u p'is óolta'al. 30Le o'olale', ya'ab ti' te'ex koja'antac yéetel luubul u muuko'ob, yéetel yaan dze'edzec dzo'oc u quíimilo'ob. 31Ba'ale' wa ca c na'at ma'alobe', Yuumtzile' ma' tu p'is óoltico'on beyo'. 32Ba'ale' le quéen u p'is óolto'on Yuumtzile', cu jadzico'on, u ti'al ma' c xot kinta'al yéetel le yóokolcaabilo'obo'. 33Bey túuno', in sucu'une'ex, le quéen a much'jaba'ex u ti'al a jaante'ex le quili'ich janalo', pa'ataba'ex u ti'al ca múuch' janaque'ex. 34Wa yáam máax wi'ije' janac tu yotoch, u ti'al ma' a p'is óolta'ale'ex tumen Ku iquil ma' ta much'caba'ex tu beeli'. Le u láak ba'alo'obo' teen quin ilic le quéen xi'iquen in wile'exe'.


Copyright
Learn More

will be added

X\