WAHYU 6

1Anden yet harukmen domba umalik inowen enehangge sabiren itano atamon ino filila rurukmu yet harikik. Filila rurukmu hol harukmen lebe ruruk angge uhan itano atamon inowen ele hum toho ululu ele hag toho ma urukmu hol harikik. 2Anden yet harukmen wam kuda kuron misig waharukmu emberimu heriyeg latisi ahunen minggin tog senegma unggul hobog fanowon og utusa. Og utusama ap onolok inaben tog aptuk lit turuk hag toho an palimu aruhuk ulug laruk latisi. 3Domba umalik inowen enehangge pirenehon filila ririsimu hol harukmen lebe ruruk angge uhan itano pirenon inowen ma urukmu hol harikik. 4Ma urukmu itano wam kuda winon eke oruk huluwon waharukmu emberimu heriyeg latisi ahun inowen mangno roho wereg ane elehap turuk laruhu ulug at ineyap tirisi. Ap kinangmon it-it wat-war amag ulug at ino inggikmu karog suwon emberusa. 5Domba umalik inowen enehangge hinahanehon filila ririsimu anden hol harukmen lebe ruruk angge uhan itano hinahanehon inowen ma urukmu hol harikik. Anden yet harukmen wam kuda singon misig emberimu heriyeg latisi ahun inowen anggin emberuk angge inggikmu seneg latisi. 6Lebe ruruk angge uhan itano sehelimuwen ele urukon holtikikon, "Suburu sum misig uang inggila teng misig fam warukmu kiring sum hinahan uang inggila teng misig fam waruk angge wam sei men hele ahaluwe fanowon men siyahap tuk fug," urukmu hol harikik. 7Domba umalik inowen enehangge uhanehon filila ririsimu hol harukmen lebe ruruk angge itano uhanehon inowen ma urukmu holtikik. 8Anden yet harukmen wam kuda oruk inggilangge hilali rurukon hahon waharukmu emberimu heriyeg latisi ahun ino unuk War Atukon suwalegma unuk War Atuk Ambeg ombolim waharuk latisi. It piren itanowen ap minggiroho unusuruk lit winon karog fam unusuruk lit winon suburu obok og isaruk lit winon ouk unubam emberuk lit winon olomene kinangma werehon mako unubam emberuk lit pinggi unusuruk lamuhup ulug inineyap eneptusa. 9Domba umalik inowen enehangge fuwabon filila ririsimu yet harukmen Allah fahet hubu lahaptuk ambeg apma Allah wene fahet fag toho hiyag isaruk latusa ane fahet pinggi unusuruson arimano enehime yer isarikik. 10Warehon enehime arimanowen enele hi roho uruk lit, "Hebe ine roho wereg lit Hindi fanowonen pikir ane turuk lahenon inowen nit nenemep hinang tarukon fahet nombarenam welamuhukmu ap kinangma werehon unggum unubam emberuk lit ayeg waroho unusuhun?" uruk latusa. 11Ari uruk latusama it arimano enebe wal taneg sum yanggowon wan eneptusareg it unubam enele uruk lit, "Tot hinindi yuwag toho weregma hit honori Allah amingmingangge werehon hit hunusurusa hag toho unusuhupmu winag hahupteg wirim aha uhup," ulug hiyag isarusa. 12Anden yet harukmen domba umalik inowen enehangge falfalikon filila ririsimu o mek humon turukmu mo oho aben fesi lahaplug sum siyahon suknuruk hag toho il siyag atisimu pikalem il mep atisi. 13Siyelu humon waharuk lit e anggen momiyon tahanoho wamburuk hag toho suhal poholman kinangma loloho wamburusa. 14Suwesingga yinggiltuk hag toho pohol yinggiloho eleg atisimu punu men ik alonggen ke werehon men miyaloho hikip atusa. 15Kinangma ap suwon werehon men iniknisi roho werehon men sehen seneg inap onowesi men tung inap men palimu werehon men ap enemingmingangge werehon men enemu wirik toho werehon men arimano obog toho enekolen kiling ele ke hirag atuk latusa. 16Hirag atusareg wereg lit punu men tom ayeg men unubam enele uruk lit, "Lehoma heriyeg Ahun inowen yet nisahumu domba umalik inowen Olok ane nunubam tuhu rohon tom ayeg fele roho sok lare feruk lit hirag nenebiyek," uruk latusa. 17It itano Onolok anggolo haruk sambil inam atisimu ap san indi wirik toho fano welam teg? Luk 21:25; Why 11:13, 16:18*

will be added

X\