1 Corintios 10

1In káat ca a wojéelte'ex sucu'une'ex, tuláacal c úuchben taataobe' anji'ob tu yáanal le múuyalo' yéetel tuláacalo'ob j máano'ob tu chúumuc le ka'anabo'. 2Beyo' tuláacalo'ob ocja'anajo'ob yéetel Moisés ti' le múuyalo' bey xan ti' le ka'anabo'. 3Bey xan tuláacalo'ob tu jaanto'ob le ca'anil waajo' 4yéetel tuláacalo'ob tu yukajo'ob le ca'anil ukulo'. Tumen tu yukajo'ob le ja' cu jóokol ti' le ca'anil tuunich láakintico'ob ca'aliquil táan u bino'obo'. Le tuunicho' Cristo. 5Quex beyo' u asab ya'abil ti'obe' ma' lúubo'ob utzil ti' Kui', le o'olale' j quíimo'ob te x tocoy lu'umo'. 6Tuláacal lela' j úuche' bey jun p'éel ca'ansaj c ti'ale', u ti'al ma' c dzíiboltic kaakas ba'alo'ob, je'el bix tu dzíiboltajo'ob leti'obe'. 7Le o'olale' ma' a kultique'ex beetbil kuo'ob je'el bix tu beetajo'ob dze'edzec leti'obe', je'el bix cu ya'alic le Quili'ich Dzíibo': Le máaco'obo' j culajo'ob janal yéetel ukul, cu dzo'ocole' ca j líiko'ob u beeto'ob cha'ano'ob. 8Ma' unaj c nup kebantali', je'el bix tu beetajo'ob dze'edzec ti'obe', ca j quíim veintitres mil máaco'ob ti' jun p'éelili' kiin. 9Mix unaj c túuntic u yóol Yuumtzil je'el bix tu beetajo'ob dze'edzec ti'obe' ca j quíimo'ob tumen j chi'ibo'ob tumen le ca'ano'obo'. 10Mix a tutuc chi'ex tu contra Ku, je'el bix tutuc chi'inajo'ob dze'edzec ti'ob ca j quiimsa'abo'ob tumen u angelil le quíimilo'. 11Tuláacal lela' j úuch ti' c úuchben taataob ca j dzaab ti' le Quili'ich Dzíibo' u ti'al jun p'éel ca'ansaj ti' to'on cuxa'ano'on ti' le u dzooc kiino'oba'. 12Bey túuno' le máax cu tuclic wa'alacbal ma'alo'obe' u canant ma' u lúubul. 13Le túuntaj óolalo'ob ca mukyajtique'exo' queet yéetel le cu mukyajtic tuláacal máaco'. Ba'ale' te'exe' cu páajtal a alab óoltique'ex Ku, tumen bíin u dzáa xan bix je'el u páajtal a jóokole'exi', u ti'al ca páatac a mukyajtique'ex. Ba'ale' le quéen talac le túuntaj óole' Ku túune' bíin u dzáa xan bix je'el u páajtal a jóokole'exi' 14Le o'olale', in yaabilaj Ba'ale quen taalac le túuntaj óole Kue'tume' bíin u dzaa xan bix je'el u páajtal a jóok'le'exi' sucu'une'ex, púudzene'ex ti' u kultajil le beetbil kuo'obo'. 15Táan in t'anique'ex je'el bix máaco'ob yaan u na'ato'obe', te'ex túune' cu páajtal a p'is óoltique'ex ba'ax quin wa'alic te'ex. 16Le quéen c uk le ukul qui'iqui' t'anta'an iquil c dzáic gracias ti' Ku tu yo'olale', táan c ukic u ki'ikel Cristo, le quéen c jaant le waaj c xet'ico' táan c jaantic u wíinclil Cristo. 17Quex sen ya'abo'one' tuláacalo'on c janal ti' jun p'éelili' waaj, le o'olale' jun p'éelili' wíinclilo'on. 18Il a wile'ex u caajal Israel; le máaxo'ob cu jaantico'ob le quíimsbil sibalo'obo' cu táacpajalo'ob ti' u cúuchilo'ob kultaj. 19Ma' in káat in wa'ale' wa yaan u tojol le beetbil kuo', mix wa le janal dza'an tu táan le beetbil kuo' asab ma'alob ti' u láak janal. 20Ba'ax quin wa'alique' le máaxo'ob ma' u kaj óolo'ob kuo' le quéen u dza'ob wa ba'axe' cu dzáico'ob ti' le kaakas pixano'obo' ma' ti' Kui'. Le o'olale' ma' in káat ca yanac ba'al a wile'ex yéetel le kaakas pixano'obo'. 21Ma' tu páajtal a wukique'ex u yukul Yuumtzil, wa ca wukique'ex u yukul le kaakas pixano'obo'. Mix cu páajtal a janale'ex tu mayacche' Yuumtzil, wa ca janale'ex tu mayacche' le kaakas pixano'obo'. 22¿A káate'ex wa a p'uje'ex Yuumtzil? ¿Asab wa mu'uka'ano'on ti' leti'? 23U jaajil ba'ax cu ya'ala'al, jun túul máaque' jáalkab u ti'al u beet je'el ba'alac u káate', ba'ale' ma' tuláacal ba'al cu taasic utzi'. Bey, jun túul máaque' jáalkab u ti'al u beetic jeel ba'alac u káate', ba'ale' ma' tuláacal ba'al cu yantal u ti'al u ch'íijil máac ti' u pixani'. 24Mix máac ca u caxant utz u ti'al tu juunal, ba'ale' unaj u caxantic utz u ti'al u láak máaco'ob. 25Man a jaante'ex je'el ba'alac ca co'onoc kíiwique', ma' a káatique'ex mix ba'al tu yo'olal u tuucul máac, 26tumen le lu'uma' yéetel tuláacal le ba'ax yaan te j lu'uma' u ti'al Yuumtzil. 27Wa jun túul máac ma' ocsaj óol cu t'anique'ex janale', wa a káate'ex bine', jaante'ex je'el ba'alac ca dza'abac te'exe', ma' a káatique'ex tu yo'olal u tuucul máac. 28Ba'ale' wa yaan máax cu ya'alic te'exe': Le baka' j dzaab tu táan beetbil kuo'ob, ma' a jaantique'ex túun, u ti'al ma' a loobiltique'ex le máax a'alo', tu yo'olal u tuucul máac. 29Táan in wa'alic u tuucul le u láako' ma' a tuucul techi'. Ba'ale' yaan máax cu páajtal u káatic: ¿Ba'ax teen bíin p'is óolta'ac ba'ax quin beetic tu yo'olal u tuucul yaanal máac? 30Tumen wa quin dzáic nib óolal ti' Ku tu yo'olal ba'ax quin jaantique', ¿ba'axten bíin a'ala'ac teen ba'al tumen táan in jaantic? 31Ma'alob túun wa ca janale'ex, wa ca wukule'ex, wa ca beetique'ex u láak wa ba'axe', beete'ex tuláacal u ti'al u nojbe'enil Ku. 32Ma' a dzáique'ex ti' mix máac ba'al o'olal u lúubul: mix ti' le judíobo', mix ti' le máaxo'ob yano'ob tu iglesia Kuo'. 33Tene' táan in dzáic in wóol in lúubul utzil tu táan tuláacal máac ti' je'el ba'alac ca in beete'. Ma' táan in caxtic in wutzil tin juunal ba'ale' u yutzil u láak máaco'ob u ti'al ca to'ococo'ob.


Copyright
Learn More

will be added

X\