ROMA 15

1Nit ninine roho werehon arimanowen it inine elehon ler eneptuk lit nininggareg fahet eneg nenehiyeg toho wenggel haruk lamuhuk fug. 2Ap winon fano wereg lit inindi wirik toho welamag ulug it arimano enehiyeg toho welamuhup ane fahet eneg nit nenebe wal taneg obog tohowen yami ruruk lamuhuk. 3Kristus inowen oho inggareg fahet eneg wenggel haruk lit Nahiyeg toho welaruhuk ulug yami ruruk latfag fug. Kristus ino fahet haharoho imbibag ane aru, "Hat pet Haptuk lit Habug urusa ane ari An nubam atisi." 4Mun angge man angge fahet haharoho imbibahon ari niren kim haruk lit nit ninindi anggar amag ulug haharoho imbibag. Ninindi se aruhu ulug haharoho imbibag ane ari niren fobik fano aruhu ane fahet seneg lit ninindi imbik wamburuk lit mangno ruruk lamuhuk. 5Ninikni Allah ninindi wirikap neneptuk lit seyap neneptuk ahun inowen Yesus Kristusen peruk hag toho hir oho honori men sebe roho welamuhup ulug mangnowap heneptuk laruhu. 6Ari roho wereg lit henele misig hinindi misig wereg lit Ninikni Allah ino Nonowe Yesus Kristus Ikni wereg ulug wel turuk lamuhup. 7Nit obog tohowen Allah wel turuk lamuhuken Nonowe Yesus Kristus inowen Indi nenesug latisi hag toho hiren oho hit-hit hinindi roho welamuhup. 8Anden peruk lahi ane iminon tu: Allahn niniknisi unumbasi unubam sali ibahon pisan isamin fug ulug tem toho irikik pibagma Kristus ino ap enembilahap palehon enemingmingangge atfag. 9Allah unuk enepeleg inap o pumbuk winon arimanowen Allah indi nenesug lit wereg ulug At wel turuk lamuhup. Ari ulug haharoho imbibag ane aru, "O pumbuk enemu inap sehelimu wereg lit Hat wel Haptuk lit Hat hunuk fahet sini yunggultuk laruhuk." 10Eke haharoho imbibahon tu, "Hit henemu hinap famen Allah umalikisi men mangno atuk lit henehiyeg toho welamuhup." 11Nin eke imbibahon tu, "Hit o pumbuk henemu hinap famen obog tohowen Allah wel turukmu hununggul unuk henemu-henemu welahebon arimanowen Unuk palimuwap turuk lamuhup." 12Nin eke Yesayan haharoho imbibahon tu, "Hun Isai ino e irat hag toho weregma asimit wilip aruhu. Wilip aruhuwon ino o pumbuk obog toho fer enesug laruhuwen in aruhu. O pumbuk obog tohowen nit fet nenesug laruhuwon waruhu ulug mangno ruruk lamuhup." 13Allahn fanowap nenebuhu ulug mangno ruruk laheyon inowen hit hinindi yuwahap heneptuk lit henehiyehap henebuhu. Allah hime fanowon inowen hit hinineyap heneptukmu hit hinindi tem toho wenggel haruk lit Allahn fanowap nenebuhu ulug mangno ruruk lamuhup. 14Nori, hit fano ane turuk lit hinindimu honoluk toho welahebon ariyen hit-hit komo-komo atuk lahep ha reg peruk lahi. 15Anden ari peruk lahi angge famen Allahn indi niyaruk lit wene fanowon ninggikmu emberisimu hit honoluk toho welamag ulug suwesingga aru emberuk lit alem amu-amuwon fag toho hiyag hisaruk lahi. 16An Yesus Kristus amingmingangge wereg lit Allah wene fanowon ino o pumbuk winon Allah unuk enepeleg inap hiyag isaruk laruhun ulug Allahn mumal naptisimu Allah fahet hubu lahaptukon imam hag toho welahi. Allah fahet mun angge man angge emberuk hag toho it o pumbuk winon arimano oho Allah it fahet ngi aruhureg fano ngi ahi puhuwen Allah hime fanowon inowen it fanowap enebuhu. 17An Allah olohotma welahi ane ariyen Yesus Kristus unuk uruk lit wel tihi ha reg. 18An ninggarehen turuk latikik ane fahet nele uk fug teg lahi, Kristus inggikmu an wanggun fanowon hag toho welahimu Aren turuk latisi ane fahet eneg hiyag hisihi ha reg lahi. Allah unuk enepeleg inap arimano At awene holukag ulug hiyag isaruk lit ninggik fam oho turuk lahi. 19Allah hime fanowon inowen an nineyap naptisimu ap kinangmonen tuk fug teg ane poholmonen eneg tuk teg ane anden turuk latikik. Ari roho turuk lit o Yerusalemen ak teberikikteg walingguruk lit o pumbuk obog toho Ilirikum inap oho Kristus wene hiyag isaruk latikik. 20Wene hiyag isil laruk lit Kristus unuk onoluk inap wereg ambeg lamin puk fug angge At unuk enepeleg inap eneg fano hiyag isa lamin perikik. Ari perikikteg ap winonen olun warusa ambeg anden o wiruhuk fug perikik. 21Haharoho imbibahon hikit toho turuk laruhuk perikik ane tu, "Wene At fahet hiyag isarusa fuhon arimanowen At yet hahup. At fahet holtusa fuhon arimanowen wene holuhupteg inindi anggar aruhu." 22Nori, hit pen hisa waruhuk perikik angge famen wene hiyag isil norukmu alem ekeyon-ekeyon nubam atukmu henembeg waharikik fug. 23We ketiya o pumbuk tuma fil werehon obog toho holtusama hiyag isihi hawon elehen mo ilig am wirig am turukmu pen hisa waruhuk perikik ane ino fahet ketiya henembeg waruhuk peruk lahi. 24O Spanyol lahuk ulug nundaman peruk lahi angge re lahuk sambil ari eneg pen hisil waruhuk. Henembeg waruhukmu hit men ambiyeg tot weregma nindi yuwag atuk halug hiren o Spanyol ino hondoko numbahik lahup. 25Ketiya re tuma inaben o Yerusalem wene holtuk inap fahet ninggikmu uang emberuson og isa lahuk ulug turuk lahi. 26O Yerusalemen wene holtuk inap arimano winon enengge eleg angge werehon fahet Makedonia inap men Akhaya inap menen enele sahaltusareg ler enebuhuk ulug inindiyen uang emberusa. 27Inindiyen uang embehe perusa angge famen anden paleg angge fahet emberusa peruk lahi. Yahudi inap o Yerusalem werehon arimanowen poholma wereg angge minggiroho og isarusama it o pumbuk winon werehon arimanowen kinangma wereg angge fam ayeg war isa hag toho og isarusa. 28Og isa lahun ulug ninggikmu emberuson ari walug lahukteg it ininggikmu umbuhukteg hit hinibam pumbuk keyen tulug o Spanyol lahuk. 29Kristus inowen an og nitisireg nineyap naptukmu hit henembeg pen hisa waruhukteg og hisahukon fahet ninggareg noluk toho welahi. 30Nori, Yesus hit men an men Nonowe roho weregma Allah hime fanowon inowen Indi nenesug lit werehen hit men an men ambiyeg sembahyang an fahet uruk lamuhuk ulug komo heneptuk lahi. 31Wene holtuk eleg inap o Yudea werehon arimanowen nubam siyag ane tuhup tohon ulug sembahyang uruk lit og isa lahun ulug ninggikmu emberuson walug larukmu wene holtuk inap o Yerusalem werehon arimanowen fano roho hondog nabuhuben sembahyang uruk lamul. 32Allahn peruk ane hikit toho an oho nahiyeg toho hit henembeg waruhukteg hit men ambiyeg wereg lit nindi yuwag toho welaruhuk. 33Allah ap seli roho werehon mangnowap eneptukon inowen hit obog toho fet henesug laruhu. Amin.

will be added

X\